Be ka se isịnede

Be ka udiana n̄kpọ

Mme Ntiense Jehovah

Efịk

Ndinam Didie Ndiọn̄ọ Mbon Oro Ẹkponode Ata Abasi?

Ndinam Didie Ndiọn̄ọ Mbon Oro Ẹkponode Ata Abasi?

Se Bible ọdọhọde

Kop se Bible etịn̄de mi man an̄wam nnyịn idiọn̄ọ ukpụhọde emi mbon emi ẹkponode ata Abasi ẹnyenede ye mbon eken: “Mbufo ẹyeda mfri mmọ ẹfiọk mmọ. Ndi akanam mme owo ẹtet grape ke n̄kukịm m̀mê ẹtet fig ke mbaraekpe?” (Matthew 7:16) Kpasụk nte afo ekemede ndida mfri grape mfiọk ke grape edi oro, emekeme n̄ko ndida se mme ufọkabasi ẹnamde, m̀mê mme n̄kpọ emi ẹtịn̄de mi, ndiọn̄ọ mbon oro ẹkponode ata Abasi.

  1. Mbon oro ẹkponode ata Abasi ẹsikpep se idude ke Bible, isikpepke ifiọk owo. (John 4:24; 17:17) Emi esịne se Bible ekpepde aban̄a ukpọn̄ ye idotenyịn nsinsi uwem ke isọn̄ emi ẹdinamde edi Paradise. (Psalm 37:29; Isaiah 35:5, 6; Ezekiel 18:4) N̄ko, mbon oro ẹkponode ata Abasi isitreke ndiyarade nsu emi ufọkabasi mbon eken ẹkpepde.—Matthew 15:9; 23:27, 28.

  2. Mbon oro ẹkponode ata Abasi ẹsin̄wam mme owo ẹdiọn̄ọ Abasi, ẹnyụn̄ ẹkpep mme owo enyịn̄ Abasi emi edide Jehovah. (Psalm 83:18; Isaiah 42:8; John 17:3, 6) Mmọ isikpepke ke usụn̄ Abasi ọsọn̄ akaha ndin̄wan̄a owo m̀mê ndikpep nte ke owo ikemeke ndisan̄a n̄kpere Abasi, edi ekpep ke Abasi oyom nnyịn idi ufan imọ.—James 4:8.

  3. Mbon oro ẹkponode ata Abasi ẹsikpep ke Jesus Christ ke Abasi ada anyan̄a nnyịn. (Utom 4:10, 12) Mmọ ẹsinam se Jesus ọkọdọhọde ẹnyụn̄ ẹtiene uwụtn̄kpọ esie.—John 13:15; 15:14.

  4. Mbon oro ẹkponode ata Abasi ẹsiwak nditịn̄ mban̄a Obio Ubọn̄ Abasi nte n̄kukụre idotenyịn ubonowo. Mmọ ẹsisịn idem ẹkpep mbon en̄wen ẹban̄a Obio Ubọn̄ oro.—Matthew 10:7; 24:14.

  5. Mbon oro ẹkponode ata Abasi ẹsinen̄ede ẹnyene ima. (John 13:35) Mmọ ẹsikpono kpukpru owo ẹnyụn̄ ẹma owo ọkpọkọm owo oro oto m̀mọ̀n̄, m̀mê esem nso utọ usem. (Utom 10:34, 35) Sia mmọ ẹmade mme owo, mmọ isitieneke ika ekọn̄.—Micah 4:3; 1 John 3:11, 12.

  6. Mmọ inyeneke mme ọkwọrọikọ oro ẹsikpede okụkọfiọn̄, mmọ isinyụn̄ inọhọ owo ndomokiet ikpọ udorienyịn̄.—Matthew 23:8-12; 1 Peter 5:2, 3.

  7. Mbon oro ẹkponode ata Abasi inyeneke ubọk ndomokiet ke mbre ukara. (John 17:16; 18:36) Edi mmọ ẹsikpono mme andikara ẹnyụn̄ ẹnịm ibet ukara ke obio emi mmọ ẹdude. Bible ọdọhọ ete: “Ẹnọ Caesar se inyenede Caesar [emi adade aban̄a ukara], ẹnyụn̄ ẹnọ Abasi se inyenede Abasi.”—Mark 12:17; Rome 13:1, 2.

  8. Mbon oro ẹkponode ata Abasi ẹsida Ikọ Abasi ẹdu uwem, ẹnyụn̄ ẹnam item Abasi ke ofụri esịt. Mmọ isidụhe oburobụt uwem edi ẹsinam se Bible etịn̄de ke kpukpru se mmọ ẹnamde. (Ephesus 5:3-5; 1 John 3:18) Mmọ isitiehe mfụhọ mfụhọ, edi esịt esinenem mmọ ndinam n̄kpọ “Abasi inemesịt.”—1 Timothy 1:11.

  9. Mbon oro ẹkponode ata Abasi idiwakke nte mbon eken. (Matthew 7:13, 14) Mme owo ẹsiwak ndise mmọ ke usụhọde, ẹsak, ẹnyụn̄ ẹkọbọ mmọ sia mmọ ẹnamde se Abasi ọdọhọde.—Matthew 5:10-12.

Owo isidaha nte ‘etiede enye ke idem’ idiọn̄ọ mbon emi ẹkponode ata Abasi

Ifọnke ndida nte etiede nnyịn ke idem mbiere ufọkabasi emi ikpakade. Bible ama etịn̄ aban̄a ini emi mme owo ‘ẹdikọde mme andikpep [ufọkabasi] inọ idemmọ man ẹkop se utọn̄ mmọ amade ndikop.’ (2 Timothy 4:3) Edi Bible ọdọhọ nnyịn ete yak itiene “orụk utuakibuot oro asanade mînyụn̄ ideheke ke enyịn Abasi Ete nnyịn,” idem ọkpọkọm ediwak owo imaha orụk utuakibuot oro.—James 1:27; John 15:18, 19.