Ndibọp Ubon Oro Ọsọn̄de Idem ke N̄kan̄ eke Spirit
Ndibọp Ubon Oro Ọsọn̄de Idem ke N̄kan̄ eke Spirit
“Ẹkama mmọ ke ntụnọ ye item Ọbọn̄.”—EPHESUS 6:4.
1. Nso ikedi uduak Abasi inọ ubon, edi utu ke oro nso iketịbe?
“MBUFO ẹtọt, ẹnyụn̄ ẹwak, ẹnyụn̄ ẹyọhọ ke isọn̄.” (Genesis 1:28) Jehovah Abasi ọkọtọn̄ọ ndutịm ubon ke ini enye eketịn̄de mme ikọ emi ọnọ Adam ye Eve. (Ephesus 3:14, 15) Ke ẹsede ini iso, akpa ebe ye n̄wan oro ẹkeme ndikụt nte isọn̄ ọyọhọde ye nditọ mmọ—ntatara ubon mme mfọnmma owo oro ẹdụn̄de idara idara ke paradise isọn̄ ẹnyụn̄ ẹdianade kiet ẹtuak ibuot ẹnọ Akwa Andibot mmọ. Edi Adam ye Eve ẹma ẹduọ ẹdụk idiọkn̄kpọ, ndien ndinen owo emi ẹbakde Abasi ikọyọhọke isọn̄. (Rome 5:12) Utu ke oro, uwem ubon ama ọsọsọp odụk idiọk idaha, ndien usua, afai, ye unana “ima uduot owo” ẹtara, akpan akpan ke “ukperedem ini” emi.—2 Timothy 3:1-5; Genesis 4:8, 23; 6:5, 11, 12.
2. Adam ẹkenyene ukeme ndinam nso, edi nso ke ẹdiyom man ẹbọp ubon oro ọsọn̄de idem ke n̄kan̄ eke spirit?
2 Ẹkebot Adam ye Eve ke mbiet Abasi. Okposụkedi ekedide anamidiọk idahaemi, Jehovah ama ayak Adam obon nditọ. (Genesis 1:27; 5:1-4) Ukem nte ete mmọ, nditọ Adam ẹma ẹnyene ukeme ido uwem ẹnyụn̄ ẹkeme ndikpep ndidiọn̄ọ se inende ye se ikwan̄ade. Ẹma ẹkeme ndikpep mmọ nte ẹkpetuakde ibuot ẹnọ Andibot mmọ ye nte edide akpan n̄kpọ mmọ ndima enye ke ofụri esịt, ukpọn̄, ekikere, ye odudu mmọ. (Mark 12:30; John 4:24; James 1:27) N̄ko-n̄ko, ẹma ẹkeme ndikpep mmọ “ndinam se inende, nnyụn̄ mma ima Abasi, nnyụn̄ nsụk idem nsan̄a ye Abasi.” (Micah 6:8) Nte ededi, nte mme anamidiọk, oyoyom mmọ ẹnọ ekese ntịn̄enyịn man ẹbọp ubon oro ọsọn̄de idem ke n̄kan̄ eke spirit.
