Ererimbot Oro Ubuene Mîdidụhe Ekpere

MME ndise oro ẹwụtde nte Paradise editiede, utọ nte enye oro odude ke ikpaedem magazine emi, ẹsidemede mme ubuene udọn̄. Akpa eren ye n̄wan, Adam ye Eve, ẹkedụn̄ ke Paradise. In̄wan̄ Eden ekedi ebietidụn̄ mmọ. (Genesis 2:7-23) Okposụkedi ẹkeduọkde Paradise oro, ndinịm ke Paradise oyodu ke ini iso—ke obufa ererimbot oro ubuene mîdidụhe—idịghe ikpîkpu ndap. Enye enen̄ede ọkọn̄ọ ke mme un̄wọn̄ọ Bible.

Kere ban̄a en̄wọn̄ọ oro Jesus Christ ọkọn̄wọn̄ọde ke akpatre usen uwem esie ke isọn̄. Kiet ke otu abiatibet oro ẹkewotde ye Jesus ama enyene mbuọtidem ke Abasi ọyọkọk mme mfịna ubonowo. Enye ọkọdọhọ ete: “Jesus, ti mi ke ini afo odụkde ke obio ubọn̄ fo.” Ikọ emi owụt ke abiatibet oro ama enịm ke Jesus ayakara nte Edidem ye nte ke ẹyenam mme akpan̄kpa ẹset. Jesus ama ọbọrọ enye ete: “Ke akpanikọ ke ndọhọ fi mfịn emi, Afo oyodu ye ami ke Paradise.”—Luke 23:42, 43.

Bible etịn̄ aban̄a mbon oro ẹdidụn̄de ke Paradise ete: “Mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄-vine, ẹnyụn̄ ẹdia mfri mmọ.” (Isaiah 65:21) Ih, “mmọ ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe: koro edi inua Jehovah mme udịm ọdọhọ.”—Micah 4:4.

Nte ededi, ntak emi ẹyakde mme owo ẹbuene idahaemi? Nso un̄wam ke Abasi ọnọ mme ubuene? Ini ewe ke ubuene editre?

Ntak Emi Ẹyakde Mme Owo Ẹbuene?

Adam ye Eve ẹketaba Paradise oro mmọ ẹkedụn̄de ke ntak nsọn̄ibuot oro idiọk angel, Satan kpa Devil, ọkọtọn̄ọde. Satan ama ada urụkikọt etịn̄ ikọ onyụn̄ anam Eve abiat ibet Abasi oro ọkọdọhọde ẹkûdia mfri eto kiet. Satan ama abian̄a Eve enịm ke imọ ndida ke idem n̄kpọn̄ Abasi ayanam imọ idu uwem oro enen̄erede ọfọn. Ke ini Eve ọkọnọde Adam mfri eto oro ẹkekpande, enye ama adia n̄ko, ntem enye ama abiat ibet Abasi man enem n̄wan esie esịt.—Genesis 3:1-6; 1 Timothy 2:14.

Nte enende, ẹma ẹbịn ọsọn̄ibuot akpa eren ye n̄wan oro ẹsio ke Paradise, ndien ọtọn̄ọde ke ini oro mmọ ẹkenyene ndikọrọde nsịme mbemiso ẹdade ubọk ẹka inua. Idem tutu esịm mfịn, Jehovah ayak Satan akara anamidiọk ubonowo, anamde ẹnen̄ede ẹkụt utịp edisọn̄ ibuot ye Abasi. Mbụk ubonowo owụt ke owo ikemeke ndinam isọn̄ akabade edi Paradise. (Jeremiah 10:23) Utu ke oro, mme owo ndida ke idem n̄kpọn̄ Abasi osụn̄ọ ke mme enyene-ndịk afanikọn̄, esịnede ubuene.—Ecclesiastes 8:9.

Nte ededi, mme ubuene ẹnyene un̄wam ke ererimbot oro ọyọhọde ye afanikọn̄ mi. Ikọ Abasi eke odudu spirit,  kpa Bible, ọdọn̄ọ ntọt oro ekemede ndinọ mmọ eti ndausụn̄.

