O dau veilecayaki ke o dabe vata kei na dua e lolosi tiko? So na gauna eda na sega kina ni kila na ka meda kaya se cakava. Ia e tiko eso na ka yaga eda rawa ni cakava, ena vukei ira tale ga.

E levu ga na gauna ena vinakati meda tiko vata kei ira, meda vakaraitaka tale ga nida rarawataka na takali ni dua era dau veivolekati. Ena so na ivakarau vakavanua, na nona mokoti se qumi na liga i koya e lolosi tiko e ivakaraitaki ni veikauaitaki. Ke via talaucaka na lomana, vakarogoci koya vakayalololoma. Ena vinaka sara ke o cakava eso na ka ina vuvale e lolosi tiko, de dua mo qarava eso na itavi ratou sa sega ni cakava rawa me vaka na vakasaqa, nodra kauaitaki na gone, se kena tuvanaki na veika me baleta na veibulu ke gadrevi. Ena yaga sara vakalevu na nomu cakava na veika qori, mai na nomu tukuna se vakasamataka wale tiko ga mo veivuke.

Toso na gauna de o rawa ni talanoataki koya sa takali, rairai na itovo vinaka se ka marautaki e kilai baleti koya. De dua ena rawa ni vakadredrei koya e lolosi tiko. Kena ivakaraitaki o Pam, a takali o Ian na watina ena ono na yabaki sa oti. E kaya: “Au dau taleitaka nodra tukuna vei au eso  na ka vinaka e cakava o Ian au sega tu ni bau kila.”

Era ripotetaka na dauvakadidike ni levu na gauna era vukei na lolosi ni se qai takali ga e dua era dau lomana vakalevu, ia toso na gauna sa guilecavi na veika era vinakata tu, nira sa osooso na nodra itokani. Saga gona mo veitaratara wasoma kei ira. * Levu na lolosi tiko era dau marautaka vakalevu ni qori e dua na sala era rawa ni talaucaka kina na vusolo ni lomadra.

Vakasamataki Kaori mada, e goneyalewa ni Japani. E takali e liu o tinana, ni oti ga e 15 na vula sa mate tale ga o tuakana. Ia vinaka ga nira tokoni koya na nona itokani dina. Dua na marama o Ritsuko, e veisivi sara nodrau yabaki ni bula, e saga me rau veitokani voleka. E kaya o Kaori: “Meu tukuna na ka dina, au sega ni taleitaka qori, au sega ni vinakata me sosomitaki tinaqu, au nanuma ni sega ni dua e rawa ni cakava qori. Ia na nona ivakarau vei au o Nau Ritsuko, au volekati koya kina. Keirau dau lako vata e veimacawa ena cakacaka vakavunau kei na soqoni vaKarisito. Dau sureti au me keirau lai gunu ti, kau kakana mai, levu tale ga na gauna e volavola mai. E uqeti au na nona ivakaraitaki vinaka o Nau Ritsuko.”

Sa oti qo e 12 na yabaki na takali i tinai Kaori, rau sa cakacaka vakavunau tiko vakatabakidua kei watina. E kaya o Kaori: “E kauaitaki au tu ga o Nau Ritsuko. Au dau lai sikovi koya niu gade i vale, taleitaka tale ga nona veiuqeti.”

E yaga tale ga vei Poli, e dua na marama e iVakadinadina i Jiova mai Saipurusi na nona sikovi wasoma. E turaga yalovinaka na watina o Sozos, e ivakaraitaki vinaka vei ira na ivakatawa lotu vaKarisito ni dau sureti ira na luveniyali kei ira na yada ina nona vale mera veimaliwai se kana vata. (Jemesa 1:27) Ka ni rarawa ni mate o Sozos ni se qai yabaki 53, ena vuku ni bo a tubu tiko ena nona mona. E kaya o Poli: “E mai takali o watiqu yalodina ni oti e 33 na yabaki na neirau bula vakawati.”

Ni oti na veibulu e toki sara i Kenada o Poli kei na luvena gone duadua yabaki 15 o Daniel. Rau lai soqoni ena dua na ivavakoso ni iVakadinadina i Jiova mai kea. E nanuma lesu o Poli: “Era sega ni kila na neirau itokani ena ivavakoso vou qori na veika me baleta na neirau bula e liu kei na veika dredre keirau sotava. Ia era vakacegui keirau ga ena nodra vosa vakayalovinaka kei na nodra veivukei. Sa bau talei dina qori vei luvequ ni vakananumi tamana tiko vakalevu! Era kauaitaki Daniel sara vakalevu na liutaka tiko na veiqaravi ena ivavakoso. Dua vei ira qori e dau sureti Daniel sara ga ena gauna kece e veimaliwai kina kei ira na nona itokani se ni lai qito.” Rau sa toso vinaka sara tiko vakaveitinani.

E levu sara na sala eda rawa ni veivuke se veivakacegui kina vei ira na lolosi tu. Na iVolatabu e dusia tu na inuinui e veivakacegui ena dua na gauna se bera mai.