Dedep Ifet
3. Didie ke mme ete ye eka ẹkeme ‘ndidep ifet’ ndibọk nditọ ẹkabade ẹdi mme Christian?
3 Ke awak-n̄kukọhọ ndiọkeyo emi, ẹnyene ndisịn ọkpọsọn̄ ukeme man nditọ ẹkabade ẹdi mme ‘andima Jehovah’ emi ẹnen̄erede “ẹsua idiọk ido.” (Psalm 97:10) Mme ete ye eka oro ẹnyenede eti ibuot ‘ẹyedep ifet’ man ẹsịm n̄kpọ-ata emi. (Ephesus 5:15-17) Edieke afo edide ete m̀mê eka, didie ke afo ekeme ndinam emi? Akpa, nịm mme n̄kpọ oro ẹdide ebeiso n̄kpọ, ọnọde ntịn̄enyịn ke “se ifọnde ikan,” esịnede editeme ye edinọ nditọ fo ukpep. (Philippi 1:10, 11) Ọyọhọ iba, nam usụn̄ uwem fo edi mmemmem. Afo emekeme ndisịk mme edinam oro mînen̄ekede idi se ẹyomde nnịm. Mîdịghe ekeme ndiyom afo ọduọn̄ọ mme inyene oro mîdịghe se ẹyomde oro ẹsidade ini ndikpeme. Nte ete m̀mê eka oro edide Christian, tutu amama afo udutuaha n̄kpọfiọk nte ke afo ama esịn ukeme oro ẹyomde ndibọk nditọ oro ẹbakde Abasi.—Mme N̄ke 29:15, 17.
4. Didie ke ẹkeme ndinam ubon adiana kiet?
4 Ndibiat ini ye nditọ mbufo, akpan akpan ke ini ẹkọn̄ọde ke mme n̄kpọ eke spirit, etịm odot ye ukeme oro ẹsịnde onyụn̄ edi kiet ke otu mme mfọnn̄kan usụn̄ ndinam ubon adiana kiet. Edi kûyak emi unịm tutu enyenyene ifet. Diomi ndusụk ini oro mbufo ẹdibiatde ọtọkiet. Emi iwọrọke sụk ndidu ke ukem ufọk, owo kiet kiet anamde n̄kpọ idemesie. Nditọ ẹsinen̄ede ẹkọri ke ini ẹnọde mmọ ọkpọkpọ ntịn̄enyịn ke usen ke usen. Oyom ẹwụt ima ye edikere mban̄a ke ntatubọk. Idem mbemiso mmọ ẹbierede ndinyene nditọ, mme ọdọ ndọ ẹkpenyene ndinen̄ede n̄kere mban̄a akpan mbiomo emi. (Luke 14:28) Ekem mmọ idisehe edibọk nditọ nte ọkpọsọn̄ utom. Utu ke oro, mmọ ẹdise enye nte ifetutom oro asan̄ade ye edidiọn̄.—Genesis 33:5; Psalm 127:3.
Da Ikọ ye Uwụtn̄kpọ Nọ Ukpep
5. (a) Ndikpep nditọ ndima Jehovah esitọn̄ọ ye nso? (b) Nso item ke ẹnọ mme ete ye eka ke Deuteronomy 6:5-7?
5 Ndikpep nditọ fo ẹma Jehovah ọtọn̄ọ ye ima oro afo ke idemfo amade enye. Ọkpọsọn̄ ima oro afo enyenede ọnọ Abasi oyonụk fi ndinam kpukpru item esie ke edinam akpanikọ. Emi esịne ndikama nditọ “ke ntụnọ ye item Ọbọn̄.” (Ephesus 6:4) Abasi ọnọ mme ete ye eka item ete ẹnịm uwụtn̄kpọ ẹnọ nditọ mmọ, ẹneme nneme ye mmọ, ẹnyụn̄ ẹkpep mmọ n̄kpọ. Deuteronomy 6:5-7 ọdọhọ ete: “Ma ndien Abasi fo ke ofụri esịt fo, ye ke ofụri ukpọn̄ fo, ye ke ofụri odudu fo. Ndien yak mme ikọ emi ami ntemede fi mfịn emi, ẹdu fi ke esịt: nyụn̄ dọdiọn̄ siak mmọ nọ nditọ fo, nyụn̄ kama mmọ ke inua fo ke ini afo etiede ke ufọk fo, ye ke ini afo asan̄ade ke usụn̄, ye ke ini afo anade ke isọn̄, ye ke ini afo adahade ke enyọn̄.” Ebede ke edinọ item ndien ndien ye editịn̄ mfiak ntịn̄, afo emekeme ndisịn mme ewụhọ Abasi ke esịt nditọ fo. Ntem, nditọ fo ẹyekụt ima oro afo enyenede ọnọ Jehovah ndien, nte utịp, oyonụk mmọ ndikọri n̄kpet n̄kpet itie ebuana ye enye n̄ko.—Mme N̄ke 20:7.
