Ndidat Esịt ke Abasi Edinyan̄a Nnyịn

“Nyadara Jehovah, nyebre mban̄a Abasi edinyan̄a mi.”—HABAKKUK 3:18.

1. Daniel okokụt n̄kukụt aban̄a nso mbemiso Babylon ọkọduọde ke 539 M.E.N.?

 SE IWAKDE ikan isua duop mbemiso Babylon ọkọduọde ke 539 M.E.N., prọfet Daniel emi ama ọkọsọn̄ ama okụt aduai-owo-idem n̄kukụt. Emi ekebem iso etịn̄ aban̄a mme n̄kpọntịbe ererimbot ẹmi ẹdidade nnennen nnennen ẹsịm akpatre ekọn̄ ke ufọt mme asua Jehovah ye Edidem oro enye emekde, kpa Jesus Christ. Didie ke Daniel akanam n̄kpọ? Enye ọkọdọhọ ete: “Idem akpa mi . . . n̄kukụt oro onyụn̄ enyene mi ndyọ.”—Daniel 8:27.

2. Ewe en̄wan ke Daniel okokụt ke n̄kukụt, ndien afo ekere didie aban̄a usụn̄ nte enye asan̄ade ekpere?

² Nso kaban̄a nnyịn? Nnyịn inen̄ede idu uwem ke ata utịt ini! Didie ke nnyịn inam n̄kpọ ke ini ifiọkde ite ke en̄wan oro Daniel okokụtde ke n̄kukụt—ekọn̄ Armageddon Abasi—etịm ekpere? Didie ke nnyịn inam n̄kpọ ke ini ifiọkde ite ke idiọkido oro ẹyararede ke ntịn̄nnịm ikọ Habakkuk etịm atara tutu edi se owo mîditreke ndisobo mme asua Abasi? Eyedi ekikere nnyịn edi ukem ye eke Habakkuk ke idemesie, nte ẹtịn̄de ẹban̄a ke ọyọhọ ibuot ita ke n̄wed ntịn̄nnịm ikọ esie.

Habakkuk Ọbọn̄ Akam Oyom Mbọm Abasi

3. Habakkuk anam n̄kpeubọk aban̄a mmanie, ndien didie ke mme ikọ esie ẹkpetụk nnyịn?

³ Habakkuk ibuot 3 edi akam n̄kpeubọk. Nte ekemde ye Hab 3 ufan̄ikọ 1, ẹtịn̄ enye nte ikwọ mfụhọ m̀mê eseme. Prọfet emi anam n̄kpeubọk oro nte n̄kpọ eke edide anam aban̄a idemesie. Nte ededi, Habakkuk anam n̄kpeubọk emi ke ibuot edimek idụt Abasi. Mfịn,  n̄kpeubọk esie enyene se ọwọrọde akamba akamba ọnọ ikọt Abasi, ẹmi ẹbuanade ke utom ukwọrọikọ Obio Ubọn̄. Ke ini ikotde Habakkuk ibuot 3 ye emi ke ekikere, mme ikọ esie ẹsian nnyịn se iditịbede ẹnyụn̄ ẹnam nnyịn ikop idatesịt. N̄kpeubọk Habakkuk, m̀mê eseme, ọnọ nnyịn ọkpọsọn̄ ntak ndidat esịt ke Jehovah, kpa Abasi edinyan̄a nnyịn.

