Salmu 103:1-22
Ohàn Davidi tọn.
103 Gbọ yẹn* ni nọ pà Jehovah;Gbọ awutugonu ṣie lẹpo ni nọ pà oyín wiwe etọn.
2 Gbọ yẹn* ni nọ pà Jehovah;Gbọ yẹn ni ma wọn nuhe e ko wà lẹpo gbede blo.+
3 E nọ jo nuṣiwa towe lẹpo na we+Bo nọ hẹn azọ̀n towe lẹpo gbọ;+
4 Ewọ nọ whlẹn ogbẹ̀ towe sọn odò* lọ mẹ,+Bo nọ yí owanyi nugbo po lẹblanu etọn po ṣinyọ́n na we di jẹgbakun.+
5 E nọ yí nudagbe lẹ do pekọna we+ to gbẹzan towe lẹpo mẹ,He zọ́n bọ hiẹ gbẹ́ pò to jọja mẹ bo dohuhlọn di akùn.+
6 Jehovah nọ yí dodowiwa+ po whẹdida dodo po do yinuwaDo ota mẹhe yè to kọgbidina lẹpo tọn mẹ.+
7 Ewọ hẹn aliho etọn lẹ zun yinyọnẹn na Mose,+Podọ nuyiwa etọn lẹ na visunnu Islaeli tọn lẹ.+
8 Jehovah yin lẹblanunọ podọ awuvẹmẹtọ,*+Mẹhe nọ whleawu nado gblehomẹ bosọ gọ́ na owanyi nugbo.*+
9 Ewọ ma na ze ayidonugo do nuṣiwa mítọn lẹ ji to whepoponu,+Mọjanwẹ e ma na gblehomẹ kakadoi do niyẹn.+
10 E ma yinuwa hẹ mí sọgbe hẹ ylando mítọn lẹ,+Mọjanwẹ e ma sayana mí sọgbe hẹ nuṣiwa mítọn lẹ do niyẹn.+
11 Na dile olọn yiaga hú aigba do,Mọ wẹ owanyi nugbo etọn dohlan mẹhe nọ dibusi i lẹ klo do.+
12 Dile whèzẹtẹn dẹn do whèyihọ do,Mọ wẹ ewọ hẹn sẹ́nhẹngba mítọn lẹ dẹn do mí do.+
13 Dile otọ́ de nọ wàlẹblanuna visunnu etọn lẹ do,Mọ wẹ Jehovah ko wàlẹblanuna mẹhe nọ dibusi i lẹ do.+
14 Na ewọ yọ́n lehe mí yin didá do hezeheze,+Bosọ nọ flindọ kọ́gudu wẹ mí.+
15 Azán gbẹtọvi tọn lẹ taidi ogbé de tọn;+E nọ gbàsẹ́ di vounvoun danji tọn.+
16 Ṣigba, eyin jẹhọn yìn, e nọ busẹ,Taidi dọ e ma ko nọ finẹ pọ́n wẹ nkọ.*
17 Amọ́, owanyi nugbo Jehovah tọn na gbọṣi aimẹ kakadoi*Na mẹhe nọ dibusi i lẹ,+Podọ dodowiwa etọn na ovivi yetọn lẹ,+
18 Yèdọ na mẹhe nọ yìn alẹnu etọn lẹ+Podọ mẹhe nọ yí sọwhiwhe do yìn gbedide etọn lẹ.
19 Jehovah ko do ofìn etọn ai gligli to olọn mẹ;+Nulẹpo wẹ sọ tin to aṣẹpipa etọn glọ.+
20 Mì pà Jehovah, mì angẹli etọn+ he yin huhlọnnọ taun lẹpo emi,Mì mẹhe nọ hẹn ohó etọn di+ bosọ nọ setonuna ogbè etọn.*
21 Mì pà Jehovah, mì awhànpa etọn lẹpo emi,+Mì lizọnyizọnwatọ etọn he nọ wà ojlo etọn lẹ.+
22 Mì pà Jehovah, mì nudida etọn lẹpo,To fie ewọ to gandu* gbọn lẹpo.
Na yẹn ni nọ yí alindọn ṣie lẹpo do pà Jehovah.
Nudọnamẹ Odò Tọn
^ Kavi “alindọn ṣie.”
^ Kavi “alindọn ṣie.”
^ Kavi “yọdò.”
^ Kavi “mẹhe gọ́ na ojọmiọn.”
^ Kavi “dagbewanyi.”
^ To paa mẹ, “Bọ otẹn etọn masọ nọ yọ́n ẹn ba.”
^ Kavi “sọn madopodo jẹ madopodo.”
^ To paa mẹ, “nọ sè ogbè (nudidọ) ohó etọn tọn.”
^ Kavi “fie ewọ yin nupojipetọ.”