6. Didie ke mme ete ye eka ẹkeme ndida akpanikọ oro nte ke nditọ ẹsikpep n̄kpọ ẹto uwụtn̄kpọ nnam n̄kpọ nte ọfọnde?
6 Nditọwọn̄ ẹsinyene ọkpọsọn̄ udọn̄ ndikpep n̄kpọ. Mmọ ẹsisọp ndikop nnyụn̄ n̄kụt n̄kpọ ẹsinyụn̄ ẹsọp ndikpebe uwụtn̄kpọ fo. Ke ini mmọ ẹkụtde ẹte ke afo umaha inyene obụkidem, emi an̄wam mmọ ndikpep nte ẹkpetienede item Jesus. Afo ekpep mmọ nditre nditịmede esịt mban̄a mme n̄kpọ obụkidem edi ‘ẹbem iso ẹyom Obio Ubọn̄ Abasi.’ (Matthew 6:25-33) Ebede ke ndineme eti nneme oro ọbọpde-bọp mban̄a akpanikọ Bible, esop Abasi, ye mbiowo oro ẹmekde, afo ekpep nditọ fo ndikpono Jehovah ndinyụn̄ n̄wụt esịtekọm mban̄a mme ndutịm eke spirit esie. Sia nditọ ẹsisọpde ndikụt mme edinam emi ẹkpụhọrede ẹkpọn̄ se ẹketịn̄de, item ekpenyene ndisan̄a ye ido ye edu edinam oro ẹwụtde ntotụn̄ọ esịtekọm oro afo enyenede aban̄a mme n̄kpọ eke spirit. Nso edidiọn̄ ke edi ntem ke ini mme ete ye eka ẹkụtde ke eti uwụtn̄kpọ mmimọ anam nditọ mmimọ ẹma Jehovah ke ofụri esịt!—Mme N̄ke 23:24, 25.
7, 8. Nso uwụtn̄kpọ iwụt ufọn edinọ nditọ ukpep toto ke ntọn̄ọ ntọn̄ọ isua emana, ndien anie odot itoro kaban̄a unen oro ẹkụtde?
7 Ẹkeme ndikụt ufọn edinọ nditọ ukpep toto ke ntọn̄ọ ntọn̄ọ isua emana nto uwụtn̄kpọ kiet otode Venezuela. (2 Timothy 3:15) Enye abuana Félix ye Mayerlín, ebe ye n̄wan ẹdide n̄kparawa. Mmọ ẹdi mme asan̄autom asiakusụn̄. Ke ini Felito eyen mmọ akamanade, mmọ ẹma ẹnyene ọkpọsọn̄ udọn̄ ndinam ofụri ukeme mmọ ke ndibọk enye nte ata andituak ibuot nnọ Jehovah. Mayerlín ama ọtọn̄ọ ndikot N̄wed Mi eke Mme Mbụk Bible, oro Mme Ntiense Jehovah ẹsiode, uyo ọwọrọ nnọ Felito. Ke ntọn̄ọ ntọn̄ọ isua emana, eketie nte Felito ama ọdiọn̄ọ Moses ye mme owo eken oro ẹwụtde ke n̄wed emi.
8 Ke adan̄aemi okosụk edide ata ekpri, Felito ama ọtọn̄ọ ndinọ ikọ ntiense ke idemesie. Enye ama ọyọhọ udọn̄ esie ndikabade ndi asuanetop Obio Ubọn̄, ndien ke ukperedem enye ama ana baptism. Nte ini akakade, Felito ama akabade edi asiakusụn̄ ofụri ini. Ete ye eka esie ẹdọhọ ẹte: “Nte nnyịn isede nte eyen nnyịn anamde n̄kọri, nnyịn imọfiọk ite ke Jehovah ye item esie ẹdot itoro.”
