Noa kɛ Nu Afua Lɛ Anɔkwa Sane Ni, Jeee Adesã

ANI ooshwe ni jeŋ kpakpa aba—jeŋ ni adesai kɛ amɛhe baahi shi yɛ toiŋjɔlɛ mli? jeŋ ni ta, awuiyeli, kɛ nɔnyɛɛ bɛ mli? Kɛ́ nakai ni lɛ, yinɔsane ko ni ekolɛ ole jogbaŋŋ lɛ baanyɛ eha oná nɔmimaa yɛ he. Nakai sane lɛ kɔɔ Noa ni ji gbɔmɔ kpakpa ni kpɛ adeka ni akɛbaa lɛ kɛ eweku lɛ yi yɛ nu afua ni hà shikpɔŋ muu lɛ fɛɛ nɔ, ní akɛkpãta efɔŋfeelɔi ahiɛ lɛ he.

Saji fioo komɛi pɛ yɔɔ ni ale waa fe enɛ. Amaniɛbɔɔ ni kɔɔ nibii ni ba yɛ Noa gbii lɛ amli lɛ he lɛ jeɔ kpo yɛ Biblia mli wolo ni ji Mose Klɛŋklɛŋ Wolo lɛ yitso 6 kɛyashi yitso 9 lɛ, ni aŋma nɛkɛ sane nɛɛ hu yɛ Koran lɛ kɛ woji krokomɛi ni ale waa yɛ je lɛŋ lɛ amli. Ani Nu Afua lɛ ji nɔ ko ni ba mli anɔkwale, aloo eji adesã ko kɛkɛ ni atãa koni akɛha mɛi afee nɔ ni ja? Nyɔŋmɔjamɔ he nilelɔi kɛ adebɔɔ nibii ahe nikaselɔi etaa saji anaa yɛ nɛkɛ sanebimɔ nɛɛ he afii ohai abɔ. Shi kɛlɛ, Biblia lɛ ni ji Nyɔŋmɔ Wiemɔ lɛ feɔ lɛ faŋŋ akɛ nakai sane lɛ ji anɔkwa sane diɛŋtsɛ, jeee adesã. Susumɔ saji ni nyiɛ sɛɛ nɛɛ ahe okwɛ:

Amaniɛbɔɔ ni yɔɔ Mose Klɛŋklɛŋ Wolo lɛ mli lɛ tsɔɔ wɔ afi, nyɔŋ, kɛ gbi pɔtɛɛ nɔ ni Nu Afua lɛ je shishi, be pɔtɛɛ ni adeka lɛ yama shi kɛ he ni eyama, kɛ agbɛnɛ be pɔtɛɛ ni shikpɔŋ lɛ nɔ gbi. Akɛ sanemlitsɔɔmɔ fitsofitso hu ha yɛ bɔ ni akpɛ adeka lɛ aha lɛ he—bɔ ni eyɔɔ, elɛɛmɔ kɛ ekɛlɛ kɛ enɔkwɔlɛ, kɛ nibii ni akɛtsu nii kɛkpɛ adeka lɛ. Nɔ ni tamɔɔɔ nakai lɛ, bei pii lɛ adesãi kɛ sanemlitsɔɔmɔ ni yɔɔ faŋŋ tamɔ nɛkɛ haaa.

Wekutɔkpãa he amaniɛbɔi srɔtoi enyɔ ni yɔɔ Biblia lɛ mli lɛ yeɔ odase akɛ Noa ji gbɔmɔ ni hi shi diɛŋtsɛ. (1 Kronika 1:4; Luka 3:36) Ezra kɛ Luka fɛɛ ni ŋmala wekutɔkpãi nɛɛ ahe saji lɛ ji niiamlipɛilɔi ni susuɔ nii ahe jogbaŋŋ diɛŋtsɛ. Luka ja wekutɔkpãa ni Yesu Kristo jɛ mli lɛ sɛɛ mo kɛtsɔ Noa nɔ.

Gbalɔ Yesaia kɛ gbalɔ Ezekiel kɛ agbɛnɛ hu bɔfo Paulo kɛ bɔfo Petro ni ji Kristofoi lɛ fɛɛ wie Noa loo Nu Afua lɛ he.—Yesaia 54:9; Ezekiel 14:14, 20; Hebribii 11:7; 1 Petro 3:19, 20; 2 Petro 2:5.

Yesu Kristo tsɛ Nu Afua lɛ yisɛɛ ni ekɛɛ akɛ: “Bɔ ni ba mli yɛ Noa gbii lɛ amli lɛ, nakai nɔŋŋ baaba yɛ gbɔmɔbi lɛ gbii lɛ amli hu; amɛmiiyeyee nii, amɛmiinunuu dãai, amɛmiiwɛwɛɛ yei ni akɛ amɛmiiha gbãla kɛyashi gbi nɔ ni Noa bote adeka lɛ mli ni nu afua lɛ ba ni ebakpata amɛ fɛɛ kwa amɛhiɛ lɛ.” (Luka 17:26, 27) Kɛ́ Nu Afua lɛ jeee nɔ ni ba diɛŋtsɛ lɛ, no lɛ Yesu wiemɔ ni kɔɔ “gbɔmɔbi lɛ gbii lɛ” ahe lɛ baafee nɔ ni sɛɛnamɔ bɛ he.

Bɔfo Petro gba akɛ, “hefɛoyelɔi” ni baaye nɔ ni Biblia lɛ kɛɔ lɛ he fɛo lɛ baaba. Petro ŋma akɛ: “Kwa amɛkwaa amɛjieɔ amɛhiɛ yɛ enɛ nɔ akɛ . . . nu ŋɔ [Noa] be lɛŋ je lɛ ni ehiɛ kpata lɛ.” Ani esa akɛ wɔjie wɔhiɛ yɛ ‘anɔkwa sane nɛɛ’ nɔ? Dabi kwraa! Petro kɛfata he akɛ: ‘Ŋwɛi kɛ shikpɔŋ ní yɔɔ nɛɛ, akɛ amɛ eto eha la, ni akɛ amɛ eto kɛyashi kojomɔ kɛ gbɔmɛi ní kwá Nyɔŋmɔ lɛ ahiɛkpatamɔ gbi lɛ nɔ.’—2 Petro 3:3-7.

Nyɔŋmɔ baakpata efɔŋfeelɔi lɛ ahiɛ ekoŋŋ, ni shikome ekoŋŋ lɛ abaabaa mɛi komɛi ayi. Kɛ́ wɔfee wɔnii tamɔ Noa lɛ, ekolɛ wɔbaafata jalɔi ni abaakpɔ̃ amɛ kɛya jeŋ ni miishɛɛ yɔɔ mli lɛ ahe.