Be ka se isịnede

Be ka se isịnede

Ndi Mbọm Nnyịn Esinam Abasi?

Ndi Mbọm Nnyịn Esinam Abasi?

SE IKPEPDE ITO NTE ABASI OKOBOTDE OWO

Owo emi atuade owo mbọm esitie ekere se iwọrọde owo en̄wen onyụn̄ ekere nte ekpetiede imọ ke idem edieke n̄kpọ oro ekpetịbede ọnọ imọ. Dr. Rick Hanson ọdọhọ ke nditua owo mbọm esesịne nnyịn ke iyịp.

KERE ISE: Ntak emi edide mme owo kpọt ẹsikeme nditua owo mbọm? Bible ọdọhọ ke Abasi okobot owo ke mbiet esie. (Genesis 1:26) Ke ini Bible ọdọhọde ke Abasi okobot nnyịn ke mbiet esie, oro ọwọrọ ke imekeme ndinyene nti edu emi Abasi enyenede inyụn̄ idomo ndikpebe enye. Ke ini mbon emi ẹnyenede esịtmbọm ẹn̄wamde mme owo, mmọ ẹsikpebe Jehovah Abasi emi edide Ete mbọm.​—Mme N̄ke 14:31.

BIBLE EKPEP NNYỊN KE MBỌM NNYỊN ESINAM ABASI

Mbọm nnyịn esinam Abasi, esinyụn̄ abiak enye ndikụt nnyịn ibọde ufen. Bible etịn̄ nte eketiede Abasi ke idem ke ofụri ini emi nditọ Israel ẹkebọde ufen ke Egypt ye ofụri isua 40 emi mmọ ẹkeyode ke wilderness. Enye ọdọhọ ete: “Ke ofụri ini emi mmọ ẹkedude ke nnanenyịn emi ama abiak enye.” (Isaiah 63:9) Ikedịghe Abasi okụt nte mmọ ẹbọde ufen, enye emen iso osio. Utu ke oro, ufen mmọ ama abiak enye. Abasi ọkọdọhọ ete: “Mmetịm mfiọk ubiak mmọ.” (Exodus 3:7) Abasi ama ọdọhọ n̄ko ete: “Owo eke otụkde mbufo otụk n̄kpasịp enyịn mi.” (Zechariah 2:8) Ke ini owo anamde se ibiakde nnyịn, esitiene abiak Abasi.

Bible ọdọhọ ke ọkpọkọm ikere ke Abasi ikemeke nditua utọ owo nte nnyịn mbọm, ke Abasi ‘okpon akan esịt nnyịn onyụn̄ ọfiọk kpukpru n̄kpọ.’ (1 John 3:​19, 20) Abasi ọfiọk nnyịn akan nte ifiọkde idem nnyịn. Enye enen̄ede ọdiọn̄ọ nte n̄kpọ etiede ye nnyịn, se ikerede, ye nte etiede nnyịn ke idem. Mbọm nnyịn esinyụn̄ anam enye.

Imenịm ke Abasi ọyọdọn̄ nnyịn esịt, anam inyene ọniọn̄, onyụn̄ an̄wam nnyịn ke ini inyenede mfịna, sia imọfiọk ke enye esin̄wam mbon oro ẹnyenede mfịna

 N̄wed Abasi ọdọhọ nnyịn ete

  • “Afo okpokot, Jehovah ekpeyere; afo ekpeseme oyom un̄wam, enye okponyụn̄ ọdọhọ, ‘Se mi mi!’”​—ISAIAH 58:9.

  • “‘Koro ami mmọfiọk ekikere oro ami n̄kerede mban̄a mbufo,’ uyo Jehovah edi emi, ‘ekikere emem, idịghe eke afanikọn̄, man nnọ mbufo ini iso ye idotenyịn. Ndien mbufo ẹyekot mi ẹnyụn̄ ẹdi ẹdibọn̄ akam ẹnọ mi, ami nyonyụn̄ n̄kpan̄ utọn̄ nnọ mbufo.’”​—JEREMIAH 29:11, 12.

  • “Sịn mmọn̄eyet mi ke ekpeme ikpa fo. Nte mmọ idụhe ke n̄wed fo?”​—PSALM 56:8.

ABASI OKỤT SE IWỌRỌDE NNYỊN, ỌFIỌK NTE ETIEDE NNYỊN KE IDEM, ESINYỤN̄ ATUA NNYỊN MBỌM

Ndi ndifiọk ke mbọm nnyịn esinam Abasi ekeme ndin̄wam nnyịn iyọ se iwọrọde nnyịn? Kere ban̄a se iketịbede inọ Maria:

“Ke ini eyen mi emi ekedide isua 18 akakpade ke enye ama ọkọdọn̄ọ kansa ke isua iba, n̄kpa esie ama abiak mi tutu uwem odorode mi. Mma nyat esịt ye Jehovah ke ntak emi enye mîkanyan̄ake eyen mi!

“Ke isua itiokiet ama ekebe, mma ntịn̄ nte etiede mi ke idem nnọ eyenete kiet emi ekedide ata ufan mi ke esop nnyịn, nnyụn̄ ndọhọ enye ke Jehovah imaha mi. Enye ama enen̄ede akpan̄ utọn̄ inyụn̄ isịbeke mi ikọ ke inua. Ke mma n̄kada ediwak hour ntịn̄ ofụri se ikesịnede mi ke esịt nnọ enye, enye ama eti mi se idude ke 1 John 3:​19, 20, emi ọdọhọde ke ‘Abasi okpon akan esịt nnyịn onyụn̄ ọfiọk kpukpru n̄kpọ.’ Enye ama ọdọhọ mi ke Jehovah ọfiọk se iwọrọde mi. Itien̄wed oro ama enen̄ede otụk mi.

“Kpa ye oro se enye eketịn̄de emi okotụkde mi, esịt okosụk ayayat mi! Ekem, mma n̄kot Psalm 94:​19, emi ọdọhọde ete: ‘Ke ini ediwak ekikere ẹtịmerede mi esịt, ndọn̄esịt fo enem ukpọn̄ mi.’ Eketie mi nte ke ẹkewet itien̄wed oro ẹnọ mi! Nte ini akakade, mma n̄keme nditịn̄ nte etiede mi ke idem nnọ Jehovah sia mma ndiọn̄ọ ke enye ke akpan̄ utọn̄, ke enye onyụn̄ ọfiọk se iwọrọde mi.”

Enem nnyịn etieti ndidiọn̄ọ ke Jehovah ọfiọk se iwọrọde nnyịn, ke mbọm nnyịn esinyụn̄ anam enye! Edi ntak emi ufen okponde ntem ke ererimbot emi? Ndi Abasi amia nnyịn ufen ke ntak idiọkn̄kpọ nnyịn? Ndi Abasi ayanam ufen etre? Ẹyebọrọ mme mbụme emi ke mme ibuotikọ oro ẹtienede.