Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Nɔ ni Ŋwɛi Bɔfoi Feɔ Amɛhaa Wɔ

Nɔ ni Ŋwɛi Bɔfoi Feɔ Amɛhaa Wɔ

 Nɔ Ni Wɔkaseɔ Kɛjɛɔ Yesu Ŋɔɔ

Nɔ ni Ŋwɛi Bɔfoi Feɔ Amɛhaa Wɔ

Yesu kɛ e-Tsɛ hi shi yɛ ŋwɛi ‘dani abɔ je lɛ.’ (Yohane 17:5) No hewɔ lɛ, ebaanyɛ eha saji ni nyiɛ sɛɛ nɛɛ ahetoo jogbaŋŋ.

Ani ŋwɛi bɔfoi yɛ wɔhe miishɛɛ?

▪ Yesu haa wɔnaa akɛ ŋwɛi bɔfoi lɛ yɛ gbɔmɛi ahe miishɛɛ waa. Ekɛɛ akɛ: “Miishɛɛ baa yɛ Nyɔŋmɔ bɔfoi lɛ ahiɛ yɛ eshafeelɔ kome ni tsakeɔ etsui lɛ hewɔ.”—Luka 15:10.

Yesu ha wɔna akɛ, akɛ nitsumɔ ewo ŋwɛi bɔfoi lɛ adɛŋ akɛ amɛye amɛbua Nyɔŋmɔ tsuji koni amɛwaje amɛ kɛ Nyɔŋmɔ teŋ wekukpaa lɛ. Enɛ hewɔ lɛ, beni Yesu bɔ ekaselɔi lɛ kɔkɔ koni amɛkato mɔ ko pampi lɛ, ekɛɛ akɛ: “Nyɛkwɛa jogbaŋŋ koni nyɛkagbe mɛi bibii nɛɛ ateŋ mɔ kome he guɔ; ejaakɛ miikɛɛ nyɛ akɛ, amɛbɔfoi ni yɔɔ ŋwɛi lɛ kwɛɔ mitsɛ ni yɔɔ ŋwɛi lɛ hiɛ daa.” (Mateo 18:10) Enɛ ni Yesu wie lɛ etsɔɔɔ akɛ esɛɛnyiɛlɔi lɛ ateŋ mɔ fɛɛ mɔ yɛ ŋwɛi bɔfo pɔtɛɛ ko ni buɔ ehe. Shi Yesu miitsɔɔ akɛ ŋwɛi bɔfoi ni kɛ Nyɔŋmɔ tsuɔ nii lɛ yɛ anɔkwa Kristofoi lɛ ahe miishɛɛ.

 Mɛɛ gbɛ nɔ Abonsam baanyɛ aye wɔ awui?

▪ Yesu bɔ esɛɛnyiɛlɔi lɛ kɔkɔ akɛ Satan bɔɔ mɔdɛŋ koni eha mɛi akpa Nyɔŋmɔ he anɔkwalei lɛ kasemɔ. Yesu kɛɛ akɛ: “Mɔ fɛɛ mɔ ni nuɔ maŋtsɛyeli lɛ he wiemɔ lɛ ni eyooo sɛɛ lɛ, mɔ fɔŋ lɛ baa bashaa nɔ ni adũ yɛ etsui mli lɛ.”—Mateo 13:19.

Yesu tsɔ abɛbua ko ni ewie ni kɔɔ nuu ko ni yadu ŋmãa yɛ ebɔɔ mli lɛ nɔ eha ana gbɛ kome ni Satan tsɔɔ nɔ elakaa mɛi. Nuu lɛ damɔ shi kɛha Yesu, ni ŋmãa lɛ damɔ shi kɛha anɔkwa Kristofoi ni kɛ Yesu baaye nɔ yɛ ŋwɛi lɛ. Shi, Yesu kɛɛ akɛ henyɛlɔ ko ba ni “ebadũ jwɛi efutu ŋmãa lɛ.” Jwɛi lɛ damɔ shi kɛha apasa Kristofoi. “Henyɛlɔ ni dũ amɛ lɛ ji abonsam.” (Mateo 13:25, 39) Tamɔ bɔ ni jwɛi jeɔ ŋmãa ni miikwɛ lɛ, nakai nɔŋŋ mɛi ni kɛɔ akɛ Kristofoi ji amɛ lɛ anifeemɔ baanyɛ afee tamɔ anɔkwa jalɔi. Jamɔi ni tsɔɔ apasa tsɔɔmɔi lɛ lakaa mɛi ni amɛhaa amɛgboɔ Nyɔŋmɔ nɔ toi. Satan tsɔɔ apasa jamɔ nɔ efiteɔ wekukpaa ni kã mɛi kɛ Yehowa teŋ lɛ.