4. Ntak emi Habakkuk okokopde ndịk, ndien nnyịn ikeme ndinịm nte ke Abasi ayada odudu esie anam nso?

⁴ Nte nnyịn ima ikokụt ke ibuotikọ iba oro ẹkebemde iso, mme idaha ẹma ẹdiọk etieti ke idụt Judah ke eyo Habakkuk. Edi Abasi idiyakke idiọk idaha emi aka iso. Jehovah ayanam n̄kpọ, kpa nte enye akanamde ke ini edem. Eyịghe idụhe prọfet oro ekesemede ete: “O Jehovah, mmokop mbụk fo; ndịk anam mi”! Nso ke ikọ esie ọkọwọrọ? ‘Mbụk aban̄ade Jehovah’ ekedi mbụk oro ẹwetde-wet ẹmi ẹban̄ade n̄kpọsọn̄ edinam Abasi, utọ nte ke Ididuot Inyan̄, ke wilderness, ye ke Jericho. Habakkuk ama etịm ọfiọk mme edinam ẹmi, mmọ ẹma ẹnyụn̄ ẹnam enye ndịk koro enye ọkọfiọkde ete ke Jehovah ayafiak ada akwa odudu esie anam n̄kpọ ye mme asua esie. Ke ini nnyịn ikụtde idiọkido ubonowo mfịn, nnyịn n̄ko imọfiọk ite ke Jehovah ayanam n̄kpọ kpa nte enye akanamde ke eset. Ndi oro anam nnyịn ikop ndịk? Ke akpanikọ anam! Kpa ye oro, nnyịn ibọn̄ akam nte Habakkuk ọkọbọn̄de ete: “Demede enye utom fo ke ufọt mme isua, nam ẹfiọk enye ke ufọt mme isua; ke ini iyatesịt, ti mbọm.” (Habakkuk 3:2) Ke edikem ini Abasi, “ke ufọt mme isua,” enye akpakam ada utịbe utịbe odudu esie anam n̄kpọ. Ndien adan̄aoro, enye akpakam owụt mbon oro ẹmade enye mbọm!

Jehovah Adaha Isan̄!

5. Didie ke ‘Abasi okoto ke Teman edi,’ ndien nso ke emi owụt kaban̄a Armageddon?

⁵ Nso iditịbe ke ini Jehovah okopde nte ikpede ubọk iyom mbọm? Nnyịn ikụt ibọrọ ke Habakkuk 3:3, 4. Akpa, prọfet oro ọdọhọ ete: “Abasi okoto ke Teman, Edisana Abasi okoto ke obot Paran.” Ko ke edem ke eyo prọfet Moses, Teman ye Paran ẹkedu ke usụn̄ emi nditọ Israel ẹkesan̄ade ẹbe wilderness ẹka Canaan. Nte akwa idụt Israel akasan̄ade aka iso, eketie nte n̄kpọ eke Jehovah ke idemesie akadahade isan̄, ndien n̄kpọ ndomokiet ikekemeke ndibiọn̄ọ enye. Esisịt ini mbemiso Moses akakpade, enye ama ọdọhọ ete: “Jehovah okoto ke Sinai edi, onyụn̄ asiaha ke Seir ọnọ mmọ; enye etie ke obot Paran ayama, onyụn̄ asan̄a ye tọsịn edisana ikọt [mme angel] duop edi.” (Deuteronomy 33:2) Ke ini Jehovah edin̄wanade ye mme asua esie ke Armageddon, ukem ediwụt odudu esie oro owo mîdikemeke ndibiọn̄ọ oyodu.

6. Ke adianade ye ubọn̄ Abasi, nso ke mme Christian oro ẹnyenede ifiọk ẹkụt?

⁶ Habakkuk ọdọhọ n̄ko ete: “Ubọn̄ [Jehovah] okofụk ikpa-enyọn̄, itoro esie okonyụn̄ ọyọhọ ke isọn̄. Ndien uyama esie ebiet eyo.” Nso akwa ndise ke emi edi ntem! Edi akpanikọ, owo ikemeke ndikụt Jehovah Abasi ndu uwem. (Exodus 33:20) Nte ededi, ama edi mme anam-akpanikọ asan̄autom Abasi, enyịn esịt mmọ ayama ke ini mmọ ẹtiede ẹkere ẹban̄a ubom esie. (Ephesus 1:18) Ndien mme Christian oro ẹnyenede ifiọk ẹkụt n̄kpọ efen ke adianade ye ubọn̄ Jehovah. Habakkuk 3:4 eberi ete: “Ndụk etịbe enye ke ubọk: ndien do ke odudu esie edịbe.” Ih, nnyịn imokụt ite ke Jehovah eben̄e idem ndida ubọk nnasia ukeme ye odudu esie nnam n̄kpọ.

