Bani N Wan Keŋɛ Saazuo?
Baabule la lebesego
Naayinɛ loe la sakerɛ Kristakɔma fii wa ti a isige ba zom saazuo ba san ki. (1 Peter 1:3, 4) A san loe ba ba’asɛ, ba nari ti ba tara ba sakerɛ la kankaŋi, kelum tara ba halisoma la ge ana fa’a. Bala wan basɛ ti ba kan koŋe ba saazuo yɔɔrɛ la.—Epesus 5:5; Filipi 3:12-14.
Bem ti sɛba n wan keŋɛ saazuo la wan ta eŋɛ?
Ba wan naɛ la Yezu dɛna nadoma la malemadoma yuun tusere. (Liligere 5:9, 10; 20:6) Bamam n wan dɛna saazuo paalega la bii saazuo gɔmɛt n wan bisera “tinpaalega” la bii tingɔŋɔ wa nɛreba. Saazuo nadoma wa wan soŋɛ ti nɛresaaleba le bɔna tontɔɔ bɔŋa poan wuu Naayinɛ n yuun boti se’em la.—Isaiah 65:17; 2 Peter 3:13.
Nɛreba balɛ n wan isige keŋɛ saazuo?
Baabule la pa’alɛ ti nɛreba tusa kɔbega la tusa pinaasi la tusa anaasi (144000) n wan isige kum poan ta bɔna saazuo. (Liligere 7:4) Liligere yele la n gulesɛ bɔna Liligere 14:1-3 poan la, tuuntuna Yon yuun nyɛ la “Pebila la n ze Zion Zoore zuo la nɛreba tusa kɔbega la tusa pinaasi la tusa anaasi (144,000).” Liligere wa poan la “Pebila la” ze’ele bo la Yezu n isige kum poan la. (Yon 1:29; 1 Peter 1:19) “Zion Zoore” la ze’ele bo la kpe’eŋo kãtɛ la ti Yezu la nɛreba tusa kɔbega la tusa pinaasi la tusa anaasi (144,000) n naɛ la en bɔna saazuo tara la.—Yooma 2:6; Hebru 12:22.
Nɛresɛba ‘ti a yi ge loe ba’ ti ba naɛ la Krista bisera a na’am la poan la dela “pigilepika.” (Liligere 17:14; Luke 12:32) Wana pa’alɛ ti Yezu piisi la za’a waabi poan la, bamam n pɔ’ɛ.—Yon 10:16.
Nɛreba n ti’isɛ tuurese’a la sɛba n ye saazuo la
Tuure: Nɛresondoma woo ye la saazuo.
Yelemeŋɛrɛ: Naayinɛ pu’ulumbiŋe ti a dekɛ la daarewoo vom bo nɛresondoma zo’e zo’e tingɔŋɔ wa zuo.—Yooma 37:11, 29, 34.
Yezu yuun yeti: “Nɛnɛra ka zom saazuo.” (Yon 3:13) A yetɔɣum la pa’alɛ ti nɛresondoma sɛba n yuun ki ge ti a nyaa wa’ana la, maɣesɛ wuu Abraham, Moses, Yob, la David yuun ka keŋɛ saazuo. (Tooma 2:29, 34) Ge ba yuun tari puti’irɛ mɛ ti ba wan nyɛ kum isigere vɔna tingɔŋɔ wa zuo.—Yob 14:13-15.
Kum isigere seko n wan basɛ ti nɛreba keŋɛ saazuo la yu’urɛ dela ‘yia kum isigere.’ (Liligere 20:6) Wana pa’alɛ ti kum isigere ayima le bɔna mɛ. La wan bɔna tingɔŋɔ wa zuo.
Baabule la pa’alɛ ti Naayinɛ Na’am la bisega la poan, “kum kan le bɔna.” (Liligere 21:3, 4) Pu’ulumbiŋere wa tɔɣɛ la tingɔŋɔ wa yele se’ere n sɔi la, kum ka tabelɛ bɔna saazuo.
Tuure: Nɛra woo ta’an loe ti a keŋɛ saazuo bii a bɔna tingɔŋɔ wa zuo.
Yelemeŋɛrɛ: Naayinɛ n wan loe sakerɛ Kristakɔma sɛba n wan nyɛ ‘saazuo yia yɔɔrɛ la’ bala dela saazuo vom puti’irɛ la. (Filipi 3:14) Nɛra san bɔta bii ti’isa ti a keŋɛ saazuo, daɣɛ bala n wan basɛ ti ba loe en.—Matu 20:20-23.
