Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Nɛgbɛ Paradeiso ni Biblia lɛ Wieɔ he lɛ Yɔɔ?

Nɛgbɛ Paradeiso ni Biblia lɛ Wieɔ he lɛ Yɔɔ?

 Saji Ni Mɛi Ni Kaneɔ Lɛ Biɔ . . .

Nɛgbɛ Paradeiso ni Biblia lɛ Wieɔ he lɛ Yɔɔ?

▪ Yesu wo nuu ko ni miihe agbo ni kɛ ekãa tsɔɔ akɛ eheɔ lɛ eyeɔ lɛ shi akɛ: “Okɛ mi aaahi Paradeiso!” (Luka 23:43) Nɛgbɛ nuu lɛ baaya? Ani Paradeiso baahi ŋwɛi, shikpɔŋ lɛ nɔ, aloo he ko ni adesai yamɛɔ yɛ kɛha kojomɔ?

Wɔklɛŋklɛŋ fɔlɔi lɛ hi Paradeiso. Biblia lɛ kɛɔ wɔ akɛ: “Yehowa Nyɔŋmɔ fee trom yɛ Eden yɛ bokagbɛ, ni eŋɔ gbɔmɔ ni eshɔ̃ lɛ eto jɛi. . . . Yehowa Nyɔŋmɔ ŋɔ gbɔmɔ lɛ ni ekɛ lɛ bato Eden trom lɛ mli, koni ehu mli ni ebu he.” (1 Mose 2:8, 15) Beni atsɔɔ wiemɔi nɛɛ ashishi kɛtee Hela wiemɔ mli lɛ, atsɔɔ wiemɔ ni ji “trom” lɛ shishi akɛ pa·raʹdei·sos, ni no mli ajɛ aná Ga wiemɔ ni ji “paradeiso” lɛ.

Tamɔ bɔ ni kɛ́ wu ko kɛ eŋa wo shwiei lɛ amɛlɛɔ amɛshihilɛhe lɛ mli lɛ, nakai nɔŋŋ akpaa gbɛ akɛ kulɛ wɔklɛŋklɛŋ fɔlɔi lɛ hu baalɛɛ Paradeiso lɛ mli ni eteke Eden husui lɛ anaa beni amɛwoɔ shwiei lɛ. Nyɔŋmɔ kɛɛ amɛ akɛ: “Nyɛyia shikpɔŋ lɛ nɔ obɔ, ni nyɛnaanaa nɔ.”—1 Mose 1:28.

No hewɔ lɛ, wɔ-Bɔlɔ lɛ yiŋtoo ji, adesai ahi shi ni amɛfɔ bii yɛ Paradeiso yɛ shikpɔŋ nɛɛ nɔ. Amɛbaahi shi kɛya naanɔ yɛ shikpɔŋ ni enɔ fɛɛ etsɔ trom ni fuuhe ko he ehiaaa lɛ mli. Kulɛ adesai fɛɛ baahi shi yɛ shikpɔŋ lɛ nɔ akɛ amɛnaanɔ shihilɛhe. Ebɛ naakpɛɛ mɔ akɛ adebɔɔ nibii ni yɔɔ wɔshibɔlemɔ ŋulami nɛɛ nɔ lɛ haa wɔnáa miishɛɛ waa! Abɔ wɔ koni wɔhi shi yɛ shikpɔŋ ni nɔ yɔɔ fɛo nɔ.

Ani Nyɔŋmɔ yiŋtoo etsake? Dabi. Yehowa woɔ wɔ shi akɛ: “Nakai miwiemɔi ni jɛɔ midaaŋ lɛ hu aaafee: ekuŋ esɛɛ kɛbaŋ miŋɔɔ efolo, shi moŋ eeefee nɔ ni sa mihiɛ lɛ!” (Yesaia 55:11) Aaafee afii 3,000 ni eho kɛjɛ beni abɔ gbɔmɔ sɛɛ lɛ, Biblia lɛ wie kɛkɔ “mɔ ni shɔ̃ shikpɔŋ lɛ ni efee” lɛ he akɛ, “ebɔɔɔ lɛ efolo, shi eshɔ̃ lɛ ni ahi nɔ.” (Yesaia 45:18) Nyɔŋmɔ yiŋtoo lɛ tsakeko. Shikpɔŋ lɛ baatsɔ paradeiso.

Miishɛɛ sane ji akɛ, Biblia lɛ mli saji babaoo ni wie Paradeiso he lɛ kɔɔ shikpɔŋ lɛ nɔ shihilɛ he. Akɛ nɔkwɛmɔnɔ lɛ, Yesaia gba akɛ: “Amɛaamamɔ tsũi, ni amɛaahi mli, ni amɛaafee weintromi, ni amɛaaye mli yibii!” (Yesaia 65:21) Nɛgbɛ amamɔɔ tsũi ni afeɔ weintromi yɛ? Nɛgbɛ ayeɔ tsei anɔ yibii yɛ? Shikpɔŋ lɛ nɔ. Abɛi 2:21 lɛ kɛɔ yɛ faŋŋ mli akɛ: “Mɛi ni ja lɛ aaahi shikpɔŋ lɛ nɔ.”

Yesu hu wie shikpɔŋ nɔ paradeiso he. Eji anɔkwale akɛ ewo ŋwɛi paradeiso ko he shi moŋ, shi mɛi fioo ko pɛ baaná no mli gbɛfaŋnɔ. (Luka 12:32) Kɛ́ mɛi nɛɛ gboi lɛ, ateɔ amɛ shi kɛyaa ŋwɛi Paradeiso lɛ mli koni amɛyafata Kristo he kɛye shikpɔŋ lɛ nɔ Paradeiso lɛ nɔ. (Kpojiemɔ 5:10; 14:1-3) Nɛkɛ ŋwɛi nɔyelɔi nɛɛ baaye shikpɔŋ lɛ nɔ Paradeiso lɛ nɔ jogbaŋŋ ni amɛbaakula lɛ bɔ ni kɛ Nyɔŋmɔ suɔmɔnaa nii kpãa gbee.

Yesu le akɛ enɛ ji Nyɔŋmɔ yiŋtoo kɛha shikpɔŋ lɛ. Nɔ hewɔ lɛ ji akɛ, ekɛ e-Tsɛ lɛ yɔɔ ŋwɛi beni afee Eden trom lɛ. Mɛi fɛɛ ni jieɔ hemɔkɛyeli kpo ŋmɛnɛ lɛ baanyɛ aná shikpɔŋ lɛ nɔ paradeiso lɛ mli gbɛfaŋnɔ. (Yohane 3:16) Yesu woɔ mɛi ni tamɔ nɛkɛ lɛ shi akɛ: “Okɛ mi aaahi Paradeiso!”—Luka 23:43.—w10-E 12/1.

[Mfoniri kɛ ehe niŋmaa ni yɔɔ baafa 15]

© FORGET Patrick/SAGAPHOTO.COM/Alamy