LAVÉRITÉ asi kibiten ? Asi kèsyon enpòwtan lézòm toujou pozé-yo. Pa ègzanp :

• Ès Bondyé ka okipé dè nou poudèbon ?

• Ès lagè é soufrans ké fin on jou ?

• Ka nou ka divini lè nou mò ?

• Ès nou ké wouvwè moun nou té enmé é ki mò ?

• Kijan fò-mwen priyé pou Bondyé kouté-mwen ?

• Kijan an pé touvé lakontantman ?

Ki koté ou té ké ay chèché répons a sé kèsyon-lasa ? Pétèt asi entèwnèt ou ké touvé diféran èsplikasyon. Si ou mandé dòt moun, menm moun ki adan on rèlijyon oben ki antèt a on rèlijyon, yo chak ké ba-w vèrsyon a-yo, é byen souvan yonn ké ka kontrèdi lòt. Pétèt ni dé répons ki ka sanm sa yo bon, ki ka sanm sa yo jis, men détwa tan apré, yo ka pasé dimòd.

Adan tousa, ni on liv ki ni répons ki fyab. Liv-lasa ka di yenki lavérité. Adan on priyè, Jézi di Bondyé : « Pawòl a-w sé vérité » (Jean 17:17). Pawòl-lasa, sé sa yo ka kriyé Labib. Si ou kontinyé li dokiman-lasa, ou ké pé ni on ti lidé asi répons klè é vré Labib ka bay anrapò èvè sé kèsyon-la ki maké anlè-la.

POUKISA MOUN KA POZÉ-YO KÈSYON-LASA : Nou ka viv adan on mond ki ni onpakèt méchansté é onpakèt enjistis adan-y. Lè malè ka rivé, onlo rèlijyon ka di sé volonté a Bondyé, paskè ‘sé Li ki mèt’.

MI SA LABIB KA ANSÉGNÉ : Bondyé pa janmé rèsponsab a sa ki mové. Bib-la ka di: « Sa pa an lidé a vré Bondyé-la aji èvè méchansté, ni an lidé a Toupuisan-la aji on fason ki pa jis ! » (Job 34:10). Bondyé vlé sa ki bon pou nou. Sé pou sa Jézi aprann nou priyé konsa : « Papa an-nou ki an syèl-la, fò [...] wayòm a-w vini. Fò volonté a-w fèt, asi latè, kon an syèl-la » (Matthieu 6:9, 10). Tèlman Bondyé ka sousyé-y dè nou, I fè tousa i fo pou sa I vlé dépi okoumansman réyalizé (Jean 3:16).

Gadé osi Genèse 1:26-28 ; Jacques 1:13 é 1 Pierre 5:6, 7.

POUKISA MOUN KA POZÉ-YO KÈSYON-LASA : Pa menm ni mwayen konté kantité moun lagè ka tchouyé. Ponyonn adan nou pé pa rété ensansib douvan soufrans.

MI SA LABIB KA ANSÉGNÉ : Bondyé anonsé, ni onlè, I ké mété lapé si tout latè. Anba Wayòm a-y, on gouvènman ki an syèl-la, lézòm pé ké « aprann fè lagè ankò ». Okontrè, yo ké « travay épé a-yo pou fè-yo vin pyès a chari » (Isaïe 2:4). Bondyé ké fin èvè tout enjistis é tout soufrans. Labib ka pwomèt : « [Bondyé] ké suiyé tout dlo an zyé a-yo, lanmò pé ké la ankò ; pé ké tini ni dèy, ni kri, ni doulè ankò. Sa ki té la avan [adan-y, ni enjistis é soufrans nou ka viv jòdila] disparèt » (Révélation 21:3, 4).

Gadé osi Psaume 37:10, 11 ; 46:9 é Mika 4:1-4.

POUKISA MOUN KA POZÉ-YO KÈSYON-LASA : Prèstout sé rèlijyon-la ka anségné kè lè on moun ka mò, ni on biten andidan a-y ki ka sòti é ki ka kontinyé viv. Ni sa ki ka kwè moun-mò pé fè lévivan swa byen, swa méchansté oben yo ka di, pou Bondyé pini moun-méchan, I ka fè-yo brilé an lanfè pou toultan.

MI SA LABIB KA ANSÉGNÉ : Lè on moun mò, i byen mò. Sèlon sa Labib ka di, « moun-mò [...] pa konnèt ayen » (Ecclésiaste 9:5). Padavwa moun-mò pé pa konnèt ayen, ni rèsanti ayen, yo pé pa fè lévivan mal, é yo pé pa édé-yo nonplis (Psaume 146:3, 4).

Gadé osi Genèse 3:19 é Ecclésiaste 9:6, 10.

POUKISA MOUN KA POZÉ-YO KÈSYON-LASA : Nou vlé viv, é nou vlé pwofité dè lavi èvè moun nou enmé. Sa toutafè nòwmal kè nou anvi wouvwè moun nou té enmé é kè lanmò chayé.

