ULUTAGA LEVU | NI MATE E DUA DRAU DAU VEIVOLEKATI
E Cala Meda Lolosi?
Vakacava o bau tauvimate vakalekaleka ena dua na gauna? De dua nomu bulabula totolo, o guilecava kina na mate a tauvi iko. Ia na lolosi e sega ni va qori. E vola o Dr. Alan Wolfelt ena nona ivola Healing a Spouse’s Grieving Heart: “E sega ni dau oti na lolosi.” Ia e tomana: “Ena qai seavu ni toso na gauna kei na nodra veitokoni eso tale.”
Me kena ivakaraitaki, vakasamataka mada na peteriaki o Eparama ena gauna e takali kina o watina. E kaya na iVolatabu “e mani lolosi qai tagicaki Sera o Eparama.” Na vosa “e mani” e dusia ni a dua toka na gauna nona saga me vosota nona lolosi tiko. * Dua tale na ivakaraitaki o Jekope, a lasutaki me vakabauta ni dua na manumanu kila e vakamatei luvena o Josefa. E lolosi me “vica vata na siga,” ratou qai sega ni vakacegui koya rawa na nona lewe ni vuvale. Ni oti mada ga e vica tale na yabaki e se vakasamataka tiko ga na mate i Josefa.—Vakatekivu 23:2; 37:34, 35; 42:36; 45:28.
O Eparama e lolositaki nona daulomani o Sera
Era va tale ga qori e levu nikua ni takali e dua era dau veivolekati. Wilika mada qo e rua.
-
“A mate na watiqu o Robert ena ika9 ni Julai, 2008. Dua tu ga neirau ivakarau ni bula e veimataka ni bera ni yaco na leqa vakacalaka. Ni oti na ikatalau me vaka ga na kena ivakarau ni bera ni lai cakacaka, e mokoti au, reguci au qai kaya ‘dua na ka noqu lomani iko.’ Sa oti qo e ono na yabaki se mositi au tu ga. Au vakabauta niu na sega ni guilecavi koya rawa.”—Gail yabaki 60.
-
“Sa oti qo e 18 na yabaki nona takali o watiqu, sega ni cegu noqu lolosi kei na noqu vakasamataki koya tiko ga. Niu raica na totoka ni veika bula, au vakananumi koya sara ga, au qai vakasamataka ni na marautaka tale ga na veika au raica tiko.”—Etienne, e turaga yabaki 84.
E dau yacovi keda ga vakalevu qori, meda lolositaki ira tu vakabalavu na sa mate, e mositi keda tale ga. Duidui na sala eda lolosi kina, e sega tale ga ni vinaka meda vakalewa na sala e lolosi kina e dua ni yaco e dua na vakacalaka. De dua ena gauna tale ga qori, meda kua ni nanuma ni sa cala tale na noda lolositaki ira vakasivia na sa mate. Eda na vosota rawa ga vakacava na noda lolosi?
^ para. 4 A dede tale ga nona lolosi na luve i Eparama o Aisake. Me vaka eda na raica ena ilavelave qo ena ulutaga “Vakatotomuria Nodra Vakabauta,” ni se lolosi tiko ga o Aisake ni oti e tolu na yabaki na mate i tinana, o Sera.—Vakatekivu 24:67.
Rawa ni o Wilika Tale ga
NA VALE NI VAKATAWA
Ka Mo Cakava ni o Lolosi
E vakarautaka na iVolatabu na vakatutu sa vakadinadinataki ni yaga.
YADRA!
Lolosi—Ka Mo Namaka
Na rai cava kei na ka ni veivakatovolei vakacava mera namaka o ira na lolosi tiko ni mate e dua na wekadra voleka?