7. Isan̄ edikan Abasi ọwọrọ nso ọnọ mbon oro ẹsọn̄de ibuot ye enye?

⁷ Isan̄ edikan Abasi ọwọrọ nsobo ọnọ mbon oro ẹsọn̄de ibuot ye enye. Habakkuk 3:5 ọdọhọ ete: “Idiọk udọn̄ọ asan̄a enye ke iso; edisak ikan̄  onyụn̄ ọwọrọ enye ke ukot.” Ke ini nditọ Israel ẹkesan̄ade ẹkpere mme adan̄a Isọn̄ Un̄wọn̄ọ ke 1473 M.E.N., ediwak mmọ ẹma ẹsọn̄ ibuot, ẹnam use ẹnyụn̄ ẹkpono ndem. Nte utịp, se inen̄ede iwak ibe owo 20,000 ẹma ẹkpan̄a ke udọn̄ọ emi okotode Abasi. (Numbers 25:1-9) Ke n̄kpet n̄kpet ini iso, ke ini Jehovah anamde isan̄ aka “ekọn̄ akwa usen Abasi, Andikara kpukpru n̄kpọ,” mbon oro ẹsọn̄de ibuot ye enye ẹyebọ ufen idiọkn̄kpọ mmọ ukem ntre. Ata udọn̄ọ ekeme ndikam n̄wot ndusụk mmọ.—Ediyarade 16:14, 16.

8. Nte ekemde ye Habakkuk 3:6, nso ina ibet mme asua Abasi?

⁸ Ke emi kop nte prọfet oro etịn̄de in̄wan̄în̄wan̄ aban̄a nte Jehovah mme udịm odude ke edinam. Ke Habakkuk 3:6, nnyịn ikot ite: “Enye [Jehovah Abasi] atuak ada, onyụn̄ enyen̄e isọn̄: ese, onyụn̄ anam mme idụt ẹnyek idem; ndien n̄kani obot ẹsuana mbak-mbak; nsinsi n̄kpri obot ẹsụhọde: nsinsi usụn̄ edi esie.” Akpa, Jehovah “atuak ada,” nte etubom ekọn̄ emi esede an̄waekọn̄. Mme asua esie ẹnyek ke ndịk. Mmọ ẹkụt owo emi asua mmọ edide ẹnyụn̄ ẹkop ndịk, ẹfrọde ntịme ntịme. Jesus ama ebem iso etịn̄ aban̄a ini emi ‘kpukpru mme idụt isọn̄ ẹdifụhọde.’ (Matthew 24:30) Ini eyebe akaha mmọ ndifiọk ke owo ndomokiet ikemke ubọk en̄wan ye Jehovah. Mme esop ubọk owo—idem mbon oro ẹtiede nte ẹbịghi nte “n̄kani obot” ye “nsinsi n̄kpri obot”—ẹyeduọn̄ọ. Oro ndien editie nte “nsinsi usụn̄” Abasi, nte usụn̄ emi enye ekesinamde n̄kpọ ke eset.

9, 10. Nso ke Habakkuk 3:7-11 eti nnyịn?

