Mɔ ni Sumɔɔ ni Ekɛ Eshai Ake Lɛ
Tsi Obɛŋkɛ Nyɔŋmɔ
Mɔ ni Sumɔɔ ni Ekɛ Eshai Ake Lɛ
“BO, Nuŋtsɔ, ohi ni oŋɔfaa mra.” (Lala 86:5) Biblia mli wiemɔi ni haa mɔ tsui nyɔɔ emli nɛɛ maa nɔ mi ehaa wɔ akɛ Yehowa Nyɔŋmɔ kɛ eshai keɔ kwraa. Sane ko ni tee nɔ yɛ bɔfo Petro shihilɛ mli lɛ tsɔɔ faŋŋ akɛ Yehowa kɛ eshai ‘faa aahu!’—Yesaia 55:7.
Petro ji Yesu nanemɛi ni bɛŋkɛ lɛ kpaakpa lɛ ateŋ mɔ kome. Shi kɛlɛ, yɛ gbi gbɛkɛ ni Yesu wala shihilɛ baaba naagbee yɛ shikpɔŋ lɛ nɔ lɛ, gbɔmɔ gbeyeishemɔ ha Petro fee esha ni yɔɔ hiɛdɔɔ. Petro kwa Yesu yɛ faŋŋ mli shii etɛ sɔŋŋ, shi jeee shikome, yɛ kpo ni bɛŋkɛ he ni akojoɔ Yesu yɛ, yɛ gbɛ ni ejaaa nɔ lɛ nɔ. Beni Petro ekwa Yesu shii etɛ sɔŋŋ sɛɛ lɛ, Yesu “tsɔ ehe, ni ekwɛ Petro.” (Luka 22:55-61) Ani obaanyɛ ofee bɔ ni Petro nu he eha beni Yesu tsɔ ehe ni ekwɛ ehiɛ lɛ he mfoniri yɛ ojwɛŋmɔŋ? Beni Petro yɔse akɛ efee esha ni yɔɔ hiɛdɔɔ lɛ, “efo aahu.” (Marko 14:72) Ekolɛ bɔfo ni etsake etsui lɛ baasusu eyiŋ akɛ, kwa ni ekwa Yesu shii etɛ sɔŋŋ lɛ haŋ ená Nyɔŋmɔ dɛŋ eshaifaa dɔŋŋ.
Yɛ Yesu shitee lɛ sɛɛ lɛ, ekɛ Petro gba sane ko, ni ekã shi faŋŋ akɛ no jie susumɔ ni ehiɛ ákɛ akɛ ehe eshai lɛ ekeŋ lɛ lɛ kɛjɛ ejwɛŋmɔŋ. Yesu ewieee eshiii lɛ, loo ebuuu lɛ fɔ. Yɛ no najiaŋ lɛ, ebi Petro akɛ: “Oosumɔ mi lo?” Petro ha hetoo akɛ: “Hɛɛ, Nuŋtsɔ, ole akɛ miidɔ ohe.” Yesu kɛɛ lɛ akɛ: “Lɛɛ mitoobii lɛ!” Yesu saa ebi lɛ sane lɛ ekoŋŋ nɔ ni ji shii enyɔ nɔ, ni Petro saa etĩ hetoo ní eha lɛ klɛŋklɛŋ lɛ nɔŋŋ mli eha lɛ, ekolɛ kɛ nɔmimaa. Yesu kɛɛ lɛ akɛ: “Kwɛmɔ mitooi lɛ!” No sɛɛ lɛ, Yesu bi lɛ nakai sane lɛ nɔŋŋ nɔ ni ji shii etɛ nɔ akɛ: “Oodɔ mihe lo?” Agbɛnɛ “edɔ Petro” waa, ni ekɛɛ lɛ akɛ: “Nuŋtsɔ, ole nii fiaa, ole akɛ miidɔ ohe.” Yesu kɛɛ lɛ akɛ: “Lɛɛ mitooi lɛ!”—Yohane 21:15-17.
Mɛni hewɔ Yesu bi saji ni ele hetooi lɛ momo lɛ? Yesu nyɛɔ enaa nibii ni yɔɔ mɛi atsuii amli, ni no hewɔ lɛ ele akɛ Petro miisumɔ lɛ. (Marko 2:8) Yesu tsɔ nakai sanebimɔi lɛ anɔ eha Petro ná hegbɛ koni ekɛma nɔ mi shii etɛ sɔŋŋ akɛ eyɛ suɔmɔ kɛha lɛ. Wiemɔi ni Yesu kɛha Petro hetoo akɛ: “Lɛɛ mitoobii lɛ. . . . Kwɛmɔ mitooi lɛ. . . . Lɛɛ mitooi lɛ,” ma nɔ mi kɛha bɔfo ni etsake etsui lɛ akɛ ayɛ hekɛnɔfɔɔ yɛ emli lolo. Yɛ anɔkwale mli lɛ, Yesu miifã Petro koni eye ebua kɛkwɛ gboshinii ni jara wa waa, ni ji Yesu sɛɛnyiɛlɔi ni tamɔ tooi ni esumɔɔ amɛ waa lɛ. (Yohane 10:14, 15) Ekã shi faŋŋ akɛ Petro ná miishɛɛ waa beni ená ele akɛ Yesu naa lɛ lolo akɛ mɔ ko ni abaanyɛ amu afɔ̃ enɔ lɛ!
Ekã shi faŋŋ akɛ, Yesu kɛ bɔfo ni etsake etsui nɛɛ he eshai ke lɛ. Akɛni Yesu jieɔ e-Tsɛ lɛ sui akpo jogbaŋŋ kɛmɔɔ shi hewɔ lɛ, wɔbaanyɛ wɔmu sane naa yɛ gbɛ ni ja nɔ akɛ Yehowa hu kɛ Petro he eshai lɛ ke lɛ. (Yohane 5:19) Yehowa shashaooo shi akɛ ekɛ eshai aaake, ni eji Nyɔŋmɔ ni naa mɔ mɔbɔ ni ‘ŋɔɔ’ eshafeelɔ ni etsake etsui lɛ he eshai ‘efaa mra.’ Ani enɛ jeee sane ni shɛjeɔ mɔ mii?