E kananokawaki bwa ngke ai tebwi tabun au ririki, e a kekerikaaki tangiran Iehova irou. A taraa n rangi n inaomata raou n reirei, ao I a namakina ae e aki reke irou anne. A a rangi n rawawata irou aia tua au karo ao kaetieti ni Kristian, ao e a rangi ni kangaanga naba taromaurian Iehova. E ngae ngke I boni kakoauaa raoi bwa iai Iehova, ma I a aki namakina ae I kaan ma ngaia.

E ngae n anne, I aki katoka au uarongorongo ma e a rangi ni karako au tai ni boutokaia. I aki kakatauraoi imwain te uarongorongo, ngaia are e kangaanga irou bwa N na moana te maroro ke n reitianako. Ibukin anne, e aki uaana au mwakuri ni minita ao e aki kakukurei, n te aro are ai bon akea tangirana. I titirakinai i bon irou ni kangai, ‘E kangaa n reke ae a kona n teimatoa ni karaoa te mwakuri aei ni katoa wiki ao ni katoa namwakaina?’

Ngke e a koro 17 au ririki ao I a rangi ni kan inaomata. Ngaia are I a botii au bwai, I kitana mwengau, ao I mwaing nako Aotiteria. A rangi n rawawata iai au karo. A raraoma irou, ma n aia iango N na bon teimatoa ni beku ibukin Iehova.

 Ni menau i Aotiteria, e a kekerikaaki riki au beku ibukin Iehova. I a moanna n aki kaakaei bobotaki. I a raoraonia rooro n rikirake aika kukurei ni kaakaei bobotaki, ao imwina a nako ni moi manging ao ni mwamwaie n taabo n takaakaro. Ngkana I iangoa te tai anne, I a ataia ae I boni kaaina te koaua ao I kaaina naba te aonnaba. Ao I a aki koaua raoi bwa e nga ae I mwengaraoi iai.

Tao uoua te ririki imwina, I a kaitiboo ma te tari te aine ae I buokaki n arona bwa N na iaiangoa aroni maiuu, e ngae ngke e aki ataia. I maeka n te auti teuana ma niman taari aine aika akea buuia, ao ti kaoa te mataniwi n te aono ma buuna ae Nei Tamara bwa a na mena iroura teuana te wiki. Ngkana e tabetabe buuna ni karaoi bwain te ekaretia, e tiku i rarikira Nei Tamara ao ti kakaraki ao ni ngarengare ma ngaia. I rangi ni kukurei n anne. Bon te aine ae akea ana bwi ao ko kona ni kakaraki ma ngaia. E rangi ni kan irou te aomata ae ikawai n te onimaki ao e kaunga te memena i rarikina.

E rangi n ingainga nanon Nei Tamara. Tangiran te koaua irouna ao te mwakuri ni minita, I rotaki naba iai. E rangi ni kukurei ni karaoa ana kabanea n tamaroa ibukin Iehova, ma I aki kukurei ngai, bwa I aki karaoa au kabanea n tamaroa. Arona ni bwaina te iango ae riai ao ni kukukurei, e rotaki iai maiuu. E anaaki nanou n ana katoto bwa N na iaiangoa te koaua ae kakawaki aei: E tangirira Iehova bwa ti na beku ibukina “ma te kakatonga” ao “te takarua ni kimwareirei.”​—TaiAre. 100:2.

I kani karekea naba te kimwareirei are iroun Nei Tamara. Ma ngkana N na karekea, I riai ni karaoi bitaki aika bubura. E kainnanoa te tai ae maan, ma I a moanna ni karaoi bitaki aika uarereke. I a kakatauraoi imwain te mwakuri ni minita, ao ni karaoa naba te bwaiania ae aki katoatai. I buokaki iai bwa e na aki nako nanou, ao n ataia bwa I boni kona ni karaoia. E a bati riki au  tai ni kamanena te Baibara n te mwakuri ni minita, ao ibukin anne, I a namakina te raunnano. N te tai ae waekoa, I a katoa namwakaina ni karaoa te bwaiania ae aki katoatai.

I a moanna ni kaaniaki ma taari aika kakaokoro nako aia ririki aika marurung n te onimaki, ao a kimwareirei n aia beku ibukin Iehova. I buokaki n aia katoto aika raraoi bwa N na iangoia bwa tera ae kakawaki riki ni maiuu, ao ni karaoi au babaire ibukini bwaai n taamnei. E a rikirake irou tangiran te mwakuri ni minita, ao n tokina I a moana au beku bwa te bwaiania ae katoatai. Ai tibwa te moantai aei i nanon ririki aika bati, ae I a namakina iai te kukurei ao te mwengaraoi n te ekaretia.

Teuana te ririki imwina, I a kaitiboo ma Alex ae te mwaane ae akoi, ao e tangira raoi Iehova ma te mwakuri ni minita. E beku bwa te tabonibai ao ni bwaiania i nanon onoua te ririki. E beku naba tabeua te tai i Malawi n taabo ake e kainnanoaki iai te ibuobuoki. Ikanne are e a kakabanea iai ana tai ma mitinare ake a riki bwa banna ni katoto aika raoiroi nakoina, ao a kaungaa bwa e na teimatoa ni moanibwaia te Tautaeka n Uea.