⁹ Jehovah “ofiop esịt” ye mme asua esie. Edi mme n̄kpọekọn̄ ewe ke enye edida an̄wana akwa ekọn̄ esie? Kpan̄ utọn̄ nte prọfet oro etịn̄de aban̄a mmọ, ọdọhọde ete: “Utịgha fo ofụhọde iferi, mme esien ẹn̄wọn̄ọ ke ikọ. Afo ada akpa mmọn̄ asiak isọn̄. Ikpọ obot ẹkụt fi, ẹmian̄a; akwa edịm mmọn̄ asan̄a ebe: inyan̄ ibom osioro uyo esie, emenede ubọk esie ke enyọn̄. Un̄wana idan̄ fo nte ẹduọde, uyama eduat fo nte emịnen̄de, esịn utịn ye ọfiọn̄ ẹtuak ẹda ke idụn̄ mmọ.”—Habakkuk 3:7-11.

¹⁰ Ke eyo Joshua, Jehovah ama anam utịn ye ọfiọn̄ ẹtuak ẹda ke ndiwụt odudu esie ke usụn̄ oro akpade owo idem. (Joshua 10:12-14) Ntịn̄nnịm ikọ Habakkuk eti nnyịn nte ke Jehovah ayada ukem odudu oro anam n̄kpọ ke Armageddon. Ke 1513 M.E.N., Jehovah ama owụt odudu emi enye enyenede ke inyan̄ibom ke ini enye akadade Ididuot Inyan̄ osobo udịmekọn̄ Pharaoh. Isua 40 ke ukperedem, akpa Jordan  emi okodude ke ini ọyọhọ ukwọ ikedịghe n̄kpọ ubiọn̄ọ inọ isan̄ edikan oro nditọ Israel ẹkesan̄ade ẹdụk Isọn̄ Un̄wọn̄ọ. (Joshua 3:15-17) Ke eyo Deborah prọfet an̄wan, akpa mmọn̄ ama emen chariot Sisera, asua nditọ Israel. (Judges 5:21) Jehovah eyenyene mme ukem odudu ukwọ, akpa mmọn̄, ye inyan̄ibom ẹmi ke Armageddon. Obuma ye emịnen̄mịnen̄ n̄ko ẹdu enye ke ubọk, nte eduat m̀mê edịp idan̄ emi ọyọhọde ye idan̄.

11. Nso iditịbe ke ini Jehovah asanade akwa odudu esie ayak?

¹¹ Ke akpanikọ, eyenyene uten̄e ke ini Jehovah edisanade akwa odudu esie ayak. Mme ikọ Habakkuk ẹnọ ekikere nte ke okoneyo ayakabade edi uwemeyo ndien uwemeyo ayayama akan nte akanam utịn ekemede ndiyama. Edide se ẹtịn̄de ke ntịn̄nnịm ikọ eke odudu spirit emi ẹban̄a Armageddon edi ata idem n̄kpọ m̀mê ndamban̄a n̄kpọ, n̄kpọ kiet edi akpanikọ—Jehovah ayakan, idiyakke asua ndomokiet ọbọhọ.

Edinyan̄a Odu ke Akpanikọ Ọnọ Ikọt Abasi!

12. Nso ke Abasi edinam mme asua esie, edi mmanie ke ẹdinyan̄a?

¹² Prọfet oro aka iso nditịn̄ nte Jehovah osobode mme asua Esie. Ke Habakkuk 3:12, nnyịn ikot ite: “Ke ifụtesịt ke afo edịghi isọn̄, ke iyatesịt ke afo anuak mme idụt.” Edi, Jehovah idisoboke ntịme ntịme. Ẹyenyan̄a ndusụk owo. Habakkuk 3:13 ọdọhọ ete: “Afo ọkọwọrọ ndinyan̄a ikọt fo, ndinyan̄a mme mmọ ẹmi afo eyetde aran.” Ih, Jehovah ayanyan̄a mme anam-akpanikọ asan̄autom esie oro ẹyetde aran. Do, nsobo Akwa Babylon, ukara ererimbot eke nsunsu ido ukpono, eyesịm utịt. Nte ededi, mfịn mme idụt ke ẹdomo ndisọhi utuakibuot akpanikọ mfep. Ibịghike, mme udịmekọn̄ Gog eke Magog ẹyen̄wana ye mme asan̄autom Jehovah. (Ezekiel 38:1–39:13; Ediyarade 17:1-5, 16-18) Ndi en̄wan Satan oro oyokụt unen? Baba! Jehovah adan̄aoro ayanuak mme asua esie ke iyatesịt, edịghide mmọ ke idak ikpat nte n̄kpasịp ke itie ubek ibokpot. Edi enye ayanyan̄a mbon oro ẹtuakde ibuot ẹnọ enye ke spirit ye ke akpanikọ.—John 4:24.

