Raica sara na lewena

Raica na lewenivola

 E VEISAUTAKA NA BULA NA IVOLATABU

Au Vulica Meu Dokai Ira na Yalewa, Meu Kua ni Beci Au

Au Vulica Meu Dokai Ira na Yalewa, Meu Kua ni Beci Au
  • SUCU: 1960

  • VANUA: VARANISE

  • KA E KILAI KINA: BOBULA INA WANIMATE GAGA, SEGA NI DAU DOKAI IRA NA YALEWA

NOQU BULA E LIU:

Au sucu e Mulhouse, ena vuaicake kei Varanise, ena dua na yasayasa e se sega tu ni vakatorocaketaki ena saula ni siti, e vanua kilai levu tale ga ena basulawa. Au dau nanuma lesu ena gauna au se gone kina, e levu na veivala vakavuvale e dau yaco ena yasayasa qori. Ena neitou vuvale mada ga, era dau beci na yalewa, ra sega ni bau kauai na tagane mera taroga nodra nanuma. Au vakavulici ni nodra vanua ga na yalewa e valenikuro, mera qaravi ira na tagane kei ira na gone.

E sega ni rawarawa na bula ena gauna au tubu tiko kina. Niu se qai yabaki tini, e mate o tamaqu ena vuku ni nona dau gunu vakasivia. Ni oti e lima na yabaki e vakamatei koya ga e dua vei rau na tuakaqu. Na yabaki vata tiko ga qori, au raica sara ga e dua na laba donuya na veiba vakavuvale. Dua na ka na kena vakararawataki au. Ra vakavulici au na wekaqu meu dau vakayagataka na isele kei na dakai ena gauna veiganiti ke katuvu e dua na veivala. E veilecayaki vakalevu noqu bula, tekivu mada ga meu tatutaka na yagoqu, au gunu tale ga vakalevu.

Niu yabaki 16, au sa gunuva e veisiga e 10 ina 15 na tavaya bia, sega ni dede au sa vakayagataka na wainimate gaga. Mera saumi na veika qori, au dau volitaki tikitiki ni kaukamea era sa sega tu ni vakayagataki, au dau butako tale ga. Niu qai yabaki 17, au sa curu oti e valeniveivesu. Me kena isoqoni kece, au totogitaki vaka18 ena vuku ni butako kei na ivalavala voravora.

Sa qai ca ga noqu bula niu sa yabaki 20 vakacaca. Au kania e 20 na itibi mariwana ena dua na siga, au dau vakayagataka tale ga na wainimate gaga kaukaua e kilai me heroin kei na so tale na kena e tabu vakalawa. Au voleka ni mate vakavica ni sa rui sivia noqu vakayagataki ira. Au tekivu volitaki wainimate gaga tale ga, levu gona na gauna au sa na vakaiyaragi tiko ena isele kei na dakai. Dua na gauna au via vana e dua na turaga, vinaka ga ni tau qai riba na sicini ena kaukamea ni nona beleti! E mate o tinaqu niu se qai yabaki 24, au sa qai cudru ga kina vakalevu. Nodra dau rerevaki au na taubale tu e tolonisala era tini takoso kina ke ra raica niu lako tiko yani. Levu na gauna au sogo tu ena siteseni ni ovisa ena vuku ni veivala, seu curu e valenibula me vakadreti na noqu mavoa.

Au vakawati niu sa yabaki 28. Me vaka ga ena namaki, au sega ni dau dokai watiqu. Au dau vosa beci koya, mokulaki koya tale ga. Sega na ka keirau dau cakava vata vakaveiwatini. Au nanuma ni sa rauti koya ga na levu ni iukuuku butakoci au solia tiko vua. Ia qai yaco e dua na ka tawanamaki.  E vuli iVolatabu o koya kei ira na iVakadinadina i Jiova. Ni oti ga na imatai ni nona vuli, sa biuta na vakatavako, sega ni vinakata na ilavo butakoci, bau vakasuka mada ga mai na iukuuku a soli vua. Dua na ka noqu cudru. Au tusaqata nona vuli iVolatabu, au dau uvuca i matana na kubou ni tavako. Au dau vakasewasewani koya tale ga ena yasayasa keitou tiko kina.

