Akɛmaje Hebribii Lɛ 6:1-20

  • Nyɛyaa hiɛ kɛshɛa dalɛ he (1-3)

  • Mɛi ni eku amɛsɛɛ kɛtee lɛ kalaa Bi lɛ amɛkpɛtɛɔ tso lɛ he ekoŋŋ (4-8)

  • Bɔɔ mɔdɛŋ koni oná nɔmimaa yɛ ohiɛnɔkamɔ lɛ he (9-12)

  • Bɔ fɛɛ bɔ ni fee lɛ, Nyɔŋmɔ baaye eshiwoo lɛ nɔ (13-20)

    • Nyɔŋmɔ shiwoo kɛ ekitã lɛ tsakeee (17, 18)

6  No hewɔ lɛ, amrɔ nɛɛ ni wɔfo mli yɛ Kristo lɛ he shishijee tsɔɔmɔi lɛ ahe lɛ,+ nyɛhãa wɔyaa hiɛ kɛshɛa dalɛ he,+ ni wɔkatswa faneshi hee ekoŋŋ, ni ji nitsumɔi ni egboi ahe tsuitsakemɔ kɛ Nyɔŋmɔ mli hemɔkɛyeli,  kɛ tsɔɔmɔi ni kɔɔ baptisimɔi kɛ niji-kɛ-mɛi-anɔŋmɛlɛmɔ,+ kɛ gbohiiashitee+ kɛ naanɔ kojomɔ he.  Ni wɔbaafee enɛ, kɛ́ Nyɔŋmɔ aaaŋmɛ gbɛ.  Ejaakɛ mɛi ni la lɛ ekpɛ ehã amɛ dã,+ ni amɛsa ŋwɛi dromɔ nikeenii lɛ naa, ni amɛná mumɔ krɔŋkrɔŋ lɛ mli gbɛfaŋnɔ,  ni amɛsa Nyɔŋmɔ wiemɔ kpakpa lɛ kɛ jeŋ ni baaba lɛ* mli hewalɛi lɛ anaa,  shi amɛku amɛsɛɛ kɛtee lɛ,+ anyɛŋ amɛ atsĩɛ ekoŋŋ kɛhã tsuitsakemɔ, ejaakɛ amɛkala Nyɔŋmɔ Bi lɛ amɛkpɛtɛ tso jaŋŋ lɛ he ekoŋŋ amɛhã amɛ diɛŋtsɛ amɛhe, ni amɛshwie ehiɛ shi amɛtsɔɔ mɛi.+  Ejaakɛ shikpɔŋ lɛ náa Nyɔŋmɔ jɔɔmɔ lɛ eko kɛ́ emiɔ nu ni nɛɔ shwieɔ nɔ kpitiokpitio lɛ, ni ebaa nii ni he yɔɔ sɛɛnamɔ kɛhãa mɛi ahewɔ ni ahuɔ nɔ lɛ.  Shi kɛ́ ŋmeii kɛ jwɛi ni ŋmei yɔɔ he ekwɛ̃ɔ lɛ, no lɛ sɛɛnamɔ bɛ he ni etsɛŋ ni Nyɔŋmɔ baalomɔ lɛ, ni yɛ naagbee lɛ, abaashã.  Shi mɛi ni asumɔɔ, eyɛ mli akɛ wɔmiiwie yɛ nɛkɛ gbɛ nɔ moŋ, shi nyɛgbɛfaŋ lɛ, wɔyɛ nɔmimaa akɛ nyɛkɔ gbɛ ni hi fe nakai, gbɛ ni kɛ mɔ yaa yiwalaheremɔ mli. 10  Ejaakɛ Nyɔŋmɔ jeee mɔ ni ejaaa ni ehiɛ baakpa nyɛnitsumɔ lɛ kɛ suɔmɔ ni nyɛjie lɛ kpo yɛ egbɛ́i lɛ hewɔ lɛ nɔ,+ ni ji sɔɔmɔ ni