13. Didie ke Habakkuk 3:13 edisu?

¹³ Ẹbem iso ẹtịn̄ ẹban̄a edisobo ndiọi owo fapfap ke mme ikọ ẹmi: “Afo [Jehovah] akasuan ibuot emi otode ke ufọk idiọk owo; ke ayarade isọn̄ ibibene tutu esịm itọn̄ owo.” (Habakkuk 3:13) “Ufọk” emi edi idiọk editịm n̄kpọ emi ọkọride ke idak odudu Satan kpa Devil. Ẹyesuan enye. Ẹyenuak “ibuot emi,” m̀mê mme adaiso ẹmi ẹdide asua Abasi. Ẹyewụri ofụri ndutịm emi fap fap. Enye ididụhe aba. Nso utịbe utịbe ubọhọ ke emi edidi ntem!

14-16. Nte ekemde ye Habakkuk 3:14, 15, nso iditịbe inọ ikọt Jehovah ye mme asua mmọ?

¹⁴ Ke Armageddon, ẹyenam mbon oro ẹdomode ndisobo ‘enye emi Jehovah eyetde aran’ ẹdu ke ndutịme. Nte ekemde ye Habakkuk 3:14, 15, prọfet oro etịn̄ ikọ ye Abasi, ọdọhọde ete: “Afo ada eduat mbọn̄ obio in̄wan̄ mmọ ekịm [mbonekọn̄ esie, NW] ke ibuot: mmọ ẹbụmede nte oyobio, ẹte isuan mi; etie nte edita mme ubuene ke ndịbe adatde mmọ esịt. Afo akada mme horse fo asan̄a ke inyan̄, ke odụt akamba mmọn̄.”

¹⁵ Ke ini Habakkuk ọdọhọde ete “mbonekọn̄ . . . ẹbụmede nte oyobio, ẹte isuan mi,” prọfet oro etịn̄ ikọ ke ibuot mme asan̄autom Jehovah oro ẹyetde aran. Nte mbon n̄wo oro ẹdude ke ndịbe ebiet ẹbet, mme idụt ẹyefrọ ẹmụm mme andituak ibuot nnọ Jehovah man ẹsobo  mmọ. Mbon oro ẹsuade Abasi ye ikọt esie mi ‘ẹyedat esịt,’ ẹnyenede mbuọtidem ndikan. Mme anam-akpanikọ Christian ẹyetie nte ẹkop mmemidem, nte “mme ubuene.” Edi ke ini udịmekọn̄ ẹdide mme asua Abasi ẹtọn̄ọde en̄wan, Jehovah ayanam mmọ ẹkabade ẹda n̄kpọekọn̄ mmọ ẹn̄wana ye idemmọ. Mmọ ẹyeda mme n̄kpọekọn̄ mmọ, m̀mê “eduat,” ẹn̄wana ye mbonekọn̄ mmọ.

¹⁶ Edi n̄kpọ efen efen ke osụk osụhọ. Jehovah ayada udịmekọn̄ eke spirit oro akande eke owo ndisobo mme asua esie mma. Ye “mme horse” udịmekọn̄ eke heaven esie ke idak Jesus Christ, enye oyonụk aka iso ke edikan ebe “inyan̄” ye “odụt akamba mmọn̄,” oro edi, okopodudu otu mme asua ẹdide owo. (Ediyarade 19:11-21) Do ẹyesion̄o mme idiọkowo ke isọn̄ ẹfep. Nso okopodudu ediwụt odudu ye unenikpe Abasi ke emi edidi ntem!

