E kaungaia aomata te United Nations bwa a na ibuobuoki i marenaia, a na karinea inaomatan te aomata, ao ni kamanoa te otabwanin. Bukin tera? N aron ae e taku Maher Nasser n te UN Chronicle, “a a rotaki aomata ni kabutaa te aonnaba ni bibitakini kanoan te bong, te kakeru irouia botaki ao kurubu n iowawa, rikiraken te kakaokoroaki, te itabarara ae korakora, taumatoaaia aomata aika bati bwa a na mwaing nakon te tabo teuana, te iowawa, aoraki aika ewewe ao baika karekei riki kangaanga.”

Tabeman e a riao kamoamoaaia tautaeka n te aonnaba irouia. A kamoamoaa naba Dante ae te tia rabakau n iango mai Itare ae te tia kario ao te bwakuaku n te tautaeka (1265-1321) ao ai te tia rabakau n te physics ae Albert Einstein (1879-1955). E kakoauaa Dante bwa e aki kona n teimatoa te rau ngkana a bubuaka i marenaia tautaeka n te aonnaba. E taekina ana taeka Iesu Kristo teuaei bwa ‘e na bwaka te tautaeka n uea ngkana a a manga boni buaka i marenaia kaaina.’​—Ruka 11:17.

E aki maan imwin te Kauoua ni Buaka Are Kabutaa Aonnaba are a karebweaki iai boom aika mwaakaroiroi aika uoua, ao e a kororeta naba Albert Einstein nakon te General Assembly of the United Nations ni kangai: “E riai te United Nations ni waekoa ni karekea te mweraoi ni kabutaa te aonnaba, n arona ni katea te tautaeka ae tii teuana ae e na tautaekana te aonnaba ni kabutaa.”

Ma a kona taan tautaeka n te tautaeka anne n aki babakanikawai, n aki mwakuri buaka, ao n aki karawawataia aomata? Ke a na boni karaoi naba mwakuri aika bubuaka aikai n aroia taan tautaeka ake tabemwaang? Ti a kauringaki n titiraki aikai ana taeka te tia korea rongorongon rimoa mai Buritan ae Lord Acton, ae kangai: “E kabuakakaa [te aomata] te mwaaka, ao te mwaaka ae tabwanin raoi e kabuakakaa [aron te aomata] ni kabane.”

Ibukin reken te rau ni koaua ao te boonnano irouia aomata, ti bon riai ni katiteuanaaki. Ma e na kangaa n reke anne? E boni kona n reke? E taku te Baibara bwa e kona. E kona ao e na bon reke. N te aro raa? E na aki reke iroun te tautaeka n te aonnaba ae kaainaki irouia taan tautaeka aika babakanikawai. Ma e na reke iroun te tautaeka ae kateia te Atua. Bon tii te Atua ae iai riaina n tautaeka i aoia ana karikibwai, ao tiaki aomata. Tera te tautaeka anne? E boni kaotaki naba arana n te Baibara ae “ana Tautaeka n Uea te Atua.”​—Ruka 4:43.

E iaiangoa Ana Tautaeka n Uea te Atua Iesu Kristo ngke e kangai n ana tataro ni katoto: “E bia roko am Tautaeka n Uea. E na kakororaoaki nanom . . . n te aonnaba.” (Mataio 6:​9, 10) Eng, e na taraia raoi Ana Tautaeka n Uea te Atua bwa e na karaoaki nanon te Atua n te aonnaba, ao tiaki nanoia naake a nanonrang n tangira te mwaaka ni kairiri ke ni bangaomata.

E aranaki naba Ana Tautaeka n Uea te Atua bwa “te Tautaeka n Uea ae bwaini karawa.” (Mataio 5:3) Bukin tera? Bwa e ngae ngke e na tautaekana te aonnaba, ma e na aki tei ana tautaeka n te aonnaba ma e na tei i karawa. Iangoa ae nanonaki n anne. E na aki tangira ke ni kainnanoa te mwane te tautaeka aei, n aron te taekiti. Ai karaunanora anne nakoia ana aomata!

Te taeka ae “tautaeka n uea,” e oti iai bwa Ana Tautaeka n Uea te Atua bon te tautaeka ae iai te uea iai. Te Uea iai bon Iesu Kristo are anganaki mwaakana ni kairiri iroun te Atua. E kangai te Baibara ibukin Iesu:

• “E na mena i aon angana te nakoa n tautaeka . . . E na akea tokin ririkiraken ueana ao te rau.”​—Itaia 9:​6, 7.

•   “E anganaki teuaei te mwaaka n tautaeka, te karineaki, ao te tautaeka n uea, bwa a aonga ni beku irouna botannaomata, natannaomata, ao taian taetae. Mwaakana n tautaeka . . . e na aki nako.”​—Taniera 7:14.

• “E a riki te tautaeka n uea ae tautaekania kaain te aonnaba, bwa ana Tautaeka n Uea ara Uea [ae te Atua] ma ana Kristo.”​—Te Kaotioti 11:15.

Ibukini kakororaoan ana tataro ni katoto Iesu, e na kakororaoa raoi nanon te Atua n te aonnaba Ana Tautaeka n Uea te Atua. I aan te Tautaeka n Uea aei, a na bane aomata n reiakina aron tararuaan ara otabwanin n aron are n te moantai ao n on irouia aomata ao maan.

Ao ae moamoa riki, e na bon reireinia ana aomata Ana Tautaeka n Uea te Atua. A na bane n reireinaki taiani kaetieti aika tii te tikina. E na akea te bobuaka n iango ke te iraraure. E taku Itaia 11:9: “A na aki manga kaikoaki ke ni karaoi baika karuanikai . . . ibukina bwa e na boni buta te aonnaba n ataakin Iehova, n aron taari ngkai e kabutaa marawa.”

A nang katiteuanaaki aomata ao ni maeka ma te rau n te aonnaba ni kabutaa, ae te bwai ae tangiria te United Nations. E kangai Taian Areru 37:11: “E na korakora kimwareireia n te rau ae bati.” Imwina riki ao ti nang aki manga ongo taeka aika “kakeru,” “kabarekaan te otabwanin,” “te maiu ni kainnano,” ao “te buaka.” Ma e na riki n ningai anne? E na moana n ningai ana kairiri Ana Tautaeka n Uea te Atua n te aonnaba? E na kangaa ni karaoa anne? Ao ko na kangaa ni kakabwaiaaki man ana kairiri? Ti na noria ngkai.