Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Shɛjemɔ Mɛi ni Agbo yɛ Amɛnɔ lɛ Amii, Taakɛ Yesu Fee Lɛ

Shɛjemɔ Mɛi ni Agbo yɛ Amɛnɔ lɛ Amii, Taakɛ Yesu Fee Lɛ

 Shɛjemɔ Mɛi ni Agbo yɛ Amɛnɔ lɛ Amii, Taakɛ Yesu Fee Lɛ

LAZARO ni jɛ Betania lɛ he baye waa. Enyɛmimɛi yei Marta kɛ Maria tsu bɔfoi kɛtee Yesu ni ji amɛshieŋtsɛ lɛ ŋɔɔ. Shi hela lɛ gbe Lazaro. Beni ayafu lɛ sɛɛ lɛ, nanemɛi kɛ akutsoŋbii lɛ basara Marta kɛ Maria “koni amɛbaye amɛ ŋkɔmɔ.” (Yohane 11:19) Sɛɛ mli lɛ, Yesu yashɛ Betania ni etee enanemɛi ni esumɔɔ amɛsane lɛ aŋɔɔ. Kɛ́ wɔsusu nɔ ni ewie kɛ nɔ ni efee lɛ he lɛ, wɔbaanyɛ wɔle bɔ ni wɔɔfee wɔshɛje mɛi ni agbo yɛ amɛnɔ lɛ amii.

Kɛ Oyasara Amɛ lɛ, No Tsɔɔ akɛ Osusuɔ Amɛhe

Esa akɛ Yesu afã gbɛ aaafee gbii enyɔ nyiɛmɔ kɛfo Yordan Faa lɛ, ni ekwɔ gbɛ ni jɛɔ Yeriko ni lɔgɔɔ shi lɛ kɛya Betania. Marta he fee oya ni eyakpee Yesu yɛ akrowa lɛ klotia. Sɛɛ mli beni Maria nu akɛ Yesu eba lɛ, lɛ hu ehe fee oya kɛtee koni eyana lɛ. (Yohane 10:40-42; 11:6, 17-20, 28, 29) Ekã shi faŋŋ akɛ, jɛmɛ ni Yesu tee lɛ shɛje nyɛmimɛi yei ni yeɔ ŋkɔmɔ lɛ amii waa.

 Ŋmɛnɛ hu lɛ, kɛ wɔtee wɔyasara mɔ ko ni agbo yɛ enɔ lɛ, no baanyɛ ashɛje mɔ lɛ mii. Beni Scott kɛ Lydia binuu ni atsɛɔ lɛ Theo ni eye afii ekpaa lɛ gbo yɛ oshara ko mli lɛ, amɛkɛɛ akɛ: “No mli lɛ, nɔ ni he hiaa wɔ kɛkɛ ji ni wɔná wekumɛi kɛ nanemɛi yɛ wɔmasɛi. Amɛba helatsamɔ he lɛ tɛ̃ɛ yɛ nyɔɔŋteŋ.” Mɛni nanemɛi nɛɛ wie? “Nakai beaŋ lɛ, wiemɔi ahe ehiaaa wɔ. Jɛmɛ kɛkɛ ni amɛba lɛ ha wɔna akɛ amɛsusuɔ wɔhe.”

Biblia lɛ kɛɔ akɛ beni Yesu na mɛi ni foɔ Lazaro lɛ, “ehao” ni ‘efo.’ (Yohane 11:33-35, 38, Ga Biblia hee) Yesu ebuuu lɛ hiɛgbele akɛ eeefo yɛ mɛi ahiɛ. Enu he eha amɛ ni ekɛ amɛ ye ŋkɔmɔ. Mɛni wɔkaseɔ yɛ enɛ mli? Kɛ́ wɔyasara mɛi ni agbo yɛ amɛnɔ lɛ, esaaa akɛ efeɔ wɔ hiɛgbele akɛ wɔ kɛ amɛ aaafo. (Romabii 12:15) Yɛ gbɛ kroko nɔ lɛ, kaabɔ mɔdɛŋ akɛ obaafee nɔ ko koni no aha mɔ ni agbo yɛ enɔ lɛ afo. Mɛi komɛi baasumɔ ni amɛfo yɛ teemɔŋ.

Okɛ Musuŋtsɔlɛ Abo Lɛ Toi

Ekolɛ Yesu yɛ wiemɔi komɛi yɛ ejwɛŋmɔŋ ni ebaanyɛ ewie kɛwo Marta kɛ Maria hewalɛ, shi eeenyɛ efee akɛ eŋmɛ amɛ gbɛ ni amɛ klɛŋklɛŋ amɛwie. (Yohane 11:20, 21, 32) Beni ekɛ Marta wie lɛ, ebi lɛ sane, ni no sɛɛ lɛ ebo lɛ toi.—Yohane 11:25-27.