Tuure: Daarewoo vom la ti nɛreba wan tara tingɔŋɔ wa zuo la ka ba’ɛ nɛ nini ti ba dekɛ bo sɛba n ka nari ti ba keŋɛ saazuo la.
Yelemeŋɛrɛ: Naayinɛ yi nɛresɛba n wan nyɛ daarewoo vom tingɔŋɔ wa zuo yeti “mam nɛreba”, “mam n loe nɛresɛba” la “sɛba ti Yehowa kã bo ba.” (Isaiah 65:21-23) Ba wan tara yɔ’ɔ ti ba basɛ ti Naayinɛ n tari putɛse’ere bɔ’ɔra asaala la tum tuuma n de, ba ana kasi tara daarewoo vom paradiisi tingɔŋɔ wa zuo.—Pin’ileŋɔ 1:28; Yooma 115:16; Isaiah 45:18.
Tuure: Liligere gɔŋɔ la n tɔɣɛ nɛreba tusa kɔbega la tusa pinaasi la tusa anaasi (144,000) yele la dela wɔ̃sum yetɔɣum ge daɣɛ nɛreba la kãlɛ n bala.
Yelemeŋɛrɛ: La boi bim ti Liligere gɔŋɔ la tari la kãlɛ ase’a n de wɔ̃sum poan yɛla ge kãlɛ ase’a sirum kɔ’ɔn dɛna la bala mea nɔɔ. Makerɛ, ku tɔɣeri la ‘Pebila la tuuntuneba pia la ayi (12) la yu’ura pia la ayi (12) la’ yele. (Liligere 21:14) Geele bisɛ yelese’a n basɛ ti la niɛ peelum ti kãlɛ la n de tusa kɔbega la tusa pinaasi la tusa anaasi (144,000) la sirum kɔ’ɔn dɛna la bala mea nɔɔ.
Liligere 7:4 gulesɛ pa’alɛ la ‘nɛresɛba ti ba dãalɛ [bii sɛba n wan vɔna saazuo la] kãlɛ n de tusa kɔbega la tusa pinaasi la tusa anaasi (144,000)’ yele. Kaalegɔ zɛ’an wa n ba’asɛ la, la le tɔɣɛ la nɛreba basɛba me yele n de ‘nɛrekuuŋɔ, ti se’em ka boi n nyaŋɛ kaalɛ ba.’ Nɛrekuuŋɔ la me nyɛ faarɛ la Naayinɛ zɛ’an. (Liligere 7:9, 10) Kãlɛ la n de tusa kɔbega la tusa pinaasi la tusa anaasi (144,000) la san dɛna la wɔ̃sum poan yele, n pa’alɛ nɛreba ti to ka mina ba kãlɛ ge le tɔɣɛ nɛreba basɛba me yele ti to ka mina ba kãlɛ, bala kan tara vuurɛ. a
Leyɛ’ɛsa, nɛreba tusa kɔbega la tusa pinaasi la tusa anaasi (144,000) la dela sɛba “ti ba da ba asaala poan ti ba dɛna didiiŋa.” (Liligere 14:4) Yelebire la n de “didiiŋa” la pa’alɛ la nɛra n loe sɛla fii. La ze’ele bo la sɛba n wan naɛ la Krista bɔna saazuo ge bisera nɛresɛba n wan bɔna tingɔŋɔ wa zuo ti to ka mina ba kãlɛ la.—Liligere 5:10.
a Bala mea ti Professor Robert L. Thomas gulesɛ pa’alɛ kãlɛ la n de tusa kɔbega la tusa pinaasi la tusa anaasi (144,000) n boi liligere 7:4 poan yeti: “La kɔ’ɔn dɛna la kãlɛ ti to mina ge daɣɛ kãlɛ seko n boi 7:9 ti to ka mina la. To san yeti kãlɛ wa dela wɔ̃sum poan yele, la pa’alɛ ti kãlɛ woo n boi gɔŋɔ la poan dela wɔ̃sum poan yɛla.”—Liligere 1-7: An Exegetical Commentary, gɔnlaka 474.
Ho Me Ta'an Bɔta Yele Ana
ESSENTIAL BIBLE TEACHINGS
Naayinɛ Na’am La Dela Bem?
Yezu na’am mɔɔlegɔ la poan, a yuun tɔɣɛ Naayinɛ Na’am la yele mɛ gaŋɛ yetɔɣum woo. Yuun kɔbesi poan, a podɔleba me zusɛ mɛ ti Na’am la wa’ana.
