Naʉ̃ partede bedʼeachu David nokʼo ʉ̃rʉ akʉza Saúl nokʼo ʉ̃rʉ. Adewara nebʉrabʉ 80 poagabaside kʼãrẽ berabarida ʉ̃rʉ. Nããrãra Saúlbara ũdubibasi eda krĩchabʉta akʉza Jeowa bedʼea ũrĩbʉta, mamina tẽãra ũrĩkĩrã ẽ basi Jeowaba jarabʉra. Ewari berabari wãne Jeowaba Saúlʼra bia akʉ ẽ basi akʉza jarasi Samuelʼa jʉrʉmarẽã Davidta Israel nokʼo bʼaita. Maʉ̃ kʼarea Saúl mejãcha kĩrʉbasi baera beakĩrãbasi Davidʼra. Mamina Davidbara abarika oẽ basi. Jonatánbara kʼawuabasi Jeowabara Davidta jidasita nokʼo bamarẽã maʉ̃ kʼarea kʼẽrẽpabasi iyiʉ̃me. Ewari aba David nekayirua zroma osimina iduaribisi Jeowaba iyira kʼẽãmarẽã. Bʉta wũãwũã barabʉbʉrʉ kʼarebara bʉ wũãwũãba kʼawuamarẽã kʼãrẽa yibiata Jeowaba kãgabʉde bʼaita.