Te wɔɔfee tɛŋŋ wɔtsi Satan gbɛ koni ekaye wɔ awui?

▪ Yesu tsɛ Satan akɛ “je lɛŋ lumɔ.” (Yohane 14:30) Yesu tsɔ sɔlemɔ ko ni esɔle eha Nyɔŋmɔ lɛ nɔ ni etsɔɔ bɔ ni wɔbaafee ni wɔbu wɔhe kɛjɛ Satan he. Yesu sɔle kɛha eŋwɛi Tsɛ lɛ yɛ ekaselɔi lɛ ahe akɛ: ‘Buu amɛhe yɛ efɔŋ lɛ mli. Amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli lɛ. Feemɔ amɛ krɔŋkrɔŋ yɛ onɔkwale lɛ mli; owiemɔ lɛ anɔkwaleŋ.’ (Yohane 17:15-17) Nilee ni yɔɔ Nyɔŋmɔ Wiemɔ lɛ mli lɛ baanyɛ abu wɔhe koni jeŋ ni Satan yeɔ nɔ lɛ akaná wɔnɔ hewalɛ.

Mɛni ŋwɛi bɔfoi feɔ amɛhaa wɔ ŋmɛnɛ?

▪ Yesu kɛɛ akɛ: ‘Yɛ je nɛŋ naagbee lɛ, ŋwɛi bɔfoi lɛ aaaje kpo aba ni amɛaabahala mɛi fɔ̃ji lɛ yɛ jalɔi lɛ ateŋ.’ (Mateo 13:49) Amrɔ nɛɛ wɔyɛ “je nɛŋ naagbee” lɛ mli, ni mɛi akpekpei abɔ miibo Nyɔŋmɔ Maŋtsɛyeli lɛ sanekpakpa lɛ toi.—Mateo 24:3, 14.

Shi jeee mɛi fɛɛ ni jeɔ Nyɔŋmɔ Wiemɔ lɛ kasemɔ shishi lɛ náa enɔkpɛlɛmɔ. Ŋwɛi bɔfoi lɛ kudɔɔ nitsumɔ ni Yehowa tsuji tsuɔ lɛ, ni amɛmiigbala mɛi ni sumɔɔ Nyɔŋmɔ kɛjɛɔ amɛtsuiŋ lɛ kɛ mɛi ni sumɔɔɔ ni amɛkɛ nɔ ni amɛkaseɔ lɛ tsuɔ nii lɛ ateŋ. Beni Yesu tsɔɔ mɛi ni Nyɔŋmɔ kpɛlɛɔ amɛnɔ lɛ, ekɛɛ akɛ: ‘Amɛji mɛi ni beni amɛnu wiemɔ lɛ amɛkɛtoɔ tsui krɔŋŋ ni hi mli, ni amɛkɛ tsuishiŋmɛɛ woɔ yibii.’—Luka 8:15.—w10-E 11/1.

Kɛ́ ootao saji babaoo yɛ enɛ he lɛ, kwɛmɔ wolo nɛɛ, Mɛni Biblia Lɛ Tsɔɔ Diɛŋtsɛ? ni Yehowa Odasefoi fee lɛ yitso 10 lɛ mli.

[Mfoniri ni yɔɔ baafa 16]

Ŋwɛi bɔfoi lɛ waa kɛbuaa mɛi ni hiɛ tsui kpakpa lɛ anaa kɛbaa anɔkwa Kristofoi ateŋ