N̄wam Nditọ Ẹkọri ke N̄kan̄ eke Spirit
9. Ntak emi nnyịn ikpowụtde esịtekọm iban̄a item eke spirit oro nnyịn ibọde ito otu asan̄autom emi anamde akpanikọ onyụn̄ enyenede ọniọn̄?
9 Ata ediwak magazine, mme n̄wed ke mme itie ikie, ye ediwak tọsịn Ndutịm Intanet ẹdu oro ẹnọde item ke nte ẹkpebọkde nditọ. Ata ediwak ini “ntọt emi ẹsidu ke ntuaha. Se ikam itịmerede owo ikan edi ke ini ntọt oro afo ekerede ke imekeme ndiberi edem edide ata ukwan̄ ntọt,” ntre ke san̄asan̄a nsiondi Newsweek oro etịn̄de n̄kpọ aban̄a nditọ ọdọhọ. Nnyịn ikop inemesịt didie ntem nte ke Jehovah ọmọnọ akpakịp n̄kpọ kaban̄a item ye n̄kọri eke spirit ubon! Nte afo emesida kpukpru ndutịm oro ẹnamde ẹbe ke otu asan̄autom emi anamde akpanikọ, onyụn̄ enyenede ọniọn̄ anam n̄kpọ nte ọfọnde?—Matthew 24:45-47.
10. Didie ke ukpepn̄kpọ Bible ubon oro enyenede uforo enyene ufọn ọnọ mme ete ye eka ye nditọ?
10 Ata akpan n̄kpọ kiet edi ukpepn̄kpọ Bible ubon ofụri ini oro enyenede iwụk, oro ẹnịmde ke idaha oro mîtiehe itọk itọk. Man ẹnam enye enyene ufọn, enyene inem, onyụn̄ akama nsịnudọn̄, eti ntịmidem edi se ẹyomde. Ebede ke ndibụp nditọ mmọ mbụme, mme ete ye eka ẹkeme ndifiọk se idude ke esịt ye ekikere mmọ. Usụn̄ kiet ndibiere m̀mê ukpepn̄kpọ ubon enyene ufọn edi ndise m̀mê kpukpru mbonubon ẹbet ukpepn̄kpọ oro ye ọkpọsọn̄ udọn̄.
11. (a) Mme utịtmbuba ewe ke mme ete ye eka ẹkeme ndin̄wam nditọ mmọ ndinịm? (b) Nso ikosụn̄ọ ke ini eyenan̄wan Japan kiet ekebịnede utịtmbuba esie?
11 Mme utịtmbuba N̄wed Abasi n̄ko ẹsitịp ẹsịn ke ubon oro ọsọn̄de idem ke n̄kan̄ eke spirit, ndien mme ete ye eka ẹkpenyene ndin̄wam nditọ mmọ ndinịm emi. Mme utịtmbuba oro ẹdotde ẹsịne edikot Bible ke usen ke usen, edikabade ndi asuanetop eti mbụk ofụri ini, ye ndinam n̄kọri mbịne uyakidem ye baptism. Mme utịtmbuba efen ẹkeme ndisịne utom uyọhọ ini nte asiakusụn̄, utom Bethel, m̀mê nte isụn̄utom. Ke adan̄aemi okodude ke ufọkn̄wed praimari, eyenan̄wan Japan ẹkotde Ayumi ama anam edi utịtmbuba esie ndinọ kpukpru owo ke ubet ukpepn̄kpọ esie ikọ ntiense. Man edemede udọn̄ andikpep ye mme nsan̄a ubet ukpepn̄kpọ esie, enye ama ọbọ unyịme ndinịm ediwak n̄wed Bible ke itie ubon n̄wed. Nte utịp, enye ama enịm ukpepn̄kpọ Bible 13 ke ọyọhọ isua itiokiet esie ke ufọkn̄wed praimari. Kiet ke otu nditọ ukpepn̄kpọ Bible oro ye mbon eken ke ubon eyen ukpepn̄kpọ emi ẹma ẹkabade ẹdi mme Christian oro ẹnade baptism.
