LÉSON 2
Bondjé : a kimoun ?
1. Poukisa nou divèt adoré Bondjé ?
A Bondjé ki kréyé tout bagaj. I la dipi tout-tan é i ké la pou tout-tan (Psaume 90:2). A li ki bay sé bon nouvèl-ya nou ka trouvé annan Labib-a (1 Timothée 1:11). É a Bondjé ki bay nou lavi-a. A pou sa a li rounso nou divèt adoré. — Li Révélation 4:11.
2. Kouman Bondjé fika ?
Pyès moun pa jen wè Bondjé paské i sa roun lèspri (roun lèspri pi fò pasé nou annan tout bagaj ; i pa gen roun kò fèt ké lachè é i pa ka viv asou latè-a) (Jean 1:18 ; 4:24). Mé nou pouvé wè pèrsonalité Bondjé kanmem annan tousa i fè. Parèkzanp, tout kalité frwi ké flèr i fè ka anprann nou ki i plen ké lanmou ké sajès. Grandèr inivèr-a ka anprann nou ki i pwisan. — Li Romains 1:20.
Nou pouvé anprann plis bagaj ankò asou Bondjé lò nou ka li Labib-a. Parèkzanp, i ka di nou sa i kontan ké sa i pa kontan. I ka di nou osi kouman i ka aji ké sé imen-yan é kisa i fè annan diféran sitiasyon. — Li Psaume 103:7-10.
3. Ès Bondjé gen roun non ?
Jézi di : « Nou Papa ki annan syèl-a, a pou to non sanktifyé » (Matthieu 6:9). Bondjé gen bokou tit, mé i gen rounsèl non. Sélon lang ou ka palé, ou pa ka di sa non-an menm fason-an. Pou noupa kréyòl nou pito ka di « Jéova ». Mé ròt moun ka di osi « Yavé ». — Li Psaume 83:18.
Annan bokou Labib, yé tiré non Bondjé épi yé mété tit kou Sényèr, Létèrnèl ouben Bondjé. Mé, lò yé ékri Labib-a, non Bondjé té ékri apéprè 7 000 fwa. Jézi fè moun-yan konnèt sa non-an lò i palé yé di Bondjé. — Li Jean 17:26.
Gadé vidéyo Ès Bondjé gen roun non ?
4. Ès Bondjé ka sonjé nou ?
I gen patché soufrans asou latè-a. Ès sa lé di ki Jéova pa ka sonjé nou ? Sèrten moun ka di ki Bondjé ka fè nou soufri pou tèsté nou, mé sa pa vré. — Li Jacques 1:13.
Bondjé bay chak moun roun gran lònò : libèrté di chwazi. Asiré pa pitèt nou trè kontan gen sa libèrté-a. Nou pouvé chwazi adoré Bondjé ! (Josué 24:15). Malérèzman, bokou moun ka chwazi fè sé lézòt-ya méchansté. A pou sa i gen sa patché soufrans-ya. É Jéova gen lanpenn wè sa patché enjistis-ya. — Li Genèse 6:5, 6.
Jéova ka sonjé nou. I lé nou viv éré. Titalò, i ké tiré tout sé soufrans-ya ké tout sé moun-yan ki ka fè si i gen soufrans. Pou lenstan, Bondjé ka pèrmèt sa soufrans-ya, mé i gen roun bon rézon. Annan léson 8-a nou ké anprann ki rézon i gen. — Li 2 Pierre 2:9 ; 3:7, 13.
5. Kouman nou pouvé vini pi pròch ké Bondjé ?
Jéova ka ankourajé nou vini pi pròch ké li. Pou fè sa, a pou nou palé ké li gras a lapriyè. I ka gadé pou nou chak (Psaume 65:2 ; 145:18). I paré pou pardonnen. I ka wè tousa nou ka fè pou fè li plézi, menm si a pa tout-tan nou ka rivé. Menm si nou pa parfè, nou pouvé divini zanmi Bondjé. — Li Psaume 103:12-14 ; Jacques 4:8.
Jéova bay nou lavi. Nou divèt kontan l’ pasé pyès ròt moun (Marc 12:30). Kouman ou pouvé montré ki ou kontan Bondjé ? A pou ou anprann konnèt li é fè sa i ka doumandé ou. Konsa, ou ké vini plizanpli pròch ké Bondjé. — Li 1 Timothée 2:4 ; 1 Jean 5:3.
