Saji ni Mɛi ni Kaneɔ lɛ Biɔ

Ani Nyɔŋmɔ Maŋtsɛyeli Lɛ Yɛ Otsui Mli?

Mɛi babaoo yɛ ŋmɛnɛ ni heɔ amɛyeɔ akɛ sanebimɔ nɛɛ hetoo ji hɛɛ. Ákɛ nɔkwɛmɔnɔ lɛ, The Catholic Encyclopedia lɛ tsɔɔ mli akɛ: “Nyɔŋmɔ maŋtsɛyeli lɛ tsɔɔ . . . bɔ ni Nyɔŋmɔ kudɔɔ wɔtsuii lɛ ehaa.” Osɔfoi lɛ fɔɔ susumɔ nɛɛ tsɔɔmɔ. Shi ani Biblia lɛ tsɔɔ diɛŋtsɛ akɛ Nyɔŋmɔ Maŋtsɛyeli lɛ yɛ adesai atsuii amli?

Mɛi komɛi susuɔ akɛ Yesu diɛŋtsɛ ji mɔ ni ha ale susumɔ nɛɛ klɛŋklɛŋ kwraa akɛ Nyɔŋmɔ Maŋtsɛyeli lɛ yɛ adesai atsuii amli. Yesu kɛɛ akɛ: “Naa, Nyɔŋmɔ maŋtsɛyeli lɛ eyɛ nyɛteŋ.” (Luka 17:21, Ga Biblia hee) Shishitsɔɔmɔi komɛi tsɔɔ wiemɔ nɛɛ shishi akɛ: “Nyɔŋmɔ maŋtsɛyeli lɛ yɛ nyɛ mli.” Ani bɔ ni shishitsɔɔmɔi nɛɛ etsɔɔ Yesu wiemɔi lɛ ashishi lɛ ja? Ani Yesu miitsɔɔ diɛŋtsɛ akɛ Nyɔŋmɔ Maŋtsɛyeli lɛ yɛ adesai atsuii amli?

Klɛŋklɛŋ kwraa lɛ, susumɔ nɔ ni adesa tsui lɛ ji lɛ he okwɛ. Kɛ́ akɛ tsui lɛ tsu nii akɛ mfonirifeemɔ nɔ̃ yɛ Biblia lɛ mli lɛ, etsɔɔ mligbɛ gbɔmɔ lɛ, he ni mɔ susumɔi, subaŋi, kɛ henumɔi jɛɔ lɛ. Susumɔ ni ahiɛ akɛ nɔ ko ni nɔ̃ bɛ, tamɔ Nyɔŋmɔ Maŋtsɛyeli lɛ hiɔ adesa tsui lɛ mli—ni ákɛ nɔkwɛmɔnɔ lɛ, ekolɛ ebaanyɛ etsake gbɔmɛi lɛ baafee nɔ ni yɔɔ miishɛɛ, shi ani abaanyɛ akɛɛ akɛ nilee yɛ tsɔɔmɔ ni tamɔ nɛkɛ mli?

Biblia lɛ kɛɔ wɔ akɛ: “Tsui yɔɔ nɛɛ, eyi tɔ kɛ kutumpɔo fe nii fɛɛ, ni esane ehiii kwraa.” (Yeremia 17:9) Yesu diɛŋtsɛ wie akɛ: “Mligbɛ lɛ, ni ji gbɔmɛi atsuii amli lɛ, jɛi jwɛŋmɔi fɔji lɛ jɛɔ, gbalafitemɔ, ajwamaŋbɔɔ, awuiyeli, juu.” (Marko 7:20-22) Susumɔ he okwɛ: Ani wɔnyɛŋ wɔkɛɛ akɛ nɔnaai babaoo ni wɔnaa nɛɛ jɛ adesai atsuii ni eyi tɔ kɛ eshafeemɔ lɛ hewɔ? No hewɔ lɛ, kɛ nakai ji sane lɛ, te aaafee tɛŋŋ ni Nyɔŋmɔ Maŋtsɛyeli ni yeɔ emuu lɛ aaajɛ he ko ni tamɔ nɛkɛ kɛba? Yɛ anɔkwale mli lɛ, adesa tsui lɛ nyɛŋ awo Nyɔŋmɔ Maŋtsɛyeli lɛ tamɔ bɔ ni agbami nyɛŋ awo aklatii lɛ.—Mateo 7:16.

Nɔ ni ji enyɔ lɛ, susumɔ mɛi ni Yesu kɛwieɔ beni ewie wiemɔi ni yɔɔ Luka 17:21 lɛ he okwɛ. Kuku ni tsɔ kuku nɛɛ hiɛ lɛ kaneɔ akɛ: “Beni Farisifoi lɛ bi lɛ akɛ: Té be ni Nyɔŋmɔ maŋtsɛyeli lɛ aaaba lɛ, eto he eha amɛ.” (Luka 17:20) Farisifoi lɛ ji Yesu henyɛlɔi. Yesu kɛɛ akɛ nakai osatofoi lɛ boteŋ Nyɔŋmɔ Maŋtsɛyeli lɛ mli. (Mateo 23:13) Agbɛnɛ, kɛ́ Farisifoi lɛ boteŋ Nyɔŋmɔ Maŋtsɛyeli lɛ mli lɛ, ani Maŋtsɛyeli lɛ baanyɛ ahi amɛtsuii amli? Dabi kɔkɔɔkɔ! Belɛ, mɛni ji nɔ ni Yesu tsɔɔ lɛ mɔ?

Beni Biblia shishitsɔɔlɔi babaoo ni taoɔ nii amli jogbaŋŋ lɛ tsɔɔ Yesu wiemɔi nɛɛ ashishi lɛ, amɛkɛ wiemɔ ko ni tamɔ nɔ ni anaa yɛ New World Translation lɛ mli lɛ tsu nii. Mɛi komɛi kɛɛ akɛ Maŋtsɛyeli lɛ yɛ “nyɛteaŋ.” Mɛɛ gbɛ nɔ Nyɔŋmɔ Maŋtsɛyeli lɛ yɔɔ nakai gbɔmɛi lɛ ní Farisifoi lɛ hu fata he lɛ ateŋ? Ojogbaŋŋ, Yesu ji mɔ ni Yehowa Nyɔŋmɔ ehala lɛ akɛ nakai Maŋtsɛyeli lɛ nɔ Maŋtsɛ. Ni ákɛ Maŋtsɛ ni ahala lɛ lɛ, nakai beaŋ lɛ Yesu yɛ nakai mɛi lɛ ateŋ. Etsɔɔ mɛi Nyɔŋmɔ Maŋtsɛyeli lɛ he nii, ni efee naakpɛɛ nii po kɛtsɔɔ amɛ nɔ ni Maŋtsɛyeli lɛ baatsu he nii. Belɛ, yɛ shishinumɔ nɛɛ diɛŋtsɛ naa lɛ, Maŋtsɛyeli lɛ yɛ amɛteaŋ.

Eyɛ faŋŋ akɛ, Ŋmalɛ ko bɛ ni fĩɔ susumɔ ni ahiɛ akɛ Nyɔŋmɔ Maŋtsɛyeli lɛ yɛ adesai atsuii amli lɛ sɛɛ. Yɛ no najiaŋ lɛ, eji nɔyeli ni yɔɔ diɛŋtsɛ, ni eji nɔyeli ko ni kɛ tsakemɔi wuji baaba shikpɔŋ lɛ nɔ taakɛ gbalɔi lɛ gba amɛfɔ̃ shi lɛ pɛpɛɛpɛ.—Yesaia 9:5, 6; Daniel 2:44.