ANA taeka rimoa te Uea ae wanawana are Toromon aei, e kaota raoi aia namakin aomata ibukin te maiu. Tao ibukina bwa e kimototo te maiu aei ao e aki kona n totokoaki te mate, ai irabubua ngkai aia ririki aomata ni kariaa te maiu ae raoiroi riki. A a tia ni kabanea iranga te ririki n ukera te anga ae e na ananau iai maiuia.

N te katoto, Gilgamesh ae uean Sumeria. A bati otokaraki aika taekina maiun teuaei. Teuana mai iai e oti n rongorongon te Epic of Gilgamesh, ae taekinaki iai bwa e nako n te mwananga ae karuanikai ibukin ukeran totokoan te mate, ma e aki roko n te reke.

N te kaaua n tienture B.C.E., ao a kataia taan rabakau i Tiaina ni karaoa te bwainnaoraki ae aongkoa e na kaananaua te maiu. A karaoa te moi ae renganaki ma boitin tabeua n aron te mercury ao te arsenic. E iangoaki bwa aei te bwainnaoraki are a mate iai embera tabeman mai Tiaina. Tao i marenan 500 C.E. nakon 1,500 C.E. i Eurobe, ao iai taan rabakau ake a kataia ni karaoa te koora ae kona n nimaki, bwa a taku bwa e na kona ni kaananaua te maiu.

N taai aikai, a kataia taan rabakau tabeman i aon te rabwata ma te gene n ukera bukin rikin te kara. E oti n aia kakaaemwaaka taan rabakau aikai bwa a bon teimatoa naba ngkai aomata n ukera aron totokoan te kara ma te mate. Ma tera mwini kakaae akanne?

A a tia taan rabakau i aon aia cell aomata ni kaotii aia ribooti aika 300 tabun ake a kabwarabwaraa bukin rikirakera ni kara ao ni mate. N ririki aika tibwa nako ao a a tia taan rabakau ni bwain te rabwata ni kona ni kabentaai taian gene ao protein bwa a na kakiriariaa te rikirake ni kara, n aia kakatai irouia maan ao ni bon aia cell aomata. Ibukin anne, a anga aia mwane kaubwai ibukini kakaaean te anga ae ti na totokoa iai te kangaanga ae te mate. Tera ae a a tia ni karaoia?

A kataia ni kaananaua abwakin te maiu. A iangoia tabeman taan rabakau ni bwain te rabwata bwa ti rikirake ni kara ngkana e rotaki te bwai ae aranaki bwa te telomere ae baika a mena i tabon te chromosome. Te telomere e kamanoi rongorongo ake n ara cell, ngkana a bwenaua cell aikai ni kamwaitiia. Ma ni katoatai are a bwenaua iai cell aikai, ao e a uarereke naba te telomere. Ngkana e a aki kona ni manga bwenaua riki te cell, ao ikanne are e a roko naba iai te kara.

N 2009 ao e a reke te kaniwanga ae te Nobel laureate  iroun Elizabeth Blackburn ma kaain ana tiim ibukini kunean te bae kona ni kakiriariaa uarereken te telomere, are e reke man tokin ana mwakuri te cell. Ma e oti n aia ribooti anne bwa te telomere “bon akea te mwaaka iai, ae nanona e aki kona ni kaananaua riki maiura nakon ae ti taneiai iai.”

Manga kaboouan ana mwakuri te cell, bon te anga teuana ibukini kakiriariaan te kara. Ngkana a a rangi ni kara ara cell ao a aikoa kona ni manga bwenaua riki i bon irouia, a kona n anga rongorongo aika kairua nakon tautian te rabwata ake i rarikia, ike e a riki iai te baauraura, te maraki ae wenemaan, ao ai te aoraki. N taai aika tibwa nako ao a a tia taan rabakau mai Buranti ni manga kabooui cell ake a anai mairouia kaara, ae tabeman i buakoia 100 tabun aia ririki. E taku te mataniwi n te tiim ni kakaae aei ae Professor Jean-Marc Lemaître, bwa e oti n aia mwakuri aei aroni “katokan te kara” n taian cell.

A aki bane taan rabakau ni kakoauaa ae bwainnaoraki aika aongkoa a kona n totokoa te kara, a kona ni kaananaua riki maiuia aomata ae ngkai. E koaua ae e ririkirake abwakini maiuia aomata man te ka-19 n tienture. Ma e riki aei ibukin rikiraken te kakaitiaki, nakoraoin riki aron totokoan aoraki aika ewewe, ao ai antibiotics ma iiti aika totokoi mannaoraki. A kakoauaa taan rabakau tabeman i aon te gene bwa e aki kona ni keerake riki abwakini maiuia aomata ngkoa, n aron ae e taneiai te aba iai ngkai.

Tao 3,500 te ririki n nako ao e korea ae kangai te tia korea te Baibara are Mote: “Abwakini maiura bon 70 te ririki, ke 80 ngkana e boni korakora te aomata, ma a onrake n te kangaanga ma te rawawata, a waekoa n nako, ao ai akea naba ngaira.” (Taian Areru 90:10) N aki ongea aia kakorakora aomata ni kaananaua maiura, ma e bon tiku naba aroni maiura aei n aron are e taekinna Mote.

Ma karikibwai n aroni kabatinou aika uraura ke aekani bwain taari teuana aika mena n te aubunga, a kona ni maiu i nanon 200 tabun te ririki, ao aroka n aron te giant sequoia a maiu i nanon iranga te ririki. Ngkana ti kabotaua abwakini maiura ma baikai ke baika maiu riki tabeua, tiaki ti kona n titirakinira aei, ‘Te koaua bwa tii 70 ke 80 te ririki tokini maiura?’