RAWA ni ora na lomada ena noda cala. E vola o Tui Tevita: “Noqu cala sa sivia na uluqu, vaka na icolacola bibi, au sa sega ni colata rawa.” (Same 38:4) Eso na lotu vaKarisito era luvuci ena levu ni rarawa, era nanuma kina ni sa sega ni vosoti ira rawa o Jiova. (2 Korinica 2:7) E dina qori? Ke o valavala ca bibi mada ga, vakacava ena vosoti iko o Jiova? Io!

O Jiova e sega ni guilecavi ira na veivutuni. Ia e vakamasuti ira ga! Ena italanoa ni gone cidroi, e vakatauvatani Jiova o Jisu me tama dauloloma e biuta nona vuvale na luvena tagane me goleva na ivakarau ni bula torosobu. Toso na gauna, sa vakatulewataka na luvena me lesu i vale. “Ni se yawa tu yani [o gone] sa raici koya mai o tamana, e lomani koya sara ga. E cici yani, mokoti koya, qai reguca.” (Luke 15:11-20) Vakacava o vinakata mo drau veiwekani voleka kei Jiova, ia o nanuma ni o “se yawa” mai vua? Me vaka na tama ena vosa vakatautauvata i Jisu, e lomani iko vakalevu o Jiova. E vinakata mo lesu mai.

Ia vakacava ke o nanuma ni sa rui bibi se sa rui levu na nomu ivalavala ca me vosota o Jiova? Yalovinaka, vakasamataka na nona veisureti ena Aisea 1:18: “‘Ni lako mada mai meda veivosaki vakadodonu,’ e kaya o Jiova. ‘Ke damudamu na nomuni ivalavala ca, ena vakavulavulataki me vaka na ucacevata.’” Io, na ivalavala ca mada ga e rairai dredre ni taqusi me vaka na iboro damudamu ena isulu vulavula, ena vosota o Jiova.

E sega ni vinakata o koya me vakararawataki iko na ca ni nomu lewaeloma. Vakacava o na rawa ni vakila na vakacegu ni vosoti iko na Kalou qai vinaka tale nomu lewaeloma? Raica mada e rua na ka e cakava o Tui Tevita. Kena imatai, e kaya: “Au na vakatusa na noqu valavala ca vei Jiova.” (Same 32:5) Nanuma tiko, e sureti iko o Jiova mo masu yani vua, mo drau “veivosaki vakadodonu.” Ciqoma na veisureti qori. Vakatusa vua na nomu ivalavala ca, talaucaka na lomamu. Ena ka e sotava o Tevita, e rawa ni masulaka: “Vakasavasavataki au mai na noqu valavala ca. . . . Na uto e kavoro qai bibivoro, kemuni na Kalou, oni na sega ni cata.”—Same 51:2, 17.

Kena ikarua, e rogoca o Tevita na nona ivakasala na italai digitaki ni Kalou, na parofita o Necani. (2 Samuela 12:13) Nikua, o Jiova e lesi ira na qase ni ivavakoso era vakavulici mera vukei ira na veivutuni mera veiwekani vinaka tale kei Jiova. Ni o raici ira na qase, era na vakayagataka na iVolatabu ra qai masu mai vu  ni lomadra me vakaceguya na lomamu, me vakamamadataka se kauta tani nomu yalolailai qai vakabulabulataki iko vakayalo.—Jemesa 5:14-16.

E macala ni sega ni rawarawa mo vakatusa nomu ivalavala ca vei Jiova, mo raici ira tale ga na qase. A va tale ga qori o Tevita. E ‘galuvaka tiko’ nona cala me dua na gauna. (Same 32:3) Ia e muri, e vakavinavinakataka na yaga ni nona vakatusa nona ivalavala ca qai vakadodonutaka nona ilakolako.

E yaga vakalevu vei Tevita ni vakila tale na marau. E vola: “E marau o koya sa vosoti na nona cala, sa ubi na nona ivalavala ca.” (Same 32:1) E masulaka tale ga: “I Jiova, ni dolava na tebenigusuqu, me tukuna yani na gusuqu na kemuni lagilagi.” (Same 51:15) E uqeti koya sara ga me tukuni Jiova ni marau ni sa vinaka tale nona lewaeloma qai vakavinavinakataka na nona veivosoti.

E vinakata o Jiova mo marautaka na lewaeloma savasava. E vinakata tale ga mo tukuni koya kei na nona inaki ena lomavakacegu kei na marau levu, sega ena ora ni lomamu. (Same 65:1-4) Kua ni guilecava na nona veisureti ‘me bokoca nomu ivalavala ca, me kauta mai [o koya] na gauna ni veivakabulabulataki.’—Cakacaka 3:19.

Qori na ka e vakila o Martha. E kaya: “E dau vakauta mai o luvequ tagane na Vale ni Vakatawa kei na Yadra! Vakamalua, keirau sa veikilai tale kei Jiova. Na ka dredre duadua meu cakava, oya meu kerea me vosoti na noqu ivalavala ca kece. Ia au qai masuta na Kalou me vosoti au. E dredre meu vakabauta ni sa oti e 40 na yabaki au qai lesu vei Jiova. Na ka au sotava e vakadinadinataka ni se rawa tiko ga ni mai qarava tale na Kalou e dua qai tiko tale ena nona loloma, ni sa oti mada ga e vica vata na yabaki.”