“Ẹkûtịmede Esịt”

Ke ini Jesus eketịn̄de ikọ ọnọ akwa otuowo oro ekesịnede ediwak ubuene, enye ọkọdọhọ ete: “Ẹtịm ẹse mme inuen enyọn̄, koro mmọ isuanke n̄kpasịp inyụn̄ idọkke-dọk inyụn̄ itan̄ke ibon ke ubet ubonn̄kpọ; edi Ete mbufo eke heaven ọbọk mmọ. Nte mbufo isọn̄ke urua ikan mmọ? . . . Mmọdo ẹkûtịmede esịt ẹnyụn̄ ẹdọhọ ẹte, ‘Nnyịn ididia nso?’ m̀mê, ‘Nnyịn idin̄wọn̄ nso?’ m̀mê, ‘Nnyịn idisịne nso?’ Sia kpukpru emi ẹdi mme n̄kpọ emi mme idụt ẹbịnede ye ọkpọsọn̄ udọn̄. Koro Ete mbufo eke heaven ọfiọk ke mbufo ẹmeyom kpukpru n̄kpọ emi. Ẹka iso, ndien, ndibem iso nyom obio ubọn̄ ye edinen ido esie, ndien ẹyedian kpukpru n̄kpọ eken ẹnọ mbufo.”—Matthew 6:26-33.

Ubuene inyeneke ndiyịp inọ. (Mme N̄ke 6:30, 31) Enye eyenyene se adiade edieke enye enịmde Abasi akpa ke uwem esie. Kere ban̄a se iketịbede inọ Tukiso, eren emi odụn̄de ke Lesotho, ke usụk usụk Africa. Ke 1998, udịmekọn̄ esenidụt ẹma ẹdụk Lesotho man ẹtre ekọn̄ oro ẹken̄wanade ye ukara. Ekọn̄ oro ama anam ẹbụme n̄kpọ ke mme ufọkurua onyụn̄ anam mme owo ẹtaba utom mmọ, ndien udia ama anana etieti.

Tukiso okodụn̄ ke ikpehe ibuot obio oro mme owo ẹkebuenede etieti. Ediwak mbọhọidụn̄ esie ẹma ẹbụme n̄kpọ ke mme ufọkurua man ẹnyene se ẹdade ẹdu uwem. Ke ini Tukiso ọkọnyọn̄de edidụk ufọk esie emi ekedide ubet kiet kpọt, enye ama okụt ediwak n̄kpọ emi Maseiso, n̄wan emi enye akadade odụn̄, okobụmede. Tukiso ama ọdọhọ enye ete, “Tan̄ mme n̄kpọ emi wọrọ an̄wa,” anamde an̄wan̄a ke ibet Abasi akpan uyịpinọ. Maseiso ama enyịme. Mbọhọidụn̄ ẹma ẹsak mmọ nsahi ẹnyụn̄ ẹtan̄ udia oro Maseiso okobụmede.

Tukiso ikenyịmeke ndida mme n̄kpọ mbụme oro ke ntak se Mme Ntiense Jehovah ẹkekpepde enye ke Bible. Ndi enye ama akpa biọn̄ ke ntak emi enye ekenịmde ibet Abasi? Baba-o. Esisịt ini ke oro ebede, mbiowo esop Mme Ntiense Jehovah oro Tukiso esidụkde mbono esop ẹma ẹda udia ẹsọk enye. Kamse, Mme Ntiense Jehovah ke South Africa ẹma ẹnọ n̄kpọ un̄wam ẹwakde ẹbe tọn iba ẹda ẹn̄wam nditọete mmọ ke Lesotho. Tukiso ndikosụk ibuot nnọ Abasi ọkọrọ ye ima ima un̄wam oro esop ọkọnọde ama enen̄ede otụk Maseiso. Enye n̄ko ama ọtọn̄ọ ndikpep Bible. Ke akpatre, mmọ mbiba ẹma ẹdọ ndọ nte ekemde ye ibet ẹnyụn̄ ẹdot ndina baptism nte Mme Ntiense Jehovah. Mmọ ẹka iso ndisọn̄ọ nda nnam n̄kpọ Abasi.

Jehovah Abasi ekere aban̄a mme ubuene. (Se ekebe oro “Didie ke Abasi Ese Mme  Ubuene?”) Ke ntak ima, enye anam ndutịm man ẹn̄wam mme owo nte Tukiso ye Maseiso ẹkpep n̄kpọ efen efen ẹban̄a imọ. Ke Ikọ esie, enye ọnọ eti item oro ẹkemede ndida ndu uwem ke usen ke usen.

