John 4;1-54
4 Ndien, ke ini Ọbọn̄ ọfiọkde ete ke mme Pharisee ẹma ẹkop ẹte ke Jesus ke anam mbet ke onyụn̄ enịm mmọ baptism+ akan John—
2 okposụkedi Jesus ke idemesie mîkenịmke owo baptism, edi edi mme mbet esie ẹkenịm—
3 enye ọkpọn̄ Judea onyụn̄ ọtọn̄ọ ntak aka Galilee.
4 Edi akana enye asan̄a ke Samaria ebe.+
5 Ekem enye edi obio Samaria emi ẹkotde Sychar emi ekperede in̄wan̄ oro Jacob ọkọnọde Joseph eyen esie.+
6 Ndien obube mmọn̄+ Jacob odu do. Edi sia Jesus ama akakpa mba ọnọ isan̄, enye osụhọde etetie ke obube mmọn̄ oro. Ekedi n̄kpọ nte ufọt uwemeyo.
7 N̄wan Samaria kiet edi ndikoi mmọn̄. Jesus ọdọhọ enye ete: “Nọ mi mmọn̄ n̄n̄wọn̄.”
8 (Koro mme mbet esie ẹma ẹdaha ẹka obio ndikedep udia.)
9 Ntem n̄wan Samaria oro ọdọhọ enye ete: “Afo emi edide Jew anam didie eben̄e mi mmọn̄, ke ini ndide n̄wan Samaria?” (Koro mme Jew isan̄ake n̄kpọ ye mbon Samaria.)+
10 Jesus ọbọrọ enye ete: “Edieke afo ọkpọfiọkde enọ mfọn+ Abasi ye owo+ emi ọdọhọde fi ete, ‘Nọ mi mmọn̄ n̄n̄wọn̄,’ afo ekpeben̄e enye, ndien enye ọkpọnọ fi odu-uwem mmọn̄.”+
11 N̄wan oro ọdọhọ enye ete: “Ete, afo ukam unyeneke bọket ndida n̄koi mmọn̄, obube mmọn̄ onyụn̄ otụn̄ọ. M̀mọ̀n̄, ndien, ke afo edida odu-uwem mmọn̄ emi?
12 Ndi afo okpon akan+ ete ete nnyịn Jacob, emi ọkọnọde nnyịn obube mmọn̄ emi, emi enye ke idemesie ọkọrọ ye nditọ esie ye mme ufene esie ẹkesin̄wọn̄de mmọn̄ ke esịt?”
13 Jesus ọbọrọ enye ete: “Kpukpru owo eke ẹn̄wọn̄de mmọn̄ emi ẹyefiak ẹkop nsatitọn̄.
14 Owo ekededi emi ọn̄wọn̄de mmọn̄ eke ndinọde enye idikopke aba nsatitọn̄ tutu amama,+ edi mmọn̄ eke ndinọde enye ayakabade edi idịm mmọn̄+ ke esịt esie emi otopde ọwọrọ ndinọ nsinsi uwem.”+
15 N̄wan oro ọdọhọ enye ete: “Ete, nọ mi mmọn̄ emi, mbak ndikop nsatitọn̄, ndinyụn̄ n̄ka iso ndi ebiet emi ndikoi mmọn̄.”
16 Jesus ọdọhọ enye ete: “Ka kokot ebe fo di.”
17 N̄wan oro ọbọrọ ete: “Nnyeneke ebe.” Jesus ọdọhọ enye ete: “Afo emetịm etịn̄ ete, ‘Nnyeneke ebe.’
18 Koro afo ama enyenyene ebe ition, ndien eren oro afo enyenede idahaemi idịghe ebe fo. Afo etịn̄ akpanikọ.”
19 N̄wan oro ọdọhọ enye ete: “Ete, mmokụt nte afo edi prọfet.+
20 Mme ete ete nnyịn ẹkesituak ibuot ke obot emi;+ edi mbufo ẹdọhọ ẹte ke Jerusalem edi ebiet emi owo akpatuakde ibuot.”+
21 Jesus ọdọhọ enye ete: “N̄wan owo, nịm mi ke akpanikọ, Ini ke edi eke mbufo mîdituakke ibuot+ inọ Ete ke obot emi m̀mê ke Jerusalem.+
22 Mbufo ẹtuak ibuot ẹnọ se mbufo mîfiọkke;+ nnyịn ituak ibuot inọ se nnyịn ifiọkde, koro edinyan̄a otode mme Jew.+
23 Edi, ini ke edi, ini oro onyụn̄ edi emi, eke ata mme andituak ibuot ẹdituakde ibuot ẹnọ Ete ke spirit+ ye ke akpanikọ,+ koro edi utọ mme owo emi ke Ete oyom ete ẹtuak ibuot ẹnọ imọ.+
24 Abasi edi Spirit,+ ndien mbon oro ẹtuakde ibuot ẹnọ enye ẹnyene ndituak ibuot ke spirit ye ke akpanikọ.”+
25 N̄wan oro ọdọhọ enye ete: “Mmọfiọk nte ke Messiah+ emi ẹkotde Christ ke edi.+ Ini ekededi oro enye edide edisịm, enye eyetịn̄ kpukpru n̄kpọ in̄wan̄-in̄wan̄ ọnọ nnyịn.”
26 Jesus ọdọhọ enye ete: “Ami emi ntịn̄de ikọ mi ye afo ndi enye.”+
27 Ndien adan̄aoro mme mbet esie ẹto ẹdisịm, idem onyụn̄ akpa mmọ koro enye enemede nneme ye n̄wan. Edi, baba owo kiet idọhọke: “Afo oyom nso?” mîdịghe, “Ntak emi afo etịn̄de ikọ ye n̄wan emi?”