Kɛ́ wɔbo mɛi atoi jogbaŋŋ lɛ, no tsɔɔ akɛ wɔsusuɔ amɛhe kɛjɛɔ wɔtsui mli. Kɛ́ wɔɔnyɛ wɔshɛje mɛi ni agbo yɛ amɛnɔ lɛ amii lɛ, ebaabi ni wɔbo amɛ toi jogbaŋŋ. Wɔbaanyɛ wɔbi mɛi ni agbo yɛ amɛnɔ lɛ saji ni baaha amɛya nɔ amɛwie nɔ ni yɔɔ amɛtsuiŋ, ni no baatsɔɔ akɛ wɔboɔ sane toi jogbaŋŋ. Shi, kwɛmɔ jogbaŋŋ koni okanyɛ mɔ lɛ nɔ ni ewie kɛji esumɔɔɔ ni ewieɔ. Ekolɛ etɔ lɛ ni eetao ejɔɔ ehe.

Ekolɛ mɛi ni agbo yɛ amɛnɔ lɛ baajijaa ni amɛbaawie nɔ kome too lɛ shii abɔ. Mɛi komɛi jieɔ amɛhenumɔi akpo. Maria kɛ Marta fɛɛ kɛɛ Yesu akɛ: “Nuŋtsɔ, eji oyɛ biɛ kulɛ, minyɛmi lɛ naaa agbo.” (Yohane 11:21, 32) Mɛni Yesu fee? Eto etsui shi ni ekɛ musuŋtsɔlɛ bo amɛ toi. Ekaaa akɛ ebaatsɔɔ amɛ bɔ ni esa akɛ amɛnu he amɛha. Ekã shi faŋŋ akɛ, ele akɛ mɛi ni agbo yɛ amɛnɔ lɛ baanu dɔlɛ kɛ piŋmɔ he waa.

Kɛji oleee nɔ ni obaawie beni oyasara mɔ ko ni agbo yɛ enɔ lɛ, obaanyɛ okɛɛ nɔ ko tamɔ nɛkɛ kɛje sanegbaa lɛ shishi akɛ, “Ani obaasumɔ ni okɛɛ mi bɔ ni eba lɛ?” No sɛɛ lɛ, bo lɛ toi jogbaŋŋ beni ehaa hetoo lɛ. Bo nɔ ni ekɛɔ lɛ toi jogbaŋŋ. Kwɛmɔ mɔ lɛ hiɛ tɛ̃ɛ ni obɔ mɔdɛŋ akɛ obaanu bɔ ni enuɔ he ehaa lɛ shishi.

Ebɛ mlɛo akɛ aaanu bɔ ni mɔ ko ni agbo yɛ enɔ lɛ nuɔ he ehaa lɛ shishi. Lydia tsɔɔ mli akɛ: “Wɔhiamɔ nii lɛ tsake.” Ekɛshi sɛɛ akɛ: “Bei komɛi lɛ wɔfoɔ aahu yɛ mɛi ni ebasara wɔ lɛ ahiɛ. Nɔ ni wɔtaoɔ kɛkɛ ji ni mɛi awo wɔ hewalɛ. Wɔnanemɛi lɛ bɔ mɔdɛŋ waa amɛnu wɔ shishi.”

Yesu tsu enɛ he nii jogbaŋŋ kɛmɔ shi. Ele akɛ mɔ fɛɛ mɔ yɛ “lɛ diɛŋtsɛ ehaomɔ kɛ emanehulu.” (2 Kronika 6:29) Esoro hetoo ni Yesu kɛha nyɛmimɛi yei enyɔ lɛ ateŋ mɔ fɛɛ mɔ yɛ sane ni amɛkɛfɔ̃ ehiɛ lɛ he. Akɛni Marta tee nɔ ewie hewɔ lɛ, Yesu kɛ lɛ gba sane. Shi akɛni Maria miifo hewɔ lɛ, Yesu kɛ lɛ ewieee pii. (Yohane 11:20-28, 32-35) Mɛni wɔbaanyɛ wɔkase  kɛjɛ nɔ ni Yesu fee lɛ mli? Ebaafee nɔ ni hi akɛ obaaha mɔ ni agbo yɛ enɔ lɛ kɛ nɔ ko aba ni nyɛgba he sane. Kɛji ojɛ osuɔmɔ mli obo amɛ toi beni amɛyeɔ ŋkɔmɔ lɛ, no baanyɛ ashɛje amɛmii waa.

Wiemɔi ni Tsaa Mɔ

Beni Maria kɛ Marta kɛɛ Yesu akɛ: “Eji oyɛ biɛ kulɛ,” Yesu shwaaa amɛ yɛ nɔ ni amɛkɛɛ lɛ hewɔ loo emli fuuu amɛ yɛ he. Hetoo ni ekɛha Marta akɛ: “Onyɛmi nuu lɛ baate shi” lɛ, ha etsui nyɔ emli. (Yohane 11:23) Yesu kɛ wiemɔi fioo nɛɛ ye ebua lɛ koni ena akɛ hiɛnɔkamɔ yɛ lolo.

