IDỊGHE utọ uwem oro idude mi ke Abasi okoyom idu. Enye okoyom mbon emi ẹkopde uyo esie, ẹkpebede mme edu esie, ẹnyụn̄ ẹnyịmede enye akara mmọ, ẹdụn̄ ke isọn̄ emi. Abasi okoyom mme owo ẹdiana kiet ẹnyụn̄ ẹkop inemesịt. Enye okoyom enenem mmọ ndibọk nditọ, n̄kpep mbufa n̄kpọ, nnyụn̄ nnam ofụri isọn̄ akabade Paradise.

• “Enye amanam ekọn̄ etre tutu esịm utịt isọn̄.”—Psalm 46:9.

• ‘Ekem ini ndisobo mbon oro ẹbiatde isọn̄.’—Ediyarade 11:18.

• “Baba andidụn̄ kiet ididọhọke ite: ‘Ndọdọn̄ọ.’”—Isaiah 33:24.

• “Ndimek ikọt mi ẹyedia ufọn utom ubọk mmọ ọyọhọ ọyọhọ.”—Isaiah 65:22.

Abasi edisan̄a didie inam se enye ọkọn̄wọn̄ọde emi? Enye emek Jesus Eyen esie Edidem man etie ke heaven akara ofụri isọn̄ emi. Idụhe ukara ndomokiet emi ekemede ndifọn nte ukara Abasi. Bible okot enye Obio Ubọn̄ Abasi. (Daniel 2:44) Kop se Bible eketịn̄de mi aban̄a Jesus: ‘Abasi ọyọnọ enye ebekpo, ndien enye ayakara nte edidem.’—Luke 1:32, 33.

Ke ini Jesus okodude ke isọn̄, enye ama anam ediwak utịben̄kpọ ndiwụt ke iyanam uwem enem mme owo ke ini imọ idikarade.

• Enye ama ọkọk kpukpru orụk udọn̄ọ, ndien oro okowụt ke enye ọyọkọk kpukpru owo udọn̄ọ onyụn̄ anam udọn̄ọ okûdu aba.—Matthew 9:35.

• Enye ama anam oyobio odobo ke inyan̄, ndien oro okowụt ke enye eyekpeme mme owo, idinyụn̄ iyakke n̄kpọ-obot anam mmọ n̄kpọ.—Mark 4:36-39.

• Enye ama ọnọ ediwak tọsịn owo udia, ndien oro okowụt ke enye ọyọnọ mme owo ofụri se ẹdidade idu uwem. —Mark 6:41-44.

• Enye ama anam mmọn̄ akabade wine ke itie usọrọ ndọ, ndien oro okowụt ke enye ayanam mme owo ẹkop inem uwem.—John 2:7-11.

Nso ke akpanam man odu uwem ke nsinsi nte Abasi oyomde mbon oro ẹmade enye ẹdu? Enyene “usụn̄” emi anade asan̄a. Bible ọdọhọ ke usụn̄ emi ‘ada esịm uwem’ ndien ke “mme andikụt enye iwakke.”—Matthew 7:14.

Nso idi usụn̄ oro adade esịm nsinsi uwem? Usụn̄ emi ada aban̄a kpukpru se Abasi ọdọhọde inam. Abasi ọdọhọ ete: “Ami Jehovah, ndi Abasi fo, Enye emi ekpepde fi man afo ọbọ ufọn, Enye emi anamde fi asan̄a ke usụn̄ emi afo akpasan̄ade.” (Isaiah 48:17) Edieke asan̄ade ke usụn̄ emi, uwem eyenem fi.

Jesus ọkọdọhọ ete: “Ami ndi usụn̄ ye akpanikọ ye uwem.” (John 14:6) Edieke inamde se Jesus ọdọhọde inyụn̄ ikpebede uwụtn̄kpọ esie, iyenen̄ede ikpere Abasi, ndien oro ayanam uwem enem nnyịn.

 Akpanam didie ọdiọn̄ọ usụn̄ oro adade esịm nsinsi uwem? Mme owo ẹnyene nsio nsio usụn̄ emi mmọ ẹkponode Abasi mfịn, edi Jesus ọkọdọhọ ete: “Idịghe kpukpru mbon oro ẹkotde mi, ‘Ọbọn̄, Ọbọn̄,’ ẹdidụk obio ubọn̄ heaven, edi edi enye emi anamde uduak Ete mi emi odude ke heaven edidụk.” (Matthew 7:21) Enye ama ọdọhọ n̄ko ete: “Mbufo ẹyeda mfri mmọ ẹfiọk mmọ.” (Matthew 7:16) Bible ekeme ndin̄wam fi ọfiọk mbon emi ẹkponode ata Abasi.—John 17:17.

Didie ke ekeme nditọn̄ọ nsan̄a ke usụn̄ oro adade esịm nsinsi uwem? Ana oyom usụn̄ ọdiọn̄ọ Owo emi okobotde kpukpru nnyịn. Ana ọdiọn̄ọ enyịn̄ esie, utọ owo emi enye edide, se enye anamde ọnọ nnyịn, ye se enye oyomde nnyịn inam. *

Uwem ikụreke ke ndinam utom, ndia udia, mbre mbre, nnyụn̄ nnyene nditọ. Idịghe n̄kukụre se Abasi oyomde inam edi oro. Enye oyom nnyịn ikpep n̄kpọ iban̄a imọ inyụn̄ idi ufan esie. Edieke inamde uduak esie, oro oyowụt ke imama enye. Jesus ọkọdọhọ ete: “Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet.”—John 17:3.

Ke ini ifiọkde se Abasi oyomde inam, ekeme ndiyom ikpụhọde nte isidude uwem. Ekeme nditie nte nnyịn idikemeke. Edi ke ini itọn̄ọde ndisan̄a ke usụn̄ emi adade esịm uwem, iyokụt ke uwem eyenem nnyịn akan nte ekedide. Mme Ntiense Jehovah ẹkpema ndikpep Bible ye afo ke ini ye ebiet emi ọfọnde ye afo man ẹn̄wam fi okụt nte Bible ọbọrọde mme mbụme oro mme owo ẹsiwakde ndibụp mban̄a Abasi. Emekeme ndida ikpehe Intanet emi www.jw.org/efi n̄wet nnyịn.