N 2003, I a mare ma Alex ao ti teimatoa ni mwakuri ni kabwanina ara tai ni karokoa ngkai. A bati reireiara aika raraoi aika ti a tia ni karekei, ao e a tia ni kakabwaiaira Iehova n aanga aika bati.

N 2009, ti a kaoaki bwa ti na beku bwa mitinare i Timor-Leste, ae te aba ae uarereke n aonon Indonesia. Ti bon tounako, ti kukurei, ao ti raraoma naba. Nimaua te namwakaina imwina, ti a roko n te kaawa ae bubura ae Dili.

E rangi ni kaokoro aron te maiu n ara tabo ae boou aei. Ti riai n rabakau arora ma te katei ae boou, te taetae, te amwarake, ao aron te maiu. N te mwakuri ni minita, ti aki toki ni kaitiboo ma aomata  aika rangi ni maiu ni kainnano, akea aia reirei, ao a karawawataaki. Ao ti noriia naba aomata aika bati aika rotakibuaka rabwataia, ao n taonaki n te rawawata imwin te buaka ao te iowawa. *

E rangi n tamaroa te mwakuri ni minita ikai! N te katoto, I kaitiboo ma te teinnaine ae kakaawa ae Maria ae 13 ana ririki. * E a tia ni mate tinana ao e aki bati ni kakaitiboo ma tamana. N aroia ataei aika bati ake bon ana roro, e aki naba ataia Maria bwa tera ae e na karaoia ni maiuna. I uringa te tai teuana ngke e tang ao e bunra nanona nakoiu. Ma I aki ota n te baere e taekinna, bwa I tuai n rabakau raoi ana taetae. I tataro nakon Iehova ni butiia bwa e na buokai ni kaungaa neiei. Imwina, I a wareki kiibu aika kaungaunga nakoina. N ririki ake imwina, I a nora aron te koaua ni bita aroaroni Maria, taraakina, ao maiuna. E bwabetitoaki, ao ngkai e a reirei naba ma tabeman n te Baibara. E a reke ana utu ae bubura ngkai Maria, aika ana aomata Iehova, ao e a namakina ae e tangiraki.

E kakabwaiaa Iehova te mwakuri i Timor-Leste. E ngae ngke angia taan uarongorongo a a tibwa bwabetitoaki tebwina te ririki n nako, ma a bati ngkai aika beku bwa bwaiania, tabonibai n te ekaretia, ao unimwaane. Tabeman a beku n aobiti n raitaeka ao a ibuobuoki ni katauraoi amwarake n taamnei n aia taetae. I rangi ni kukurei ngkana I noriia n anene n taai ni bobotaki, n norani moangareia, ao rikirakeia n te onimaki.

Ara mwakuri i Timor-Leste, e rangi ni kaokoro ma maiura i Aotiteria, ma irou, bon te maiu ae rangi ni kakukurei. N tabetai ti toka n te bwati ae uarereke ae onrake irouia aomata, ao e toka naba te taari n ika ma uaanikai aika bati man te mwakete. N tabetai ti kaira te reirei n te Baibara n te auti ae uarereke ae kabuebue ae baarekareka, ao a biriaitua mooa i rarikira. Ma n aki ongei taiani kangaanga, I aki toki n iango ni kangai, ‘Ai kaungara te aekaki aei!’

Ngkana I ururing rikaaki, I rangi ni kakaitau irouia au karo ngkai a karaoa aia kabanea ni konaa n reireinai ana tua Iehova ao ni boutokaai, e ngae naba ngke I a kaaitara ma kangaanga ngke ai tebwi tabun au ririki. Ni kaineti ma te bwai ae riki irou, e boni koaua are taekinaki n Taeka N Rabakau 22:6. A rangi ni kakatonga tamau ma tinau irou ma Alex. A kukurei ngkai ti kabonganaaki iroun Iehova. Ni moa man 2016, ti a beku n te mwakuri ni mwamwananga i aan te aobiti n tararua ae Australasia.

E kangaanga kakoauaan ae I a tia n aki kani kakaraoa te mwakuri ni minita. Ma ngkai, I a bon tangiria. I a ataia ae n aki ongei baika riki ni maiura, ma ti boni kona ni kukurei ni koaua ngkana ti beku iroun Iehova ma nanora ni kabane. Eng, i nanon 18 te ririki are I beku iai ibukin Iehova ma Alex, bon ririki aika taiani kabanea ni kakukurei i nanoni maiuu. I a nora ngkai koauan ana taeka te tia areru are Tawita nakon Iehova ae kangai: “A na kimwareirei aomata ni kabane aika kamanoia iroum. A na tatakarua ni kimwareirei n taai nako. . . . Ao a na kimwareirei iroum te koraki aika tangira aram.”​—TaiAre. 5:11.