12. Didie ke nditọ ẹkeme ndibọ n̄kponn̄kan ufọn nto mme mbono esop Christian?
12 Ndidụk mme mbono esop kpukpru ini edi akpan n̄kpọ n̄ko ọnọ nsọn̄idem eke spirit. Apostle Paul ama ọnọ mme ekemmọ andinịm ke akpanikọ item ete ‘ẹkûsịn ndisop idem ọtọkiet, nte edu ndusụk owo edide.’ Ẹyak oro okûdi edu nnyịn, koro n̄kpri ye ikpọ ukem ukem ẹsibọ ufọn akamba akamba ẹto edidụk mme mbono esop Christian kpukpru ini. (Mme Hebrew 10:24, 25; Deuteronomy 31:12) Ẹkpenyene ndikpep nditọ nditịm nnọ n̄kpan̄utọn̄. Nditịm idem nnọ mme mbono esop edi akpan n̄kpọ n̄ko, koro n̄kponn̄kan ufọn esisụn̄ọ oto editiene mbuana ọyọhọ ọyọhọ ebe ke ndibọrọ mme mbụme. Ke adan̄aemi ekpri eyen ekemede nditọn̄ọ ke nditịn̄ mme ikọ ifan̄ m̀mê ndikot ekpri ikpehe ke ikpehe ekikere, eyenen̄ede enyene ufọn edieke ẹkpepde nditọ ndidụn̄ọde nyom ibọrọ nnyụn̄ ntịn̄ mmọ ke ikọ idemmọ. Nte mbufo mme ete ye eka ẹmenịm uwụtn̄kpọ ebe ke ndisinọ nti ibọrọ kpukpru ini? Ọfọn n̄ko andibuana kiet kiet ke ubon ndinyene Bible, n̄wedikwọ, ye idem n̄wed oro ẹkamade ẹneme nneme N̄wed Abasi.
13, 14. (a) Ntak emi mme ete ye eka ẹkpenamde utom ọtọkiet ye nditọ mmọ ke an̄wautom? (b) Nso idin̄wam ndinam utom ukwọrọikọ enyene ufọn onyụn̄ edi inem inem utom ọnọ nditọ?
13 Mme ete ye eka oro ẹnyenede eti ibuot ẹyewọn̄ọde odudu ini uyen nditọ mmọ ẹsịn ke ndinam n̄kpọ Jehovah, ẹn̄wamde mmọ ndinam ukwọrọikọ edi akpan ubak uwem mmọ. (Mme Hebrew 13:15) Edi n̄kukụre ke ndisan̄a ye nditọ mmọ ke utom ukwọrọikọ ke mme ete ye eka ẹdikeme ndikụt nte ke n̄kpri nditọ mmimọ ẹbọ ukpep oro ẹyomde man ẹkabade ẹdi mme asan̄autom “eke mînyeneke ntak ndikop bụt, edi [ẹtịmde ẹsiak] ikọ akpanikọ.” (2 Timothy 2:15) Ntre, ndien, nso kaban̄a fi? Edieke afo edide ete m̀mê eka, nte afo emesin̄wam nditọ fo ẹtịm idem ẹnọ utom an̄wautom? Ndinam emi ayan̄wam ndinam utom ukwọrọikọ enyene inem, enyene se ọwọrọde, onyụn̄ on̄wụm mfri ọnọ mmọ.