Dua na bogi ena noqu mateni tu vakalialia au qai vakama vakacalaka na tabavale keitou tiko kina. E vakabulai au o watiqu kei na luvei keirau yalewa e yabaki lima. Ni sa vuka na mateni au qai mai velavela tu yani. Au vakabauta dei ni na sega ni vosoti au rawa na Kalou. Au se nanuma tiko nona tukuna e dua na bete nira na lako i eli na tamata ca. E kaya mada ga na vuniwai ni vakasama au dau lai raica: “Sa sega na iwali ni nomu leqa! O na sega ni veisau rawa.”

VEISAUTAKI AU NA IVOLATABU:

Ni oti na noqu vakamakama qori, keitou toki vei rau na itubutubu i watiqu. Ni rau sikovi watiqu yani na iVakadinadina, au tarogi rau sara: “E rawa ni vosota na noqu ivalavala ca kece na Kalou?” Rau vakaraitaka sara vei au na 1 Korinica 6:9-11. Era tukuni tu kina na itovo e cata na Kalou, ia e kuria va qo: “Eso sara ga vei kemuni oni a va tu ya.” E veivakadeitaki na vosa qori niu rawa ni veisau. Rau qai vakauqeti au na iVakadinadina ni lomani au na Kalou ena nodrau wilika na 1 Joni 4:8. Ni uqeti au na veika qori, au sa kerea sara ga meu vuli vakarua e veimacawa, au tekivu tiko tale ga ena soqoni vaKarisito. Au dau masu wasoma vei Jiova.

Ena loma ga ni dua na vula, au sa vakatulewataka meu biuta na wainimate gaga kei na alakaolo. E vaka ga e dua na ka e veivala tiko kei na yagoqu! Au dau tadra eso na ka vakadomobula, mosi na uluqu, dro na lewe ni yagoqu kei na so tale na ka e yacovi au niu saga meu biuta na veika au dau vakayagataka tu. Ena gauna vata qori, au vakila ni taura tiko na ligaqu o Jiova me vakaukauataki au. Au vakataki koya sara ga na yapositolo o Paula. E vola me baleta na nona vukei koya na Kalou: “Au rawata na ka kece ena vuku i koya e vakaukauataki au.” (Filipai 4:13) Yaco na gauna meu sa biuta sara ga vakadua na tavako.—2 Korinica 7:1.

E vukei au na iVolatabu meu lewa matau noqu bula, e yaga tale ga ina noqu vuvale. Sa veisau na noqu itovo vei watiqu. Au tekivu dokai koya, dau kaya vua eso na vosa me vaka na “kerekere” kei na “vinaka.” Au saga tale ga meu kauaitaki luvei keirau me vaka e dua na tama vinaka. Ni yabaki dua noqu vuli iVolatabu au sa yalataki au vei Jiova meu papitaiso, me vakataki watiqu ga.

KENA YAGA:

Au vakadeitaka ni vakabulai au na ivakavuvuli vakaivolatabu. Era kaya mada ga na wekaqu era sega ni iVakadinadina niu a rawa ni mate ena vuku ni wainimate gaga kei na veivala.

Na ivakavuvuli vakaivolatabu e veisautaka vakadua noqu bula vakavuvale. E vakamacalataka na noqu itavi vakaulunivuvale, vakatama tale ga. (Efeso 5:25; 6:4) Keitou tekivu cakava vata na ka vakavuvale. Qo au sa sega ni biuti watiqu me tu ga e valenikuro, ia au tokoni koya ena nona cakacaka vakaitalatala vakatabakidua. E marau tale ga o koya ni tokoni au ena noqu itavi niu qase ni ivavakoso.

E uqeti au dina na loloma kei na nona yalovinaka na Kalou o Jiova. E gu na lomaqu meu tukuni koya vei ira era okati tu mera sega ni veisau rawa, me vaka ga nodra dau raici au tu va qori e levu. Au kila ni iVolatabu ga e tiko kina na kaukaua me vukea e dua me savasava, me vakainaki tale ga nona bula. E uqeti au na iVolatabu meu dau loloma, meu dokai ira na tagane kei na yalewa, meu kua tale ga ni dau beci au.