Raica sara na lewena

Raica na lewenivola

 WASE 5

Lesu Vua na “iVakatawanisipi kei na iVakatawa ni Nomuni Bula”

Lesu Vua na “iVakatawanisipi kei na iVakatawa ni Nomuni Bula”

Vakacava, o sotava tiko eso na ituvaki e vakamacalataki ena ivola qo? Ke vaka kina, kua ni yalolailai. Era sotava tale ga qori e levu na dauveiqaravi yalodina ni Kalou ena gauna vakaivolatabu kei na noda gauna. O Jiova e vukei ira mera vorata na ituvaki qori, ena vukei iko tale ga.

“Au vakadinadinataka ni sega ni biuti au o Jiova, e dodonu ga meu sasaga lesu vua

 MO KILA tiko ni na tokoni iko o Jiova ni o lesu vua. Ena vukei iko mo vosota nomu nuiqawaqawa, me oti nomu yalolailai, me vakacegu nomu vakasama kei na lomamu ni savasava nomu lewaeloma. O na rawa ni uqeti tale mo qaravi Jiova kei ira na tacimu. O na vaka eso na lotu vaKarisito ena imatai ni senitiuri e vola vei ira na yapositolo o Pita: “Oni a vaka tu na sipi lako sese, ia qo oni sa lesu vua na ivakatawanisipi kei na ivakatawa ni nomuni bula.”—1 Pita 2:25.

Na ka vinaka duadua mo cakava, mo lesu vei Jiova. Na vuna? O na vakamarautaka na lomana. (Vosa Vakaibalebale 27:11) O kila ni dau tarai Jiova na ka eda cakava. E macala ga ni sega ni vakasaurarataki keda meda lomani koya da qai qaravi koya. (Vakarua 30:19, 20) E tukuna e dua na dauvakadidike ni iVolatabu: ‘E sega ni vakasaurarataka na lomada o Jiova meda qaravi koya, e solia ga vei keda na galala ni vakatulewa.’ Nida cakava qori, eda sa solia vua e dua na iloloma talei, noda yalodina, qori e vakamarautaka sara ga na lomana. Io, e sega ni vakatauvatani rawa noda marau nida qaravi koya.—Cakacaka 20:35; Vakatakila 4:11.

Ni o tomana tale nomu sokalou, ena vakacegui nomu bula vakayalo. (Maciu 5:3) Ena sala cava? Era dau lomatarotarotaka e levu ena veiyasa i vuravura, ‘Cava eda mai tu kina eke?’ Era vinakata me saumi nodra lomatarotaro me baleta na inaki ni noda bula. E buli keda o Jiova meda vakaceguya noda bula vakayalo. E buli keda tale ga meda marautaka noda qaravi koya. Koya e bibi duadua, eda sokaloutaki Jiova baleta nida lomani koya.—Same 63:1-5.

Nanuma tiko ni vinakata o Jiova mo lesu vua. O na vakadeitaka vakacava? Vakasamataka na levu ni masu me vakarautaki vinaka kina na ivola qo. E rairai solia vei iko e dua na qase lotu vaKarisito se dua na tacimu vakayalo. O uqeti mo wilika qai muria na itukutuku e tiko kina. Qori kece na ivakadinadina ni sega ni guilecavi iko o Jiova. E vagolei iko mai vakamalua mo lesu vua.—Joni 6:44.

Eda lomavakacegu nida kila ni sega ni guilecavi ira nona dauveiqaravi era yali o Jiova. Qori na ka e marautaka na tacida yalewa o Donna. E kaya: “Au ciri tani vakamalua mai na dina, ia au dau vakananuma na Same 139:23, 24, e tukuna: ‘Kemuni na Kalou, ni dikevi au moni kila na lomaqu. Digovi au, moni kila na nuiqawaqawa ni noqu vakanananu. Moni raica ke tiko e lomaqu e dua na gagadre ca, qai tuberi au ena sala ni bula tawamudu.’ Au kila ni sega ni dodonu meu tiko mai vuravura, niu vulagi kina, au kila ni dodonu ga meu tiko ena isoqosoqo i Jiova. Au vakadinadinataka ni sega ni biuti au o Jiova, e dodonu ga meu sasaga lesu vua. Au marau niu cakava qori!”

Ena tokoni iko o Jiova ni o lesu vua

E neitou masu ni o na vakila tale “na marau e solia o Jiova.” (Niemaia 8:10) O na sega ni veivutunitaka nomu lesu vua.