E levu sara na ivakasala e dau soli me baleta na lolosi, ia eso ga era yaga. Kena ivakaraitaki, era na vakasalataki iko eso mo kua ni tagi se vakaraitaka na rarawa ni lomamu. So tale era cakava na kena veibasai nira uqeti iko mo vakaraitaka na lomamu. Ia e veiraurau na ivakasala ni iVolatabu me salavata kei na so na vakadidike e se qai kune tiko ga qo.

So na vanua e dau tukuni kina ni sega ni nodra ivakarau na tagane mera dau tagi. Ia vakacava e dodonu me madualaki na tagi e matanalevu? Era kaya na kenadau ena veiqaravi vakavuniwai nida na dau tagi ga ena gauna ni lolosi. Ena rawa ni vukei iko tale ga na lolosi mo tomana kina na nomu ivakarau ni bula, dina ni mosimosi nona sa mai takali e dua drau veivolekati. Ke o kubuta lo tu ga, ena rawa tale ni veivakaleqai. Sega vakadua ni tukuni ena iVolatabu ni cala na tagi se ni qori e nodra ivakarau ga na yalewa. Vakasamataka ga na ivakaraitaki i Jisu. E tu vua na kaukaua me vakaturi ira na mate, ia e tagi e matana levu ni sa mate na nona itokani voleka o Lasarusa!—Joni 11:33-35.

Dau rawa ni yaco na cudru ena gauna ni lolosi, vakalevu ke sega ni namaki na mate. Levu na vuna era rawa ni cudru kina o ira na lolosi tiko, me vaka na nona tauca tu vakasakasaka na nona vosa e dua e namaki me vinaka na ka e tukuna. E vakamacalataka e dua na turaga ni Sauca Aferika o Mike: “Au se qai yabaki 14 ga sa mate o tamaqu. E kaya na italatala ni lotu Jaji ena gauna ni veibulu ni vinakata na Kalou na tamata vinaka, e kauti ira tale ga vakatotolo. * E vakacudrui au qori ni keitou vinakati tamai keitou tale ga. Se mosi tu ga vei au, ia sa oti qo e 63 na yabaki.”

Vakacava ga noda dau beitaki keda? Vakauasivi ni sega ni namaki na mate, e rawarawa sara nona vakasamataka o koya e lolosi tiko, ‘Ena rairai sega ni yaco qori keu a muria qo se ya.’ Se drau rairai veicudruvi kei koya e mate ena iotioti ni gauna drau sota kina. Qori eso na ka e rawa ni vakavuna nomu beitaki iko.

Ke o dau beitaki iko, o dau cudru tale ga, mo kua ni kubuta tu ga. Drau veitalanoa kei na dua na itokani vinaka ena rogoci iko, me vakadeitaka tale ga ni dau yaco ga na veika qori vei ira e levu na dau lolosi. E uqeti keda na iVolatabu meda nanuma tiko: “Na itokani dina e loloma ena veigauna, e tacida ena gauna ni rarawa.”—Vosa Vakaibalebale 17:17.

Dua na itokani dina va qori na Dauveibuli, o Jiova na Kalou. Talaucaka vua na lomamu ena masu ni ‘kauaitaki iko o koya.’ (1 Pita 5:7) E yalataka tale tu ga ni o ira kece na cakava qori ena vakacegui nodra vakasama kei na lomadra ena “vakacegu ni Kalou e uasivia na vakasama kece.” (Filipai 4:6, 7) Rawa ni vakacegui iko tale ga na nona Vosa na Kalou na iVolatabu. Vakavola eso na tikinivolatabu e veivakacegui. (Raica na  kato.) De o rairai vinakata me kasa ena nomu vakasama e  vica. Ena rawa ni yaga sara nomu dau vakasamataka na veika qori, vakauasivi ena bogi, ni o tu duadua qai dredre nomu moce.—Aisea 57:15.

Dua na gauna wale tiko ga qo a kenisa na watina e dua na turaga eda na vakatokai koya me o Jeke, e yabaki 40. E qai mate o watina. E tukuna ni so na gauna e galili sara ga vakalevu. Ia e vukei koya na nona dau masu. E kaya: “Niu masu vei Jiova, e oti noqu galili. Au dau yadra ena bogi qai dredre noqu moce tale. Ia niu wilika eso na tikinivolatabu veiuqeti, au vakasamataka vakatitobu, au qai talaucaka na lomaqu ena masu, dua na ka na vakacegu ni noqu vakasama kei na lomaqu, au rawa sara kina ni moce.”

Dua na goneyalewa o Vanessa e takali na tinana ena vuku ni tauvimate. E vakila tale ga na yaga ni masu. E kaya: “Niu sotava na veika dredre, au dau cavuta na yaca ni Kalou, au tagi tale ga. E rogoca o Jiova na noqu masu qai dau vakaukauataki au ena gauna veiganiti.”

Eso na daunivakasala era tukuna vei ira na lolosi tiko mera vukei ira eso tale se bolecakacaka ena so na vanua ena nodra itikotiko. Nodra cakava qori e rawa ni vakamarautaki ira, seavu kina nodra lolosi. (Cakacaka 20:35) Era raica e levu na lotu vaKarisito era lolosi tu ni vakacegui ira vakalevu na nodra saga mera vukei ira eso tale.—2 Korinica 1:3, 4.