Kere Ban̄a Mbon En̄wen
Ntak Esisọn̄de
Edieke isitakde ndikere se inamde ikpụhọde ye mbon en̄wen, oro ekeme ndinam ikere ke imọfọn ikan mmọ. Emi ekeme ndinam itọn̄ọ ndisari mbon oro mîtiehe nte nnyịn. Ima itọtọn̄ọ ndinyene utọ ekikere oro, ọyọsọn̄ nnyịn ndikere mban̄a mbon en̄wen. Edieke nnyịn mîkereke iban̄a mbon en̄wen, imekeme nditọn̄ọ ndisari mmọ.
Se Bible Etịn̄de
“Ẹdara ye mmọ emi ẹdarade; ẹtuan̄a ye mmọ emi ẹtuan̄ade.” —ROME 12:15.
Nso ke emi ekpep nnyịn? Itie Bible emi ekpep nnyịn ndisikere mban̄a mbon en̄wen. Ndikere mban̄a mbon en̄wen ọwọrọ nnyịn ndiyak se itịbede inọ mmọ etie nte etịbe ọnọ nnyịn.
Nte Ndikere Mban̄a Mbon En̄wen Ekemede Ndin̄wam Nnyịn
Ima ikere iban̄a owo, iyokụt ke enyene se idade ibiet owo oro. Iyedikụt n̄ko ke nte esitiede nnyịn ke idem n̄kpọ ama etịbe ke esinyụn̄ etie enye ke idem, nte isinyụn̄ inamde n̄kpọ ke utọ ini oro ke enye esinyụn̄ anam. Ima ikere iban̄a mme owo, iyokụt ke kpukpru nnyịn idi ubon kiet inamke n̄kpọ m̀mê owo oto m̀mọ̀n̄. Edieke inyịmede ke inyeneke se idade ifọn ikan owo, oro ayanam ọsọn̄ nnyin ndisari owo.
Ke ini ikerede iban̄a mme owo, oro ayanam ikpono mmọ. Enyene ini emi Anne-Marie emi otode Senegal mîkesikponoke mbon oro ediwak owo ẹkedade nte mme usụhọde owo. Enye ọdọhọ ke imọ ndikere mban̄a mmọ akan̄wam imọ. Enye ọkọdọhọ ete: “Ke ini n̄kokụtde ufen oro mmọ ẹkebọde, mma n̄kere m̀mê ekpedi ami n̄kedi mmọ m̀mê ekpetie mi didie ke idem. Emi ama anam n̄kụt ke ami mfọnke n̄kan mmọ, ke inyụn̄ inyeneke se nnamde nda mfọn n̄kan mmọ.” Edieke idomode ndifiọk se iwọrọde mme owo, oro ayanam mbọm mmọ anam nnyịn utu ke ndisasari mmọ.
Se Akpanamde
Kûtak ke ndiyom se inamde okpụhọde ye mbon en̄wen edi kam yom se ẹdade ẹbiet kiet eken. Ke uwụtn̄kpọ, kere nte esitiede mmọ ke idem ke ini mmọ
Ima ikere iban̄a mme owo, iyokụt ke kpukpru nnyịn idi ubon kiet
ẹdiade udia ye ubon mmọ
ẹnyọn̄de utom ẹdi
ẹdude ye mme ufan mmọ
ẹkopde ikwọ emi mmọ ẹmade
N̄kpọ en̄wen edi, da nte ke afo edi mmọ. Bụp idemfo ete:
‘Ekpetie mi didie ke idem edieke mbon en̄wen ẹnamde etie nte ke ndịghe n̄kpọ ndomokiet?’
‘Ekpetie mi didie ke idem edieke mbon en̄wen ẹdade mi nte idiọkowo ke ini mmọ mîkam idiọn̄ọke-diọn̄ọ mi?’
‘Edieke mme owo ẹkpesuade mi ke ntak ebiet oro ntode, ndi esịt ekpenem mi?’
Ekeme Ndidi Ayama Mmọ Emi N̄ko
ENYỌN̄-UKPEME
Ndi Mbọm Nnyịn Esinam Abasi?
Bible anam ifiọk ke Abasi okụt se iwọrọde nnyịn, ọfiọk nte etiede nnyịn ke idem, esinyụn̄ atua nnyịn mbọm.
ẸDEMEDE!
Bible Ekeme Ndinam Uwem Enem Fi—Ndikpere Mbonubon ye Mme Ufan Nnyịn
Iyenen̄ede ikpere mbonubon nnyịn ye mme ufan nnyịn edieke isikerede iban̄a se ikpanamde inọ mmọ utu ke ndikere mban̄a se mmọ ẹkpenamde ẹnọ nnyịn.