Eti Ndutịm

Mme Ntiense Jehovah ẹsidomo kpukpru ini ndise mme ubuene nte Abasi esede. (Galatia 2:10) Ediwak ini, ke ini afanikọn̄ etịbede ke idụt ekededi ndien enye otụk ata mme Christian, ẹsinam ndutịm man ẹnọ un̄wam oro ẹyomde. Ke edide akpan n̄kpọ akan, Mme Ntiense ẹsikere ẹban̄a se mme owo, esịnede mme ubuene, ẹnen̄erede ẹyom ke n̄kan̄ eke spirit. (Matthew 9:36-38) Ke isua 60 oro ẹbede, ediwak tọsịn mme asan̄autom oro ẹnọde ukpep ẹnyịme ndinam utom nte mme isụn̄utom ke esenidụt. Ke uwụtn̄kpọ, ebe ye n̄wan ẹdide isụn̄utom emi ẹtode Finland ẹma ẹkpep usem Sesotho; mmọ ẹkekpep Tukiso ye Maseiso n̄kpọ ẹkabade ẹdi mme mbet Jesus. (Matthew 28:19, 20) Utom isụn̄utom esiwak ndibuana edikpọn̄ inem uwem ke idụt uforo n̄wọrọ n̄ka idụt oro ebuenede.

Ata mme Christian iyịpke inọ ke ntak ẹbuenede man ẹnyene se ẹdade ẹdu uwem. Utu ke oro, mmọ ẹnyene mbuọtidem ke Jehovah Abasi ọyọnọ mmimọ se iyomde. (Mme Hebrew 13:5, 6) Usụn̄ kiet emi Jehovah esede aban̄a ikọt esie edi ndida mme andituak ibuot nnọ enye emi ẹnamde esop ofụri ererimbot ẹnyụn̄ ẹkerede ẹban̄a kiet eken, n̄n̄wam ikọt esie.

Usụn̄ en̄wen oro Jehovah an̄wamde mme ubuene edi ndinọ mmọ eti item ke nte ẹkpedude uwem ke usen ke usen. Ke uwụtn̄kpọ, Bible owụk ete: “Yak eyịp inọ okûyịp aba, edi  utu ke oro yak enye anam ọkpọsọn̄ utom, ada ubọk esie anam eti utom, man enye ekpenyene n̄kpọ ndideme nnọ owo eke odude ke unana.” (Ephesus 4:28) Ediwak owo oro mîkenyeneke utom ẹnọ idemmọ utom, ẹnamde ọkpọsọn̄ utom nte utọin̄wan̄ ẹnyụn̄ ẹtọ ikọn̄ efere ke in̄wan̄esa. Bible n̄ko an̄wam mme ubuene ndifam okụk, ekpepde mmọ ndifep ndiọi edu, utọ nte edin̄wọn̄ ọkpọsọn̄ mmịn mbe ubọk.—Ephesus 5:18.

Ererimbot Oro Ubuene Mîdụhe —Ini Ewe?

Bible owụt ke nnyịn idu uwem ke “mme akpatre usen” ukara Satan. (2 Timothy 3:1) Ibịghike, Jehovah Abasi ọyọnọ Jesus Christ edi edibiere ikpe ọnọ ubonowo. Nso iditịbe ini oro? Jesus ama ọbọrọ mbụme emi ke uwụtn̄kpọ esie kiet. Enye ọkọdọhọ ete: “Ke ini Eyen owo edidide ke ubọn̄ esie, kpukpru mme angel ẹnyụn̄ ẹsan̄a ye enye, ndien enye oyosụhọde etetie ke ebekpo ubọn̄ esie. Ndien ẹyebon kpukpru mme idụt ke iso esie, enye oyonyụn̄ abahade mme owo kiet ye eken, kpa nte ekpemerọn̄ abaharede erọn̄ ye ebot.”—Matthew 25:31-33.

Erọn̄ oro ẹtịn̄de ẹban̄a ke uwụtn̄kpọ emi ada aban̄a mme owo oro ẹnyịmede Jesus nte edidem. Jesus ekemen mmọ odomo ye erọn̄ koro mmọ ẹtiene enye nte Andikpeme mmọ. (John 10:16) Mbon mbieterọn̄ emi ẹyenyene uwem ke mfọnmma ukara Jesus. Uwem eyenem etieti ke obufa ererimbot oro ubuene mîdidụhe. Ẹyesobo mbon mbietebot, mme owo oro ẹsịnde ukara Jesus, ke nsinsi nsinsi.—Matthew 25:46.

Obio Ubọn̄ Abasi eyetre idiọkido. Ubuene ididụhe aba. Utu ke oro, mme owo oro ẹmade ẹnyụn̄ ẹkerede ẹban̄a kiet eken ẹdidụn̄ ke isọn̄. Ima oro Mme Ntiense Jehovah ẹmade idemmọ nte otu nditọete ofụri ererimbot owụt ke obufa ererimbot eyenen̄ede odu, koro Jesus ọkọdọhọ ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.”—John 13:35.