MI SA LABIB KA ANSÉGNÉ : Prèstout moun ki mò ké résisité. Jézi té pwomèt « moun ki adan sé tonm-la ké tann vwa a-y é yo ké sòti » (Jean 5:28, 29). Sèlon sa Bondyé té prévwa okoumansman, moun ki ké résisité ké pé viv si latè ki ké vin on paradi (Luc 23:43). Adan pwomès a Bondyé, i ni osi on santé pawfé é lavi étèwnèl pou moun ki obéyi. Labib ka ban nou asirans-lasa : « Moun ka pratiké lajistis ké ni toutlatè pou yo, é yo ké rété anlè a-y pou toultan » (Psaume 37:29).

Gadé osi Job 14:14, 15 ; Luc 7:11-17 é Actes 24:15.

POUKISA MOUN KA POZÉ-YO KÈSYON-LASA : Adan prèstout rèlijyon, moun ka priyé. Magrésa, onlo moun ni lenprésyon Bondyé pa ka réponn-yo.

MI SA LABIB KA ANSÉGNÉ : Sèlon sa Jézi aprann-nou, lè nou ka priyé, fò pa nou toujou ka répété menm pawòl-la, konsi sété on litanni. I di : « Lè zò ka priyé, pa toujou woudi menm biten-la. » (Matthieu 6:7). Si nou vlé Bondyé kouté nou, fò nou priyé jan I mandé nou fè-y. Pousa, nou dwètèt chèché a konnèt volonté a-y, kivédi sa I vlé, é priyé an sans-lasa. Mi sa ki maké adan 1 Jean 5:14 : « Kèlkèswa sa nou té ké mandé an sans a volonté a-y, I ka tann nou. »

Gadé osi Psaume 65:2 ; Jean 14:6, 14 é 1 Jean 3:22.

POUKISA MOUN KA POZÉ-YO KÈSYON-LASA : Onlo moun ka kwè, lajan, laglwa oben la bèlté ké fè yo ni lakontantman. Alò yo ka kouri dèyè tout sé biten-lasa, men yo pa jen kontan.

MI SA LABIB KA ANSÉGNÉ : Jézi fè konnèt sèkré a lakontantman lè i di : « Tchè-kontan pou séla ki ka rann-yo kont ka manké-yo èspirityalité » (Matthieu 5:3). Sèl mwayen nou ni pou rivé konnèt vréman ka ki lakontantman, sé chèché sa nou plis bizwen-la : konnèt lavérité si Bondyé é si sa I prévwa pou nou. Vérité-lasa, ou ka touvé-y adan Bib-la. Lè ou konnèt lavérité, ou ka rivé konprann ka ki vréman enpòwtan. Si nou lésé vérité-la ki an Bib-la dirijé désizyon an-nou é aksyon an-nou, vi an-nou ké ni plis sans (Luc 11:28).

Gadé osi Proverbes 3:5, 6, 13-18 é 1 Timothée 6:9, 10.

 Sa nou sòti vwè la, sé yenki on ti lidé si répons Labib ka bay asi sis kèsyon. Ès ou té ké vlé konnèt pliski sa ? Si ou ka rèkonnèt ou bizwen dirèksyon a Bondyé an vi a-w, sèten ou ké vlé aprann plis. Pétèt ou ka pozé-w dòt kèsyon ankò, kon séla : ‘Si Bondyé ka sousyé-y dè nou, poukwa I pèwmèt tousa méchansté é tousa soufrans toutolon a Listwa a limanité ? Ka an pé fè pou rann vi a fanmi an-mwen pli bèl ?’ Lè ou ké vwè a pa répons a dèmi Labib ka bay asi sé kèsyon-lasa é asi dòt ankò, ou pé ké bizwen ay chèché pondòt koté, pas ou ké sèten sé lavérité.

Magrésa, jòdila, onlo moun pè wouvè bib a-yo. Yo ka touvé sé on gwo liv é pou yo, défwa, i two rèd a konprann. Ès sa té ké fè-w plézi, si yo té ka édé-w touvé adan Bib-la répons a kèsyon ou ka pozé-w ? Pousa, Témwen a Jéova ka mété dé zouti a dispozisyon a-w.

Prèmyé zouti ki tini, sé on liv yo ka kriyé Qu’enseigne réellement la Bible ? I fèt pou édé moun, ki pa ni onlo tan, ègzaminé répons klè Labib ka bay asi kèsyon ki enpòwtan. Dézyèm zouti-la, sé on étid bazé si Labib ki ka réponn èspésyalman a sa ou bizwen. San ou péyé ayen, on moun kapab ki ka rété koté a-w, pé vin a kaz a-w oben on dòt koté ki ka aranjé-w, é i ké pran on moman èvè-w pou fè on ti kozé si Labib. Toupatou si latè, plizyè milyon moun ja pwofité dè dispozisyon-lasa. Tèlman yo té kontan, onlo adan yo rèkonnèt : « An touvé lavérité ! »

Pa ni ayen ki ni plis valè ki sa ! Vérité-la ki an Bib-la ka libéré-w dè sipèrstisyon, dè mansonj, é dè tousa ki ka fè-w pè. I ka ba-w on lèspwa, i ka ba vi a-w on sans é i ka rann tchè a-w kontan. Jézi té fè pwomès-lasa : « Zò ké konnèt lavérité, é lavérité ké libéré-zòt » (Jean 8:32).