N te bong teuana i aon Ierutarem ao Iesu e taekina rongorongon Tamana ae Iehova ao ni kaotaraei aia reirei aika kewe mataniwi n Aaro ake n ana bong. (Ioane 8:​12-30) E reke reireiara n te baere e taekinna n te tai anne ibukin arora n neneri koaua aika taabangaki ibukin te Atua ni boong aikai. E taku Iesu: “Ngkana kam teimatoa n taua au taeka, ao bon taan rimwiu ngkami, ao ane kam na ataa te koaua, ao e na kainaomataingkami te koaua.”​—Ioane 8:​31, 32.

“Teimatoa n taua au taeka.” E kaota ikai te aroaro ae riai Iesu ibukin neneran aia reirei Aaro bwa a “koaua” ke a aki. Ngkana ko ongo te taeka teuana ibukin te Atua, titirakiniko ni kangai: ‘E boraoi aei ma ana taeka Iesu ao kanoan te Koroboki ae Tabu ni kabane?’ Kakairi irouia te koraki ake a ongora n ana taeka te abotoro Bauro ao a “ukeuke n te Koroboki ae Tabu n te bong ae koraki bwa a koaua baikekei [bwaai ake a a tia n reiakin] ke a aki.”​—Mwakuri 17:11.

A karauia n neneri aia koaua rinanon reiakinan te Baibara ma Ana Tia Kakoaua Iehova, Marco, Rosa ao Raymonde ake a taekinaki n te moani kaongora mai buakon aikai. Tera reireiaia mai iai?

Marco: “E kamanenai Kiibu te tia kaira ara reirei n te Baibara ni kaekai au titiraki ni kabane ma kaainnabau. E a moanna n rikirake tangiran Iehova iroura, ao e a rikirake naba ni kaan riki ara itoman i marenara ngkai taanga ngaira!”

Rosa: “N te moantai, I iangoa te Baibara bwa titeboo ma te boki ni kaineti ma aia iango aomata ibukin aroaron te Atua. Ma teutana imwin teutana, I a nori kaekaan au titiraki n te Baibara. Ai bon te aomata ni koaua Iehova irou ngkai. Bon te Aomata ae I kona n onimakinna.”

Raymonde: “I tataro nakon te Atua ibukini buokau bwa N na reiakina taekana. N te tai ae waekoa imwin anne, I a moanna n reirei n te Baibara ma kaainnabau. N tokina, ti a ataa te koaua ibukin Iehova! Ti a rangi ni kimwareirei ngkai ti a atai aroaron te Atua.”

A rangi ni bati riki baika kaotaraeaki n te Baibara nakon tii kaotan rongorongo aika kewe ibukin te Atua, bwa e kaota naba te koaua ni kaineti ma aroarona aika anainano. Bon ana Taeka ae kaira koreana ao e buokira bwa ti na “atai bwaai ake ti akoaki n anganaki iroun te Atua.” (1 I-Korinto 2:12) E aera ko aki neneri i bon iroum aroni kaekaan titiraki ibukin te Atua aika taabangaki ma ni kakawaki, ana kantaninga ao taai aika imwaira? Wareki kaekaan titiraki tabeua aikai i aan te atu ae “Bible Teachings > Titiraki Aika Kaekaaki Man te Baibara” n te atureti ae www.jw.org. Ko kona naba ni bubutii bwa ko na reirei n te Baibara ma temanna Ana Tia Kakoaua Iehova n te atureti ae kakawaraki n te Internet. Ti aki nanououa bwa ngkana ko karaoa anne, ane ko na ataia bwa e a kai reke riki tangiran te Atua nakon are ko iangoia mai mwaina.