iKarua ni Samuela 12:1-31
12 E talai Necani+ sara vei Tevita o Jiova. E lako yani vua,+ e kaya: “E rua na tamata erau tiko ena dua na koro, e dua e vutuniyau, e dua tale e dravudravua.
2 Na tamata vutuniyau e levu sara na nona sipi kei na bulumakau,+
3 ia e sega na ka vua na tamata dravudravua, e dua ga na lami yalewa lailai a volia mai.+ E susuga, e tubucake kei koya vaka kina o ratou na luvena tagane. E dau kania na kakana lailai e tiko vua, e gunu mai na nona bilo, e moce e ligana. E vaka sara ga na luvena yalewa.
4 Oti e lako vua na tamata vutuniyau e dua na vulagi, ia e sega ni taura e dua na nona sipi kei na bulumakau me vakarautaka e dua na kakana vua na vulagi e lako yani vua. E kauta ga na nona lami na tamata dravudravua qai vakarautaka vua na tamata e lako yani vua.”+
5 E katakatataka sara ga o Tevita na tamata oya, e kaya vei Necani: “Me vaka ni bula dina tiko o Jiova,+ e dodonu me mate na tamata e cakava qo!
6 Me sauma sara ga vakava na lami,+ ni cakava qo qai sega ni veinanumi.”
7 E qai kaya vei Tevita o Necani: “O kemuni sara ga na tamata oya! Qo na ka e tukuna o Jiova na Kalou ni Isireli: ‘Au lumuti iko sara ga mo tui Isireli,+ au vakabulai iko mai na liga i Saula.+
8 Au tu vakarau meu solia vei iko na vuvale ni nomu turaga,+ meu soli ira na wati nomu turaga+ e ligamu, meu solia tale ga vei iko na vuvale ni Isireli kei Juta.+ Ke sega ni veirauti qori, au tu vakarau meu vakaikuritaka vei iko.+
9 Na cava o beca kina na vosa i Jiova mo cakava na ka ca e matana? O mokuti Uraia na Itaiti ena iseleiwau!+ O qai tauri watina me watimu+ ni o vakamatei koya oti ena nodra iseleiwau na Amoni.+
10 Ia qo ena sega sara ni yali mai na nomu vuvale na iseleiwau,+ ni o beci au mo kauta na wati Uraia na Itaiti me watimu.’
11 Qo na ka e tukuna o Jiova: ‘Au na vakatubura na ca mai na nomu vuvale,+ au na kauti ratou na watimu e matamu meu solia vua e dua tale na tagane,*+ ena mocevata kei ratou na watimu ena sigalevu tutu.*+
12 O a cakacaka lo,+ ia au na cakava na ka qo e matadra na Isireli kece ena sigalevu tutu.’”
13 E qai kaya o Tevita vei Necani: “Au sa valavala ca vei Jiova.”+ E kaya o Necani vei Tevita: “Sa vosota tale ga o Jiova na nomu ivalavala ca.+ O na sega ni mate.+
14 Ia ni o beci Jiova dina ena ka qo, ena mate sara ga na luvemu tagane se qai sucu.”
15 E lako sara ina nona vale o Necani.
E qai tara o Jiova na gone e vakasucuma o wati Uraia vei Tevita mani tauvimate.
16 E vakamasuta na Kalou dina o Tevita ena vuku ni gone. E lolo o Tevita, e lako yani qai davo ena qele+ me yacova na mataka.
17 Era lai tu e yasana na qase ni nona vuvale, era saga mera vakaduri koya mai na qele, ia e bese, e sega ni via kana vata kei ira.
18 E qai mate na gone ena ikavitu ni siga, ia era rere ni tukuna vei Tevita na nona dauveiqaravi ni sa mate na gone. Era kaya: “Ni se bula na gone eda vosa vua, e sega ni rogoci keda. Eda na tukuna vakacava vua ni sa mate na gone? De vakayacora o koya e dua na ka ca.”
19 Ni raica o Tevita nira vakasolokakana tiko na nona dauveiqaravi, e kila sara ni sa mate na gone. E kaya o Tevita vei ira na nona dauveiqaravi: “Sa mate na gone?” Era sauma: “Sa mate o koya.”
20 E tucake sara mai na qele o Tevita. E sisili, e lumulumu ena waiwai,+ e veisautaka na nona isulu, e lako ina vale+ i Jiova qai cuva vakatoboicu. Oti e lako ina nona vale* qai kerea me kau mai vua na kakana, e kana sara.
21 Era tarogi koya na nona dauveiqaravi: “Na cava oni cakava kina qo? Ni se bula na gone, oni lolo oni tagi tiko, ia ni mate ga na gone oni tucake moni kana.”
22 E kaya o koya: “Ni se bula na gone, au a lolo+ au tagi tiko, niu kaya e lomaqu, ‘O cei e kila de lomani au o Jiova me bula na gone?’+
23 Ia qo ni sa mate, na cava meu lolo tiko kina? Au na rawa ni vakalesui koya tale mai?+ Au na lako vua,+ ia ena sega ni lesu mai vei au o koya.”+
24 E qai vakacegui Pacisepa+ na watina o Tevita. E lako vua me rau mocevata. Toso na gauna e vakasucuma e dua na luvena tagane o Pacisepa, e vakatokai me o Solomoni.*+ E lomani koya o Jiova,+
25 qai talai Necani+ na parofita me vakatoka na gone me o Jititia,* ena vuku i Jiova.
26 Ia o Joapi e valuti Rapa+ tiko ga na nodra na Amoni,+ e vakadruka na koroturaga ni matanitu.*+
27 E talatala sara o Joapi vei Tevita, e kaya: “Au sa valuti Rapa,+ au sa vakadruka na koro ni wai.*
28 Mo kumuni ira mai na vo ni sotia moni keba ena koro moni vakadruka. Deu ravuta na koro au qai rogo kina.”*
29 E kumuni ira sara na sotia kece o Tevita ra qai lako i Rapa mera valuta, era mani vakadruka.
30 E kauta o koya na isalanitui mai na ulu i Malikami.* Na kena bi e dua na taledi* koula, e toka kina na vatutalei qai vakaisala kina o Tevita. E kauta tale ga e levu sara na itokinivalu+ mai na koro.+
31 E kauti ira yani na tamata era tiko kina qai vakacakacakataki ira mera varo vatu, mera cakava na iyaya kaukamea gata kei na matau kaukamea, mera buli biriki. Qori na ka e cakava o koya ena nodra koro kece na Amoni. Oti e lesu o Tevita kei ira kece na sotia i Jerusalemi.
iVakamacala e ra
^ Se “vua na wekamu.”
^ Ipe., “mata ni siga qo.”
^ Se “valenitui.”
^ Ena vosa vakaIperiu e kena ibalebale “Vakacegu.”
^ Kena ibalebale “Lomana o Ja.”
^ Se “na koro ni matanitu.”
^ Rairai dusia na ivurevure ni wai ena koro.
^ Ipe., “vakatokai ena yacaqu.”
^ Kena irairai ni dua na nodra kalou matakau na Amoni, ena so tale na vanua e vakatokai me o Moleke se Milikomi.