14 Ntak emi mme ete ye eka ndinam utom ọtọkiet ye nditọ mmọ ke utom ukwọrọikọ enyenede ufọn? Ke usụn̄ emi, nditọ ẹkeme ndikụt nnyụn̄ n̄kpebe eti uwụtn̄kpọ ete ye eka mmọ. Ke ukem ini oro, mme ete ye eka ẹkeme ndise edu, edinam, ye ukeme nditọ mmọ. Kụt ete ke imọ imasan̄a ye nditọ fo ke nsio nsio ikpehe utom ukwọrọikọ. Edieke ekemede, nam eyen kiet kiet enyene ekpat ukwọrọikọ esie, nyụn̄ kpep enye ndinịm enye asana onyụn̄ eye. Ebede ke edinọ n̄kaiso ukpep ye nsịnudọn̄, ata esịtekọm ẹnyenede ẹnọ utom ukwọrọikọ ọyọkọri, ndien nditọ ẹyese utom ukwọrọikọ nte usụn̄ ndiwụt ima nnọ Abasi ye mbọhọidụn̄.—Matthew 22:37-39; 28:19, 20.
Ndika Iso Nsọn̄ Idem ke N̄kan̄ eke Spirit
15. Sia edimụm idaha eke spirit ubon n̄kama enen̄erede edi akpan n̄kpọ ntre, nso idi ndusụk usụn̄ ndinam emi?
15 Ubon ndika iso nsọn̄ idem ke n̄kan̄ eke spirit edi akpan n̄kpọ. (Psalm 119:93) Usụn̄ kiet ndinam emi edi ndida kpukpru ifet nneme mme n̄kpọ eke spirit ye ubon fo. Nte afo emesineme itien̄wed Bible eke usen ke usen ye mmọ? Nte edi ido fo ndibuana mme ifiọkutom an̄wautom m̀mê mme akpan n̄kpọ ẹtode mbufa magazine Enyọn̄-Ukpeme ye Awake! “ke ini afo asan̄ade ke usụn̄”? Nte afo emesiti ndikọm Jehovah ke akam mban̄a usen uwem kiet kiet nnyụn̄ mban̄a akpakịp ndutịm esie “ke ini afo anade ke isọn̄, ye ke ini afo adahade ke enyọn̄”? (Deuteronomy 6:6-9) Ke ini nditọ fo ẹkụtde nte ima oro afo enyenede ọnọ Abasi owụtde idem ke kpukpru n̄kpọ oro afo anamde, emi ayan̄wam mmọ ndinam akpanikọ edi eke mmọ.
16. Ndisịn udọn̄ nnọ nditọ ẹnam ndụn̄ọde ke idemmọ enyene nso ufọn?
16 Ke ndusụk idaha, nditọ ẹyeyom ndausụn̄ man ẹse ẹban̄a mme mfịna m̀mê mme idaha oro ẹdemerede uforo uforo. Utu ke nditeme mmọ se ẹkpenamde kpukpru ini, ntak mûwụtke mmọ nte ẹkemede ndikụt ekikere Abasi kaban̄a mme n̄kpọ ebe ke ndisịn udọn̄ nnọ mmọ ndinam ndụn̄ọde ke idemmọ? Ndikpep nditọ ndida kpukpru n̄kpọutom ye mme n̄wed oro “asan̄autom emi anamde akpanikọ” ọnọde ayan̄wam mmọ ndikọri n̄kpet n̄kpet itie ebuana ye Jehovah. (1 Samuel 2:21b) Ndien ke ini mmọ ẹbuanade mme ufọn oro mmọ ẹbọde ẹto ndụn̄ọde Bible ye mbonubon eken, emi ayaka iso nditịp nsịn ke idaha eke spirit ubon.
Beri Edem Ọyọhọ Ọyọhọ ke Jehovah
17. Ntak emi mme ete m̀mê eka oro ẹbọkde nditọ ikpọn̄ mîkpokopke iduọesịt ke edide edisịm edibọk nditọ mmọ ẹkabade ẹdi mme Christian?