28 Ndien n̄wan oro ọkpọn̄ aban̄ mmọn̄ esie adaha odụk obio ọkọdọhọ mme owo ete:
29 “Ẹdi, ẹdise owo oro asiande mi kpukpru n̄kpọ oro n̄kanamde. M̀mê enye akpakam edi Christ?”+
30 Mmọ ẹwọn̄ọ ke obio ẹdi ẹbịne enye.
31 Ke ini emi mme mbet ke ẹkpe ye enye, ẹte: “Rabbi,+ dia n̄kpọ.”
32 Edi enye ọdọhọ mmọ ete: “Mmenyene udia ndidia eke mbufo mîfiọkke.”
33 Ke ntre mme mbet ẹbụp kiet eken ẹte: “Nte owo ama ada udia ọsọk enye adia?”
34 Jesus ọbọrọ mmọ ete: “Udia+ mi edi ndinam uduak+ enye emi ọkọdọn̄de mi nnyụn̄ nnam utom esie mma.+
35 Nte mbufo idọhọke ite ke osụhọ ọfiọn̄ inan̄ mbemiso ini ukpen̄e? Sese! Ndọhọ mbufo nte: Ẹmenede enyịn ẹse in̄wan̄, ẹte n̄kpọ ẹdat se ẹkpen̄ede.+ Kan̄a ke emi
36 andikpen̄e ukpen̄e ke ọbọ n̄kpọ eyenutom onyụn̄ atan̄ mfri obon ọnọ nsinsi uwem,+ man andisuan+ ye andikpen̄e ẹkpedara ọtọkiet.+
37 Ke usụn̄ emi, ndien, ke ikọ oro edi akpanikọ ete, Owo kiet edi andisuan, enye eken onyụn̄ edi andikpen̄e.
38 N̄kosio mbufo ndọn̄ ndikpen̄e se mbufo mîkanamke utom ke esịt. Mmọ en̄wen ẹkenam utom,+ ndien mbufo ẹmedụk ndidia ufọn utom mmọ.”
39 Ndien ediwak mbon Samaria ke obio oro ẹbuọt idem+ ye enye ke ntak ikọ ntiense oro n̄wan oro eketịn̄de ete: “Enye ama asian mi kpukpru n̄kpọ oro n̄kanamde.”+
40 Ke ntre ke ini mbon Samaria ẹdide ẹbịne enye, mmọ ẹben̄e enye ẹte odu ye mmimọ; enye onyụn̄ odu do usen iba.+
41 Ntem se enye etịn̄de anam ediwak owo efen efen ẹnịm ke akpanikọ,+
42 ndien mmọ ẹdọhọ n̄wan oro ẹte: “Idịghe aba se afo eketịn̄de anam nnyịn inịm ke akpanikọ; koro nnyịn ke idem nnyịn imokop+ imonyụn̄ ifiọk ite ke akpanikọ owo emi edi andinyan̄a+ ererimbot.”
43 Ke usen iba oro ẹma ẹkebe enye ọkpọn̄ do aka Galilee.+
44 Edi, Jesus ke idemesie edi ntiense ete ke prọfet inyeneke ukpono ke obio emana esie.+
45 Ke ntre, ke ini enye esịmde Galilee, mbon Galilee ẹdara enye, koro mmọ ẹkekụtde kpukpru n̄kpọ eke enye akanamde ke Jerusalem ke ini usọrọ,+ koro mmọ n̄ko ẹma ẹka usọrọ oro.+
46 Ekem enye afiak edi Cana+ ke Galilee, ke ebiet emi enye akanamde mmọn̄ akabade wine.+ Ndien asan̄autom edidem kiet ama odu emi eyen esie eren ọkọdọn̄ọde ke Capernaum.+
47 Ke ini owo oro okopde ete Jesus ama oto Judea ebe edi Galilee, enye aka ebịne enye ekeben̄e enye ete osụhọde edi edikọk eyen imọ udọn̄ọ, koro enye ekperede ndikpa.
48 Edi, Jesus ọdọhọ enye ete: “Mbufo idinịmke ke akpanikọ, ibọhọke mbufo ẹkụt mme idiọn̄ọ+ ye mme utịben̄kpọ.”+
49 Asan̄autom edidem oro ọdọhọ enye ete: “Ọbọn̄, sụhọde di mbemiso ekpri eyen mi akpade.”
50 Jesus ọdọhọ enye ete: “Nyọn̄ okwommọ;+ eyen fo odu uwem.”+ Owo oro enịm ikọ oro Jesus eketịn̄de ọnọ enye onyụn̄ adaha esie ọnyọn̄.
51 Edi ke adan̄aemi enye osụk akade ke usụn̄, ifịn esie ẹdisobo ye enye ndisian enye ẹte ke eyen esie odu uwem.+
52 Ke ntre enye obụp mmọ ini emi enye okokopde nsọn̄idem. Ndien ẹdọhọ enye ẹte: “N̄kpọn̄ ke ọyọhọ hour itiaba* ke ufiopidem+ oro ọkọkpọn̄ enye.”
53 Ntre ke ete oro ọfiọk ke ekedi ke hour oro+ ke Jesus ọkọdọhọ imọ ete: “Eyen fo odu uwem.” Ndien enye ye ofụri ufọk esie ẹnịm ke akpanikọ.+
54 Emi n̄ko ekedi ọyọhọ idiọn̄ọ iba+ emi Jesus akanamde ke ini enye otode Judea ebe edi Galilee.
Mme Ikọ Idakisọn̄
^ Oro edi, n̄kpọ nte n̄kanika kiet uwemeyo.