nyɛsɔmɔ mɛi krɔŋkrɔŋi lɛ ni nyɛyaa nɔ nyɛsɔmɔɔ amɛ lolo lɛ. 11  Shi wɔmiitao akɛ nyɛteŋ mɔ fɛɛ mɔ aya nɔ ajie nɛkɛ mɔdɛŋbɔɔ nɛɛ nɔŋŋ kpo, koni ená nɔmimaa kwraa yɛ hiɛnɔkamɔ lɛ he+ kɛyashi naagbee,+ 12  koni nyɛkafee anihao,+ shi moŋ nyɛkase mɛi ni tsɔɔ hemɔkɛyeli kɛ tsuishitoo nɔ amɛnáa shiwoi lɛ. 13  Ejaakɛ be ni Nyɔŋmɔ wo Abraham shi lɛ, akɛni Nyɔŋmɔ bɛ mɔ ko ni fe lɛ diɛŋtsɛ ni eeetsɔ enɔ ekã kitã hewɔ lɛ, Nyɔŋmɔ kɛ lɛ diɛŋtsɛ ehe kã kitã+ 14  ekɛɛ: “Bɔ fɛɛ bɔ ni fee lɛ, majɔɔ bo, ni mahã oshwere.”+ 15  Ni akɛni Abraham to etsui shi hewɔ lɛ, enine shɛ shiwoo nɛɛ nɔ. 16  Ejaakɛ gbɔmɛi yɔɔ nɛɛ, mɔ ni fe amɛ lɛ, lɛ amɛkɛkãa kitã, ni amɛkitakamɔ lɛ foɔ naataamɔ fɛɛ naataamɔ sɛɛ, ejaakɛ amɛgbɛfaŋ lɛ, no akɛmaa sane nɔ mi yɛ mla naa.+ 17  Yɛ nɛkɛ gbɛ nɔŋŋ nɔ lɛ, be ni Nyɔŋmɔ kpɛ mli akɛ ebaahã shiwoo lɛ he niyelɔi+ lɛ ana faŋŋ fe tsutsu lɛ akɛ eyiŋtoo* tsakeee lɛ, ekɛ kitakamɔ ma nɔ mi,* 18  koni wɔ mɛi ni wɔjo foi kɛyaba abo yɛ abobaahe lɛ, wɔtsɔ nibii enyɔ ni tsakeee ni Nyɔŋmɔ nyɛŋ amale+ yɛ mli lɛ anɔ wɔná hewalɛwoo ni mli wa kɛmɔ hiɛnɔkamɔ ni kã wɔhiɛ lɛ mli kpɛŋŋ. 19  Nɛkɛ hiɛnɔkamɔ ni wɔyɔɔ nɛɛ+ tamɔ sɛ́kɛ ni tseee ni tsɛkɛɔ shi shiŋŋ kɛhã susuma lɛ,* ni hiɛnɔkamɔ nɛɛ kɛ wɔ tsɔɔ pateeshɛŋ lɛ mli kɛyaa He Krɔŋkrɔŋ Fe Fɛɛ lɛ,+ 20  he ni mɔ ko etsɔ wɔhiɛ kɛtee momo yɛ wɔhewɔ lɛ, mɔ nɛɛ ji Yesu,+ mɔ ni etsɔ osɔfonukpa kɛmiiya naanɔ tamɔ Melkizedek nɔ lɛ.+

Shishigbɛ Niŋmaa

Loo “yinɔ ni baaba lɛ; shihilɛ gbɛjianɔtoo ni baaba lɛ.” Kwɛmɔ Wiemɔi Titrii Amligbalamɔ lɛ.
Loo “esuɔmɔnaa nii.”
Loo “ekɛ kitakamɔ fata he.” Greek sht. ŋm., “ekɛ kitakamɔ damɔ mli.”
Loo “kɛhã wɔwala lɛ.”