Usen Jehovah ke Edi!

17. (a) Ntak emi nnyịn ikemede ndinyene mbuọtidem nte ke mme ikọ Habakkuk ẹyesu? (b) Didie ke nnyịn ikeme ndibiet Habakkuk nte nnyịn ibetde akwa usen Jehovah?

¹⁷ Nnyịn imekeme ndinịm ke akpanikọ nte ke mme ikọ Habakkuk ẹyewara ndisu. Mmọ idinamke ubịghi. Didie ke afo anam n̄kpọ aban̄a mbemiso ifiọk emi? Ti ete ke Habakkuk ekewet n̄kpọ ẹmi ke ndausụn̄ odudu spirit Abasi.  Jehovah ayanam n̄kpọ, ndien ndutịme oyodu ke isọn̄ ke ini oro adade itie. Eyịghe idụhe prọfet oro ekewetde ete: “N̄kop, ndien nsia oyomo mi; uyom esịn n̄kpọk-inua mi enyek: mme ọkpọ mi ẹtọn̄ọ ndiyap; nnyek idem ke itie mi: koro nyetie sụn̄ mbet ini ukụt, ini eke mmọ ẹmi ẹdidide ekọn̄ ye nnyịn ẹdidọkde ẹdi.” (Habakkuk 3:16) Habakkuk ama okop nyekidem etieti—an̄wan̄a ntak ekedide ntre. Edi nte mbuọtidem esie ama enyek? N̄wan̄ansa-o! Enye ama enyịme nditie sụn̄ mbet akwa usen Jehovah. (2 Peter 3:11, 12) Ndi oro idịghe edu nnyịn n̄ko? Ke akpanikọ edi! Nnyịn imenyene ọyọhọ mbuọtidem nte ke ntịn̄nnịm ikọ Habakkuk oyosu. Nte ededi, nnyịn iyebet ke ime tutu enye osu.

18. Kpa ye oro Habakkuk okodoride enyịn ndisobo nsọn̄ọn̄kpọ, nso ikedi edu esie?

¹⁸ Ekọn̄ esida nsọn̄ọn̄kpọ edi kpukpru ini, idem ye mbon ẹmi ẹdikande ke akpatre. Udia ekeme ndinana. Inyene ekeme nditak. Mme idaha udu uwem ẹkeme ndisụhọde. Edieke oro ọwọrọde nnyịn, idinam n̄kpọ didie? Habakkuk ama enịm eti uwụtn̄kpọ, koro enye ọkọdọhọ ete: “Koro eto fig mîdiseheke, baba mfri mîdinyụn̄ idụhe ke mme vine: mbun̄wụm olive oyonyụn̄ okpu, in̄wan̄ idinyụn̄ idụkke udia; n̄kpri ufene ẹyetre ke ebiet ufene, baba enan̄ kiet idinyụn̄ idụhe ke ufọk enan̄. Ndien ami nyadara Jehovah, nyebre mban̄a Abasi edinyan̄a mi.” (Habakkuk 3:17, 18) Habakkuk ama enen̄ede odori enyịn ndisobo nsọn̄ọn̄kpọ, ndusụk akan̄. Edi, enye ikedehede iduọk idatesịt esie ke Jehovah, emi edinyan̄a esie okotode.

19. Mme nsọn̄ọn̄kpọ ewe ke ediwak Christian ẹsobo, edi nnyịn ikeme ndidori enyịn ke nso edieke inịmde Jehovah akpa ke uwem nnyịn?

