Be ka se isịnede

Be ka se isịnede

Ndikpere Mbonubon ye Mme Ufan Nnyịn

Ndikpere Mbonubon ye Mme Ufan Nnyịn

Esisọn̄ ediwak owo ndinen̄ede n̄kpere mbonubon ye mme ufan mmọ. Ntre, yak ineme ndusụk item Bible emi ẹkemede ndin̄wam nnyịn ikpere mbonubon ye mme ufan nnyịn.

KÛKERE UBAN̄A IDEMFO KPỌT

SE BIBLE ETỊN̄DE: “Ẹkûse ẹban̄a mbubehe mbufo kpọt, edi ẹse ẹban̄a mbubehe mbon en̄wen n̄ko.”—Philippi 2:4.

NSO KE EMI ỌWỌRỌ? Iyenen̄ede ikpere mbonubon nnyịn ye mme ufan nnyịn edieke isikerede iban̄a se ikpanamde inọ mmọ utu ke ndikere mban̄a se mmọ ẹkpenamde ẹnọ nnyịn. Owo ndikere mban̄a idemesie kpọt ekeme ndibiat ufan. Ke uwụtn̄kpọ, n̄wan m̀mê ebe emi ekerede aban̄a idemesie kpọt ekeme ndisịn efịbe nte ini akade. N̄ko, mme owo isimaha owo emi esinamde inua aban̄a inyene ye ifiọk esie. N̄wed kiet ọdọhọ ke owo ndikere mban̄a idemesie kpọt esida ediwak mfịna edi.

SE AKPANAMDE:

  • N̄wam mbon en̄wen. Nti ufan ẹsinyene mbuọtidem ke idem kiet eken ẹnyụn̄ ẹma ndin̄wam kiet eken. Ndụn̄ọde oro ẹkenamde owụt ke mbon emi ẹsimade ndin̄wam mbon en̄wen isitiehe mfụhọ mfụhọ inyụn̄ ikereke ke mmimọ iwọrọke n̄kpọ.

  • Tua owo mbọm. Owo emi esituade owo mbọm esidomo ndifiọk nte etiede owo en̄wen ke idem. Edieke isituade owo mbọm, nnyịn ididaha owo inam ndisịme, idinyụn̄ itịn̄ke ikọ m̀mê ndinam mbubru emi idiọn̄ọde ke ayayat owo.

    Edieke isituade owo mbọm, iyesikeme ndiyọ mbon en̄wen. Nnyịn idinyụn̄ isarike owo ndomokiet, iyonyụn̄ inam ufan ye mbon emi ẹtode ebiet en̄wen, ọkpọkọm mmọ inyeneke n̄kpọ.

  • Sidu ye mme owo. Ndisidu ye mme owo ayanam inen̄ede ifiọk mmọ. Edieke oyomde ndinyene nti ufan, ana esineme nneme ye mme owo aban̄a  mme n̄kpọ emi mmọ ẹmade. Nen̄ede kpan̄ utọn̄ ke ini mmọ ẹtịn̄de ikọ. Nam mmọ ẹfiọk ke emekere aban̄a mmọ. Ndụn̄ọde oro ẹnamde ndondo emi owụt ke ndisineme nneme ye owo mban̄a se enye amade ekeme ndinam okop inemesịt.

KÛNAM UFAN YE OWO EKEDEDI

SE BIBLE ETỊN̄DE: “Idiọk nsan̄a ababiat eti ido.”—1 Corinth 15:33.

NSO KE EMI ỌWỌRỌ? Mme ufan fo ẹkeme ndinam anam eti n̄kpọ m̀mê idiọkn̄kpọ. Ntaifiọk ẹdọhọ ke mme ufan nnyịn ẹsinen̄ede ẹnyene ubọk ke nte idude uwem. Ke uwụtn̄kpọ, emekeme nditọn̄ọ ndin̄wọn̄ sika edieke mme ufan fo ẹsin̄wọn̄de sika, omonyụn̄ ekeme ndisio n̄wan fo ndọ mîdịghe ọwọrọ ndọ edieke odụkde ndụk ye mbon emi ẹnamde utọ n̄kpọ oro.

SE AKPANAMDE: Nam ufan ye mbon emi ẹnyenede mme edu emi afo amade onyụn̄ oyomde ndinyene. Ke uwụtn̄kpọ, nam ufan ye mbon emi ẹsitịn̄de ikọ emem emem, ẹsikponode owo, ẹnyụn̄ ẹfọnde ido.

MME N̄KPỌ EN̄WEN EMI BIBLE ETỊN̄DE

Ka jw.org kese mme vidio ikọ Abasi emi ẹkpepde n̄wan ye ebe, n̄kparawa, ye nditọwọn̄ se mmọ ẹkpenamde man inemesịt odu ke ubon mmọ

KÛTỊN̄ N̄KPỌ EMI AYATDE OWO.

“Enyene owo emi etịn̄de ikọ ye unana edikere, nte emi akan̄kan̄ ekịmde.”—MME N̄KE 12:18.

TAT UBỌK.

“Ukpọn̄ eke atatde ubọk eyesehe.”—MME N̄KE 11:25.

NAM N̄KPỌ YE MME OWO NTE OYOMDE ẸNAM YE AFO.

“Kpukpru n̄kpọ eke mbufo ẹyomde mme owo ẹnam ye mbufo, ana mbufo n̄ko ẹnam kpasụk ntre ye mmọ.”—MATTHEW 7:12.