Ruth 4:1-22
4 Boaz cu khua hauka ah a va kal i a va ṭhu. Mah lioah Boaz nih a chimmi tlan khotu pa cu a rak i chawk. Boaz nih “Ka kawi, ra law rak ṭhu tuah” tiah a ti i mah pa cu a rak ṭhu.
2 Cun Boaz nih khua upa pahra kha a auh hna i “Hika ah rak ṭhu u” tiah a ti hna. Cucaah an rak ṭhu ve.
3 Boaz nih tlan khotu pa kha hitin a ti: “Kan unau Elimelek ta a simi lo kha Moab ram in a rak kirmi Naomi nih a zuar lai.
4 Mah kong cu nangmah kaan hngalhter a hau tiah ka ruah. Cawk na duh a si ahcun khuami hna le khua upa hna hmaiah hin caw ko. Asinain cawk na duh lo ahcun rak ka chim. Zeicahtiah tlan khotu cu nangmah na si i nangmah aan changtu cu keimah hi ka si.” Mah tikah cu pa nih “Cawk ka duh ko” tiah a ti.
5 Cun Boaz nih “Naomi sinin a lo na cawk tikah mithi pa nupi, Moab minu Ruth sin zong in na cawk a hau lai. Cuticun mithi pa a ro cu a min in a hmun lai” tiah a ti.
6 Mah tikah tlan khotu pa nih “Keimah ka ro tu ka sung sual lai, ka tlan kho ṭhan lai lo. Tlanhnak nawl ka ngeihmi kha hmang law nangmah nih tlan ko. Kei cu ka tlan lai lo” tiah a ti.
7 Hlanlio Israel chan ah tlanhnak le a ngeitu i thlennak ti bantuk i cawk, i zuarhnak kha fehter awkah phungphai pakhat an rak ngei: Mah cu mi pakhat nih a phanat a phoih i a dang pakhat kha a pek, cuticun Israel ram ah hnatlaknak cu fehter a si.
8 Cucaah tlan khotu nih Boaz cu “Nangmah nih caw ko” tiah a ti i a phanat kha a phoih.
9 Boaz nih mi vialte le upa hna sinah hitin a ti: “Elimelek ngeihmi vialte le Khilion le Mahlon ngeihmi vialte cu Naomi sinin ka cawk ti kha nanmah hi tehte nan si.
10 Mithi pa a min cu a unau lak le a khuami hna lakah hloh a si nakhnga lo, a ro cu a min in hmunhter awkah Mahlon nupi, Moab minu Ruth zong kha ka ṭhit lai. Nannih cu tehte nan si.”
11 Khua hauka ah a ummi vialte le upa hna nih hitin an ti: “Kannih cu tehte kan si! Na ṭhit dingmi nupi cu Jehovah nih thluachuah pe ko seh. Israel miphun a hringsortu Rachel le Leah bantuk si ko seh. Nang zong Efrathah ah na hlawh tling ko seh law Bethlehem ah minṭha hmu ko.
12 Mah minu sinin Jehovah nih aan pek laimi tefa thawng in na innchungkhar cu Tamar le Judah fapa Perez chungkhar bantuk si ko seh.”
13 Cuticun Boaz nih Ruth cu a ṭhit i a nupi a hung si. A ihpi tikah Jehovah thluachuah thawng in nau a pawi i fapate a hrin.
14 Mah tikah nu pawl nih Naomi kha hitin an ti: “Nangmah aan tlan khomi a umtertu Jehovah cu thangṭhat si ko seh. Ngakchiapa min cu Israel ram ah thangṭhat si ko seh!
15 Amah nih nunnak thar aan pek lai i na tarlei ah aan zohkhenh lai. Zeicahtiah nangmah aan daw i fapa pasarih nakin a ṭha deuhmi na monu nih aan hrinpiakmi a si.”
16 Naomi nih naute cu a cawi i a pom, cun a umh.
17 A innpa nu pawl nih naute cu min an sak. “Naomi caah fapate hrin a si cang” tiah an ti i Obed tiah min an sak. Anih cu Jesse pa a si i Jesse cu David pa a si.
18 Mah hna hi Perez hrinsor an si: Perez cu Hezron pa a si;
19 Hezron cu Ram pa a si; Ram cu Amminadab pa a si;
20 Amminadab cu Nashon pa a si; Nashon cu Salmon pa a si;
21 Salmon cu Boaz pa a si; Boaz cu Obed pa a si;
22 Obed cu Jesse pa a si; Jesse cu David pa a si.