17 Nso kaban̄a mme ubon oro ete m̀mê eka ikpọn̄ esede enyịn? Mmọ emi ẹsisobo mme n̄kpọ-ata efen efen ke edide edisịm edibọk nditọ. Edi mme ete m̀mê eka oro ẹbọkde nditọ ikpọn̄, mbufo ẹkûkop iduọesịt! Uwụtn̄kpọ ediwak ete m̀mê eka oro ẹbọkde nditọ ikpọn̄, emi ẹberide edem ke Abasi ẹnyụn̄ ẹsụkde ibuot ẹda item esie ẹsịn ke edinam, ẹnyụn̄ ẹbọkde nti nditọ oro ẹsọn̄de idem ke n̄kan̄ eke spirit, owụt ke ẹkeme ndikụt unen. (Mme N̄ke 22:6) Nte ededi, oyom mme Christian oro ẹdide ete m̀mê eka oro ẹbọkde nditọ ikpọn̄ ẹberi edem ke Jehovah ọyọhọ ọyọhọ. Ana mmọ ẹnyene mbuọtidem nte ke enye ọyọnọ mmimọ un̄wam.—Psalm 121:1-3.
18. Mme ewe udọn̄ eke obụk ye eke ekikere nditọ ke mme ete ye eka ẹkpenọ ntịn̄enyịn, edi ẹkpenyene ndidori nsọn̄uyo ke nso?
18 Mme ete ye eka oro ẹnyenede eti ibuot ẹfiọk ẹte ke ‘enyene ini eke ẹsakde ye ini eke ẹnekde.’ (Ecclesiastes 3:1, 4) Ini nduọkodudu ye unọ idem inemesịt oro adade ukem ukem ẹdi akpan n̄kpọ ke ndinam ikpọkidem ye ekikere eyen ọkọri. Ikwọ oro ọbọpde-bọp ndien akpan akpan ndikwọ ikwọ itoro nnọ Abasi ayan̄wam eyen ọkọri eti edu oro ekemede ndidi akpan n̄kpọ ke ndisọn̄ọ itie ebuana esie ye Jehovah. (Colossae 3:16) Ini uyen edi n̄ko ini nditịm idem ndidi akwa owo oro abakde Abasi, man ẹka iso ndikop inem uwem ke nsinsi ke paradise isọn̄.—Galatia 6:8.
19. Ntak emi mme ete ye eka ẹkemede ndinyene mbuọtidem nte ke Jehovah ọyọdiọn̄ ukeme mmimọ ke ndibọk nditọ?
19 Jehovah oyom kpukpru ubon Christian ẹkụt unen nte ọsọn̄-idem otu oro ẹkerede n̄kpọ eke spirit. Edieke nnyịn inen̄erede ima Abasi inyụn̄ inamde ofụri ukeme nnyịn ndinam Ikọ esie, enye ọyọdiọn̄ ukeme nnyịn oyonyụn̄ ọnọ nnyịn ukeme oro iyomde man itiene ndausụn̄ esie eke odudu spirit. (Isaiah 48:17; Philippi 4:13) Ti ete ke afo enyene esisịt ifet idahaemi ndinọ nditọ fo ukpep ndien udufiakke unyene ifet emi. Nam ofụri ukeme fo ndida item Ikọ Abasi nnam n̄kpọ, ndien Jehovah ọyọdiọn̄ ukeme fo ndibọp ubon oro ọsọn̄de idem ke n̄kan̄ eke spirit.
Nso ke Nnyịn Ikekpep?
• Ntak emi edidep ifet enen̄erede edi akpan n̄kpọ ke ini inọde nditọ ukpep?
• Ntak emi eti uwụtn̄kpọ ete ye eka edide se ẹyomde?
• Nso idi ndusụk akpan usụn̄ ndin̄wam nditọ ndikọri ke n̄kan̄ eke spirit?
• Didie ke ẹkeme ndimụm idaha eke spirit ubon n̄kama?
[Mme Mbụme Ukpepn̄kpọ]
[Mme ndise ke page 24, 25]
Mme ubon oro ẹsọn̄de idem ke n̄kan̄ eke spirit ẹsikpep Ikọ Abasi, ẹdụk mme mbono esop Christian, ẹnyụn̄ ẹbuana ọtọkiet ke utom ukwọrọikọ kpukpru ini