¹⁹ Mfịn, idem mbemiso Jehovah an̄wanade ekọn̄ ye mme idiọkowo, ediwak owo ẹsobo ọkpọsọn̄ ukụt. Jesus ama ebem iso etịn̄ ete ke mme ekọn̄, akan̄, unyekisọn̄, ye ndiọi udọn̄ọ ẹdidi ubak ‘idiọn̄ọ edidu imọ’ ke odudu ubọn̄. (Matthew 24:3-14; Luke 21:10, 11) Ediwak mme ekemmọ andinịm ke akpanikọ ẹdụn̄ ke mme idụt ẹmi mme ikọ Jesus ẹmi ndisu ẹtụkde mmọ idiọk idiọk, ndien nte utịp mmọ ẹsobo ekese nsọn̄ọn̄kpọ. Mme Christian eken ẹkeme ndisobo nsọn̄ọn̄kpọ ukem ntre ke ini iso. Ye ediwak owo efen efen ke otu nnyịn, ekeme ndinen̄ede ndi nte ke ‘eto fig idiseheke’ mbemiso utịt edide. Nte ededi, nnyịn imọfiọk ntak mme n̄kpọ ẹmi ẹtịbede, ndien oro ọnọ nnyịn odudu. Akan oro, nnyịn imenyene un̄wam. Jesus ama ọn̄wọn̄ọ ete: “Ẹkam ẹbem iso ẹyom Obio Ubọn̄ Esie ye edinen ido Esie [Abasi]; ndien ẹyedian kpukpru n̄kpọ ẹmi ẹnọ mbufo.” (Matthew 6:33) Oro inọhọ isọn̄ nte ke owo idinyeneke mme mfịna, edi enye ọsọn̄ọ ọnọ nnyịn nte ke edieke inịmde Jehovah akpa ke uwem nnyịn, enye eyese aban̄a nnyịn.—Psalm 37:25.

20. Kpa ye nsọn̄ọn̄kpọ ibio ini, nso ke nnyịn ikpebiere ndinam?

²⁰ Se ededi nsọn̄ọn̄kpọ eke ibio ini emi nnyịn isobode, nnyịn ididuọkke mbuọtidem ke odudu edinyan̄a Jehovah. Ediwak nditọete nnyịn iren ye iban ke Africa, N̄kan̄ Edem Usiahautịn Europe, ye mme itie eken ẹsobo ebeubọk nsọn̄ọn̄kpọ, edi mmọ ẹka iso ‘ẹdara ke Jehovah.’ Ukem nte mmọ, ẹyak nnyịn ikûdede itre ndinam ukem oro. Ti ete ke Jehovah Ọbọn̄ Andikara edi “odudu” nnyịn. (Habakkuk 3:19) Enye idikpụhu nnyịn tutu amama. Armageddon eyedi ke akpanikọ, ndien obufa ererimbot emi Abasi ọn̄wọn̄ọde iditreke-tre nditiene. (2 Peter 3:13) Ndien “ifiọk ubọn̄ Jehovah ọyọyọhọ ke ererimbot, kpa nte mmọn̄ ofụkde inyan̄.” (Habakkuk 2:14) Tutu esịm utịbe utịbe ini oro, ẹyak nnyịn itiene eti uwụtn̄kpọ Habakkuk. Ẹyak nnyịn kpukpru ini ‘idara Jehovah inyụn̄ idat esịt ke Abasi edinyan̄a nnyịn.’

Nte Afo Emeti?

• Didie ke n̄kpeubọk Habakkuk okpotụk nnyịn?

• Ntak emi Jehovah adahade isan̄?

• Nso ke ntịn̄nnịm ikọ Habakkuk etịn̄ aban̄a edinyan̄a?

• Nnyịn ikpebet akwa usen Jehovah ye nso edu?

[Mme Mbụme Ukpepn̄kpọ]

[Ndise ke page 23]

Nte afo ọmọdiọn̄ọ mme odudu emi Abasi edidade ndin̄wana ye mme idiọk owo ke Armageddon?