Yeremia a ta a lomabe̱ o jome̱le̱ Bonayuda ońola beńamsedi be ta bangame̱n po̱ye̱ babo̱ ońola ná ba bangisane̱ Yehova Loba labu. (Yer 13:25) Ne̱ni di tumba di timbino̱ be̱ o ben bete̱medi ba mudī be mabwesane̱ ndutu e? Mbia ma Bonaisrael mi bo̱lo̱ne̱ mulatako mabu na Loba. Nje ye mbale̱ ye nde ná milopo ma mbia mi si ta mi bupe̱ bediedi Yehova a bolino̱ o kalat’a Ndimbisedi 6:5-7.

Mbia me ngińa o mbad’a mudī mi mongwane̱ o jembe̱ myemba masu we̱nge̱. Milopo ma mbia me ná mongwane̱ mbia mabu o jo̱nge̱le̱ Yehova tongwea na mudango ma bwam ma Jowe̱ la Ndabo a mbia di malondise̱ ńo̱ng’abu. (Mye 22:28) Ombusa jombwa sinima “Ces paroles devront être sur ton coeur”—Interviews de familles, alabe̱ min myuedi:

• Ne̱ni mbia mō̱ mi tongwe̱le̱no̱ o buka mitakisan ma ponda ye̱se̱ jombwea Jowe̱ la Ndabo a mbia e?

• Njika minam mō̱ di matombwane̱no̱ o be̱ne̱ mudango ma bwam ma Jowe̱ la Ndabo a mbia na lena di malondise̱ ńo̱ng’ao e?

• Jombwea Jowe̱ la Ndabo a mbia njika mitakisan na be̱nno̱ e, na ne̱ni pe̱ neno̱ dutea o buka mo̱ e?