[Ekebe/Mme ndise ke page 6, 7]

DIDIE KE ABASI ESE MME UBUENE?

Bible ọdọhọ ke Andibot ubonowo edi enye emi “ọnọde mbon ọ-biọn̄ udia.” (Psalm 146:7) Se iwakde ibe ufan̄ikọ Bible ikie ẹwụt ke Abasi ekere aban̄a mme ubuene.

Ke uwụtn̄kpọ, ke ini Jehovah ọkọnọde idụt Israel eset Ibet, enye ama owụk nditọ Israel oro ẹkedide mme ọtọin̄wan̄ ete ẹkûkpen̄e inụk in̄wan̄ mmọ ẹma. Mmọ ikenyeneke nditet kpukpru mfri ke in̄wan̄ olive m̀mê ndifiak n̄katan̄ mfri ke in̄wan̄ vine mmọ. Mbet emi ẹkedi ima ima ndutịm oro ẹkenamde ẹnọ isenowo, nditọakpa, mme ebeakpa, ye mbon ukụt.—Leviticus 19:9, 10; Deuteronomy 24:19-21.

Akan oro, Abasi ama owụk nditọ Israel ete: “Ẹkûfịk baba ebe-akpa, ye eyen-akpa. Edieke afo efịkde enye, enye onyụn̄ eseme ọnọ mi, nditreke ndikop eseme esie; iyatesịt mi oyonyụn̄ obụmede, ndien nyowot mbufo ke ofụt; iban mbufo ẹyenyụn̄ ẹdi mme ebe-akpa, nditọ mbufo, nditọ-akpa.” (Exodus 22:22-24) Edi n̄kpọ mfụhọ nditịn̄ nte ke ediwak nditọ Israel oro ẹkedide imọ owo ikenịmke ewụhọ emi. Jehovah Abasi ama ada mme prọfet esie ọnọ nditọ Israel ekese item aban̄a ewụhọ oro mmọ ẹkefụmide ye ndiọi n̄kpọ eken oro mmọ ẹkenamde. (Isaiah 10:1, 2; Jeremiah 5:28; Amos 4:1-3) Ke akpatre, Abasi ama anam mbon Assyria ẹkan idụt Israel ekem anam mbon Babylon ẹkan mmọ n̄ko. Ẹma ẹwot ediwak nditọ Israel, ẹnyụn̄ ẹtan̄ mbon oro ẹkebọhọde ẹka ntan̄mfep ke esenidụt.

Jesus Christ, edima Eyen Abasi, ama owụt ke imekere iban̄a mme ubuene kpa nte Ete imọ ekerede aban̄a. Ke ini akanamde uduak utom ukwọrọikọ esie an̄wan̄a, Jesus ọkọdọhọ ete: “Spirit Jehovah odoro mi ke idem, koro enye ama eyet mi aran enịm ete ntan̄a eti mbụk nnọ mme ubuene.” (Luke 4:18) Emi iwọrọke ke Jesus ekesikwọrọ ikọ ọnọ mme ubuene kpọt. Enye ama ada ima ima usụn̄ an̄wam mme imọ owo n̄ko. Nte ededi, ke ini Jesus akan̄wamde mme imọ owo, enye ama esiwụt ke imekere iban̄a mme ubuene. Ke uwụtn̄kpọ, enye ama eteme owo inyene kiet ete: “Nyam kpukpru n̄kpọ emi afo enyenede deme nọ mme ubuene, ndien afo eyenyene n̄kpọuto ke heaven; nyụn̄ ditiene mi.”—Luke 14:1, 12-14; 18:18, 22; 19:1-10.

Jehovah Abasi ye Eyen esie ẹnen̄ede ẹkere ẹban̄a mme ubuene. (Mark 12:41-44; James 2:1-6) Ke ntak oro Jehovah ekerede aban̄a mme ubuene, enye eti ediwak miliọn ubuene oro ẹma ẹkekpan̄a. Ẹyenam kpukpru utọ mbon oro Jehovah etide do ẹset ẹdidu uwem ke obufa ererimbot oro ubuene mîdidụhe.—Utom 24:15.

[Mme ndise]

Ima oro Mme Ntiense Jehovah ẹmade idemmọ nte otu nditọete ofụri ererimbot owụt ke obufa ererimbot eyenen̄ede odu

[Ndise ke page 5]

Tukiso ye Maseiso ẹda ye isụn̄utom oro ekekpepde Tukiso Bible

[Ndise ke page 5]

Maseiso ada ke enyịnusụn̄ ufọk esie ye isụn̄utom oro ekekpepde enye Bible