Saji ni wɔsusu he yɛ wolo nɛɛ mli lɛ ehã wɔná sanebimɔ ni ji, Namɔ ji Nyɔŋmɔ? lɛ hetoo. Shishijee lɛ, wɔna yɛ Biblia lɛ mli akɛ egbɛ́i ji Yehowa, ni esu ni fe fɛɛ ji suɔmɔ. No sɛɛ lɛ, wɔna nɔ ni efee ehã adesai momo, kɛ nɔ ni ebaafee ehã amɛ. Nibii pii yɛ ni obaakase yɛ Nyɔŋmɔ he, shi ekolɛ obaabi ohe akɛ, ‘Kɛ́ mifee nakai lɛ, mɛɛ sɛɛ maná?’

Yehowa ewo shi akɛ, “kɛ́ otao esɛɛ gbɛ lɛ, ebaahã ona lɛ.” (1 Kronika 28:9) Kɛ́ otao Nyɔŋmɔ sɛɛ gbɛ ni obale lɛ lɛ, obaaná nikeenii ko ni nɔ bɛ kwraa, no ji, ‘Yehowa kɛ bo baabɔ naanyo kpaakpa’! (Lala 25:14) Te obaaná naanyobɔɔ ni tamɔ nɛkɛ lɛ he sɛɛ ohã tɛŋŋ?

Obaaná anɔkwa miishɛɛ. Biblia lɛ kɛɛ Yehowa ji “miishɛɛ Nyɔŋmɔ lɛ.” (1 Timoteo 1:11) Kɛ́ okɛ lɛ bɔ naanyo ni okase lɛ lɛ, obaaná anɔkwa miishɛɛ, ni enɛ baawa bo yɛ henumɔŋ, jwɛŋmɔŋ, kɛ gbɔmɔtsoŋ fɛɛ. (Lala 33:12) Agbɛnɛ hu, obaanyɛ oná shihilɛ kpakpa kɛji otsi ohe kɛje nifeemɔi ni yeɔ mɔ awui ahe, oná sui kpakpai, ni wekukpaa kpakpa hi okɛ mɛi ateŋ. Obaanu nɔ ni lalatsɛ lɛ wie lɛ shishi akɛ: “Ehi hã mi akɛ matsi mabɛŋkɛ Nyɔŋmɔ.”​—Lala 73:28.

Ebaakwɛ bo jogbaŋŋ. Yehowa ewo etsuji shi akɛ: “Mawo bo ŋaa ni mihiŋmɛi baakã ohe.” (Lala 32:8) Enɛ tsɔɔ akɛ, Yehowa tsuji fɛɛ asane kã etsui nɔ, ni ehãa amɛteŋ mɔ fɛɛ mɔ nɔ tuuntu ni he hiaa lɛ. (Lala 139:1, 2) Kɛ́ naanyobɔɔ kpakpa bakã okɛ Yehowa teŋ lɛ, obaana akɛ eyɛ dekã kɛhã bo be fɛɛ be.

Obaaná shihilɛ ni nɔ bɛ wɔsɛɛ. Jeee shihilɛ kpakpa pɛ Yehowa baanyɛ ahã oná bianɛ, shi wɔsɛɛ hu lɛ, ebaanyɛ ehã oná shihilɛ ni nɔ bɛ. (Yesaia 48:17, 18) Biblia lɛ kɛɔ akɛ: “Enɛ ji naanɔ wala lɛ, akɛ amɛbaale bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ.” (Yohane 17:3) Hiɛnɔkamɔ ni Nyɔŋmɔ kɛhãa lɛ baanyɛ afee tamɔ sɛ́kɛ “ni tseee ni tsɛkɛɔ shi shiŋŋ” kɛhã wɔ yɛ shihilɛi ni jaraa nɛɛ amli.​—Hebribii 6:19.

Yiŋtoi ahewɔ ni esa akɛ ole Nyɔŋmɔ jogbaŋŋ, ni okɛ lɛ abɔ naanyo lɛ ateŋ fioo pɛ nɛ. Kɛ́ ootao ole saji babaoo ni baawa bo lɛ, obaanyɛ okɛ Yehowa Odasefonyo fɛɛ Yehowa Odasefonyo agba sane, loo oya www.jw.org/gaa.