Be ka se isịnede

Be ka se isịnede

Nso ke Akpanam Man Uwem Enem Fi Idahaemi?

Nso ke Akpanam Man Uwem Enem Fi Idahaemi?

USEN kiet usen kiet, udọn̄ọ, usọn̄, ye n̄kpa ididụhe aba. Afo emekeme nditiene ndu uwem ini oro. Edi idahaemi mfịna awak etieti ke ererimbot. Nso ke akpanam man uwem enem fi idahaemi? Bible etịn̄ se akpanamde. Yak ineme ndusụk mfịna emi mme owo ẹsobode ye nte Bible ekemede ndin̄wam.

YỤHỌ YE SE ENYENEDE

Item Bible: “Ẹkûyak usụn̄ uwem mbufo asan̄a ye ima okụk, edi ẹyụhọ ye se mbufo ẹnyenede.”Mme Hebrew 13:5.

Mfịn, enyene ediwak n̄kpọ emi mme owo ẹsinamde etie nte ke owo mînyeneke ke enye ikemeke ndikop inemesịt. Edi Bible ọdọhọ yak ‘iyụhọ ye se inyenede.’ Didie ke ikeme ndinam emi?

Kûma okụk. Ndusụk owo ẹma okụk tutu ẹkenam n̄kpọ emi abiatde mmọ enyịn̄, abiat ubon mmọ, abiat ufan mmọ, mîdịghe anam mme owo ẹkûkpono mmọ aba. (1 Timothy 6:10) Utọ uwem oro inyeneke ufọn sia Bible ọdọhọ ke ‘okụk isiyụhọke owo emi amade inyene.’—Ecclesiastes 5:10.

Ma mme owo utu ke inyene. Imọdiọn̄ọ ke inyene enyene ufọn. Edi inyene ikemeke ndima nnyịn m̀mê ndikọm nnyịn ke se inamde; owo kpọt ekeme ndinam oro. Ndinyene “ata ufan” eyetiene anam ikop inemesịt.—Mme N̄ke 17:17.

IYOKOP INEMESỊT EDIEKE INAMDE ITEM BIBLE

NDIYỌ UDỌN̄Ọ

Item Bible: “Esịt eke adarade ọkọk ubiak.”Mme N̄ke 17:22.

Idatesịt ekeme ndin̄wam nnyịn iyọ udọn̄ọ. Edi, didie ke esịt ekeme ndidat owo emi ọdọn̄ọde?

Sikọm owo ke se ẹnamde ẹnọ fi. Edieke itakde ke ndikere se iwọrọde nnyịn, “kpukpru usen” ẹdidọdiọk. (Mme N̄ke 15:15) Edi akam ọfọn ‘isiwụt esịtekọm’ nte Bible ọdọhọde. (Colossae 3:15) Domo ndise nnyụn̄ mma n̄kpri n̄kpri n̄kpọ emi ẹsitienede ẹnam uwem enem, utọ nte ediye ikpaenyọn̄, mbịtmbịt ofụm, m̀mê ufan fo ndituak inua imam ye afo.

Sinam n̄kpọ nọ mme owo. Ọkpọkọm idem isọn̄ke fi, ti ke oyokop inemesịt edieke anamde n̄kpọ ọnọ mbon en̄wen utu ke ndibebet mmọ ẹnam n̄kpọ ẹnọ fi. (Utom 20:35) Ke ini mbon en̄wen ẹkọmde nnyịn ke se inamde inọ mmọ, esịt esinem nnyịn, ndien oro idiyakke itie ikere mfịna nnyịn. Uwem eyenem nnyịn ke ini inamde uwem enem mbon en̄wen.

 NAM NDỌ FO ỌFỌN

Item Bible: ‘Ẹdụn̄ọde ẹfiọk se idide akpan n̄kpọ ikan.’Philippi 1:10.

Edieke ebe ye n̄wan mîsidianake kiet inam n̄kpọ, ndọ mmọ ekeme ndibiara. Ntre, ọfọn ebe ye n̄wan ẹda ndọ mmọ nte akpan n̄kpọ.

Ẹdiana kiet ẹnam n̄kpọ. Ẹtie kiet ẹneme se mbufo mbiba ẹkpedianade kiet ẹnam. Bible ọdọhọ ke “owo iba ẹfọn ẹkan owo kiet.” (Ecclesiastes 4:9) Mbufo mbiba ẹmekeme ndidiana kiet ntem udia, ẹtie kiet ẹn̄wọn̄ n̄kpọ, ẹsan̄a ẹbọ ofụm, mîdịghe ẹsịn̄ede idem.

Nam n̄wan m̀mê ebe fo ọfiọk ke amama enye. Bible ọdọhọ ebe ye n̄wan ẹma ẹnyụn̄ ẹkpono kiet eken. (Ephesus 5:28, 33) Ndisituak inua imam ye ebe m̀mê n̄wan fo, mfat enye, mîdịghe ndep n̄kpọ nnọ enye ekeme nditiene nnam ndọ mbufo enem. Edi ti ke Bible ọdọhọ ke ebe ye n̄wan kpọt ẹkpesibre ima ye kiet eken.—Mme Hebrew 13:4.