Be ka se isịnede

Be ka se isịnede

Se Iditrede Asari

Se Iditrede Asari

Ata ediwak owo ẹnam se Bible ekpepde, emi ikenemede ke ibuotikọ emi ẹkebede, ndien emi ke an̄wam mmọ ẹtre asari. Imọfiọk ke idụhe owo ndomokiet emi ekemede ndida ke idemesie ntre asari ke ererimbot emi. Ndi oro ọwọrọ ke asari iditreke tutu amama?

Ata Eti Ukara Editre Asari

Ukara owo ẹn̄wana ndinam mme owo ẹtre asari, edi ikemeke. Ndi oro ọwọrọ ke inyeneke ukara ndomokiet emi ekemede nditre asari?

Mbemiso ukara ndomokiet ekemede nditre asari, ana enye

  1. 1. Anam mme owo ẹkpụhọde ekikere mmọ ye nte mmọ ẹsidade mbon en̄wen.

  2. 2. Etre n̄kpọ emi esinamde mme owo ẹsari mbon en̄wen.

  3. 3. Enyene mme andikara emi mîsinamke asari.

  4. 4. Anam kpukpru owo ke kpukpru idụt ẹdiana kiet.

Bible ọdọhọ ke Abasi enyene utọ ukara oro ke heaven. Ukara emi ke Bible okot “obio ubọn̄ Abasi.”—Luke 4:43.

Se se ukara oro edinamde ke isọn̄ emi.

1. Eyekpep Mme Owo Ndinam Se Ifọnde

“Mme andidụn̄ isọn̄ ẹyekpep edinen ido.”—ISAIAH 26:9.

“Ndien utom ata edinen ido ayakabade edi emem; utịp ata edinen ido oyonyụn̄ edi nduọkodudu ye ifụre ke nsinsi.”—ISAIAH 32:17.

Nso ke emi ekpep nnyịn? Obio Ubọn̄ Abasi eyekpep mme owo ndinam se ifọnde. Ke ini kpukpru owo ẹkpepde ndinam se ifọnde utu ke ndinam se idiọkde, oro ayanam mmọ ẹkpụhọde nte mmọ ẹsidade mbon en̄wen. Kpukpru owo ẹyediọn̄ọ ke nnennen n̄kpọ ndinam edi ndima kpukpru owo.

2. Eyetre Asari

Abasi “ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”—EDIYARADE 21:4.

Nso ke emi ekpep nnyịn? Obio Ubọn̄ Abasi eyetre kpukpru ubiak emi asari akadade edi. Mbon oro ẹkebọde ufen ke ntak asari idibọhọ ufen aba, idinyụn̄ iyatke esịt aba sia se ikanamde mmọ ẹyat esịt ebe efep.

 3. Ata Eti Owo Edikara

“Enye idikpehe ikpe itiene se okụtde ke enyịn, idinyụn̄ inọhọ nsuannọ itiene n̄kpọ emi enye okopde. Enye eyekpe ikpe mme ubuene ke edinen ido, onyụn̄ ọnọ mme owo nsuannọ ke eti ido ke ufọn sụn̄sụn̄ mbon isọn̄.”—ISAIAH 11:3, 4.

Nso ke emi ekpep nnyịn? Jesus Christ emi edikarade ke Obio Ubọn̄ Abasi idinamke asari. Enye idimaha idụt kiet ikan idụt en̄wen. Enye oyokụt ete ke kpukpru owo ke ofụri ererimbot ẹnịm ibet esie.

4. Mme Owo Ẹyediana Kiet

Obio Ubọn̄ Abasi eyekpep mme owo ‘ndinyene ekikere kiet, ndima kpukpru owo, nnyụn̄ nnen̄ede ndiana kiet.’—PHILIPPI 2:2.

Nso ke emi ekpep nnyịn? Kpukpru owo ke Obio Ubọn̄ Abasi ẹyenen̄ede ẹdiana kiet sia mme owo ẹyenen̄ede ẹma kiet eken.