Kɛ́ okɛ mɛi ni agbo yɛ amɛnɔ lɛ miiwie lɛ, ha ehi ojwɛŋmɔŋ akɛ, kɛji ojɛ otsui mli okɛ amɛ wie wiemɔi fioo po ni woɔ mɔ hewalɛ lɛ, ebaanyɛ eye ebua amɛ waa. Abaanyɛ awie miishɛjemɔ wiemɔi loo aŋmala yɛ wolo nɔ. Akɛni abaanyɛ akane woji ni aŋmala lɛ shii abɔ hewɔ lɛ, nomɛi baanyɛ ashɛje mɔ mii be kplaŋŋ. Nyɔji nɛɛhu sɛɛ beni Kath wu Bob egbo lɛ, Kath tee nɔ ekane woji ni mɛi ŋmala kɛmaje lɛ lɛ fɛɛ ekoŋŋ. Ekɛɛ akɛ, “Mina akɛ woji nɛɛ ye ebua mi waa yɛ nakai beaŋ po fe tsutsu lɛ.” Ni ekɛfata he akɛ, “Nakai beaŋ ji be ni woji nɛɛ shɛje mimii waa.”

Mɛɛ wiemɔ kuku obaanyɛ oŋma kɛshɛje mɔ ko mii? Obaanyɛ oŋma mɔ ni egbo lɛ he sane—tamɔ niiashikpamɔ ko ni okɛ lɛ fɛɛ ná loo esu ko ni osumɔɔ waa lɛ he sane. Kath kɛɛ akɛ: “Bob he wiemɔi kpakpai kɛ bɔ ni efeɔ enii ehaa ni mɛi ŋmala lɛ ha ŋmɔlɔ kɛ awerɛhoo fɛɛ loo mi. Nibii ni efee ni yɔɔ ŋmɔlɔ ni mɛi ŋmala yɛ ehe lɛ wo minaa ŋmɔlɔ ni eha mikai bɔ ni wɔhi shi kɛ miishɛɛ lɛ.”

Feemɔ Nɔ ko ni Sa Kɛye Obua Mɔ Lɛ

Yesu fee nɔ ko ni wɔnyɛŋ wɔfee kɛye ebua Lazaro weku lɛ. Etee Lazaro shi. (Yohane 11:43, 44) Shi wɔbaanyɛ wɔfee nibii babaoo ni sa ni yɔɔ wɔhewalɛ mli, tamɔ nihoomɔ, wɔɔhe ni wɔbaatao wɔha gbɔi, niiahefɔmɔ, gbekɛbii akwɛmɔ, nibii ahemɔ, aloo ni wɔye wɔbua kɛ tsɔne. Kɛ́ wɔjɛ wɔsuɔmɔ mli wɔtsu nibii bibii ni abuuu po wɔha mɔ ni agbo yɛ enɔ lɛ, ŋwanejee ko bɛ he akɛ amɛbaanya he waa.

Shishinumɔ yɛ he akɛ mɛi ni miiye ŋkɔmɔ lɛ baasumɔ ni amɛná be amɛha amɛhe. Fɛɛ sɛɛ lɛ, obaanyɛ otao gbɛ ni sa ni otsɔ nɔ kɛbi amɛshi. Yoo ko ni bi gbo lɛ kɛɛ akɛ: “Be pɔtɛɛ ko bɛ ni esa akɛ aye ŋkɔmɔ kɛyashi.” Mɛi komɛi kaiɔ mɔ ni agbo yɛ enɔ lɛ yɛ bei pɔtɛɛ komɛi anɔ, tamɔ be ni ebote gbalashihilɛ mli loo be ni nɔ nyɔ ehiŋmɛiiaŋ lɛ. Kɛji otee oyasara lɛ yɛ bei nɛɛ amli lɛ, obaatsɔ naanyo kpakpa yɛ haomɔ beaŋ oha lɛ.—Abɛi 17:17.

Hiɛnɔkamɔ ni Yesu kɛ ekaselɔi lɛ gba he sane lɛ fata miishɛjemɔ ni ekɛha lɛ he, akɛ: “Wɔshieŋtsɛ Lazaro ewɔ; shi miiya ni mayatsĩɛ lɛ yɛ wɔ lɛ mli.” (Yohane 11:11) Yesu ma nɔ mi eha esɛɛnyiɛlɔi lɛ akɛ gbohiiashitee baaba. Ebi Marta akɛ: “Oheɔ enɛ oyeɔ lo?” Marta kɛɛ lɛ akɛ: “Hɛɛ, Nuŋtsɔ.”—Yohane 11:24-27.

Oheɔ oyeɔ akɛ Yesu baatee gbohii ashi lo? Kɛ nakai lɛ, okɛ mɛi ni agbo yɛ amɛnɔ lɛ agba hiɛnɔkamɔ kpele nɛɛ he sane. Feemɔ nɔ ko ni sa kɛye obua amɛ. Owiemɔ kɛ onifeemɔ baanyɛ ashɛje amɛmii yɛ gbɛ ko nɔ.—1 Yohane 3:18.—w10-E 11/1.

[Shikpɔŋ he mfoniri ni yɔɔ baafa 18]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

PEREA

Yordan Faa

Yeriko

Betania

Ŋoo Ŋshɔ

Yerusalem

SAMARIA