Be ka se isịnede

Be ka se isịnede

Ntak Emi Isisọn̄de Inyụn̄ Ikpade?

Ntak Emi Isisọn̄de Inyụn̄ Ikpade?

ABASI ikoyomke mme owo ẹkpa. Adam ye Eve ẹma ẹfọn ẹma ẹnana ndo ke ini ẹkebotde mmọ. Mmọ ẹkpesụk ẹdodu uwem tutu esịm mfịn emi. Se Jehovah eketịn̄de ọnọ Adam aban̄a eto kiet ke In̄wan̄ Eden owụt ke enye ikoyomke mmọ ẹkpa.

Abasi ọkọdọhọ Adam ete: “Usen eke afo adiade [mfri eto oro] afo ayakpa n̄kpa.” (Genesis 2:17) Edieke Abasi okoyomde Adam ọsọn̄ onyụn̄ akpa, ufọn ikpokodụhe ndinọ enye ibet emi. Adam ama ọfiọk ke imọ idikpaha edieke imọ mîdiaha mfri eto oro.

ABASI IKOYOMKE MME OWO ẸKPA

Idịghe biọn̄ akanam Adam ye Eve ẹdia mfri eto oro sia mfri ọkọyọyọhọ In̄wan̄ Eden. (Genesis 2:9) Ekpedi mmọ ikadiaha mfri oro, mmọ ẹkpekewụt ke imokop item Owo emi okobotde mmọ. Okpokonyụn̄ owụt ke mmọ ẹnịm ke Abasi enyene unen nditeme mmọ se ẹkpenamde.

NTAK EMI ADAM YE EVE ẸKEKPADE

Edieke iyomde ndifiọk ntak emi Adam ye Eve ẹkekpade, ana ibem iso ifiọk nneme emi Satan ekenyenede ye Eve, emi ebehede kpukpru nnyịn. Satan emi ẹkotde n̄ko Devil ama ada urụkikọt abian̄a Eve. Bible ọdọhọ ete: “Ndien urụkikọt enyene mbufiọk akan kpukpru unam ikọt emi Jehovah Abasi akanamde. Ekem enye obụp n̄wan oro ete: ‘Nte enen̄ede edi akpanikọ ke Abasi ọkọdọhọ mbufo ẹkûdia kpukpru eto ke in̄wan̄ emi?’”—Genesis 3:1.

Eve ama ọbọrọ enye ete: “Nnyịn imekeme ndidia mme mfri eto in̄wan̄ emi. Edi amaedi mfri eto emi odude ke ufọt in̄wan̄, Abasi ọkọdọhọ ete, ‘Mbufo ẹkûdia enye, ẹkûnyụn̄ ẹtụk enye, mbak ẹdikpan̄a.’” Edi urụkikọt ama ọdọhọ enye ete: “Mbufo idikpaha n̄kpa. Koro Abasi ọmọfiọk ete ke usen eke mbufo ẹdidiade, enyịn mbufo ayatara, mbufo ẹyenyụn̄ ẹtie nte Abasi, ẹfiọk eti ye idiọk.” Ikọ Satan ọkọwọrọ ke Jehovah osu nsu, ke enye iyomke n̄kpọ ọfọn Adam ye Eve.—Genesis 3:2-5.

Eve ama enịm se Satan eketịn̄de. Enye ama etịn̄ enyịn ese eto oro. Eto oro ama eye enye, onyụn̄ ọdọn̄ enye itọn̄. Ntre enye ama ekịbi mfri eto oro adia. Bible ọdọhọ ete: “Ekem, ke ini enye odude ye ebe esie, enye ada ndusụk mfri oro ọnọ ebe esie ndien enye adia.”—Genesis 3:6.

Abasi ọkọdọhọ Adam ete: “Usen eke afo adiade [mfri eto oro] afo ayakpa n̄kpa.”—GENESIS 2:17

Ama enen̄ede abiak Jehovah ndikụt ndima nditọ esie ẹkoide-koi ẹsọn̄ ibuot ye enye. Nso ke enye akanam? Jehovah ama ọdọhọ Adam ete: “Afo [ayafiak] ke ntan, sia ẹkesiode fi do. Koro afo edide ntan, oyonyụn̄ afiak ke ntan.” (Genesis 3:17-19) Ntak edi oro “ofụri isua uwem Adam [ekedide] isua ikie usụkkiet ye edịp ye duop ndien enye akpa.” (Genesis 5:5) Adam ikakaha heaven ikonyụn̄ ikaha obio ekpo. Enye ikodụhe ke ebiet en̄wen mbemiso Abasi okobotde enye. Ntre, ke ini enye akakpade, enye ikakaha ebiet ndomokiet, utu ke oro, enye ama akabade ntan emi ẹkedade ẹbot enye. Enye  ikodụhe aba. Omokụt do se nsọn̄ibuot akadade edi?

NTAK EMI NNYỊN MÎFỌNKE IMA

Tọn̄ọ ke ini emi Adam ye Eve ẹkekoide-koi ẹsọn̄ ibuot ye Abasi, mmọ ikọfọnke ima aba, mmọ ikonyụn̄ ikemeke aba ndidu uwem ke nsinsi. Idiọkn̄kpọ ama okpụhọde kpukpru n̄kpọ ke idem mmọ. Edi idịghe mmọ ikpọn̄ ẹkebọ ufen idiọkn̄kpọ mmọ. Kpukpru nditọ mmọ ẹkedada idiọkn̄kpọ ẹdimana. Rome 5:12 ọdọhọ ete: “Nte idiọkn̄kpọ okotode owo kiet odụk ererimbot, n̄kpa onyụn̄ otode ke idiọkn̄kpọ oro odụk, ndien n̄kpa atara esịm kpukpru owo koro kpukpru mmọ ẹma ẹnam idiọkn̄kpọ.”

Bible ọdọhọ ke idiọkn̄kpọ ye n̄kpa ẹdi “ufụhọ n̄kpọ emi ofụkde kpukpru owo . . . ye udọdọk ọfọn̄ oro ẹdọkde ẹfụk kpukpru mme idụt.” (Isaiah 25:7) Ufụhọ-n̄kpọ emi etie nte ata idiọk ntụhube emi ofụkde kpukpru itie, ndien owo ndomokiet ikemeke ndifehe mbọhọ enye. Ntak edi oro 1 Corinth 15:22 ọdọhọde ke Adam anam kpukpru owo ẹkpa. Ntre, ediwak owo ẹyom ndifiọk ibọrọ mbụme oro apostle Paul okobụpde mi ete: “Anie edinyan̄a mi osio ke ikpọkidem n̄kpa emi?” Ndi odu owo?—Rome 7:24.