Ruth 3:1-18
3 Ruth a vapa nu Naomi nih hitin a ti: “Ka fanu, himnak aan pe khotu va kaan kawlpiak lai. Cuticun ṭha tein khua na sa kho lai.
2 Boaz cu kan rualchan a si. Rian na ṭuanṭimi salnu hna i an bawi zong a si. Tuzan phuhri* ah barli a zap lai.
3 Cucaah i kholh law zihmui i thuh, cun ṭha tein i hruk law phuhri ah va kal. A ei, a din dih hlan tiang na phanh kha hngalhter hlah.
4 A ih tikah a ihnak zawn kha va ngia. Cun va kal law a ke ah aa khuhmi puan kha va hlim law va zau. Zeidah na tuah awk a si ti kha amah nih aan chimh te lai.”
5 Mah tikah Ruth nih “Na chim ning tein ka tuah lai” tiah a ti.
6 Cucaah phuhri ah a va kal i a vapa nu nih a chim ning tein a va tuah dih.
7 Mah lioah Boaz cu a ei a ding i lungnuam tein a um. Cun fang ponmi hram ah a va it. Cu hnuah Ruth cu a thli tein a va kal i a ke ah aa khuhmi puan kha a hlim i a zau ve.
8 Zanṭim ah Boaz cu a lau i a hun i ṭhang. Cun a tho i a kehram ah nu pakhat a ihmi kha a hmuh.
9 “Ahodah na si?” tiah a hal tikah “Na salnu Ruth ka si. Nang cu a ka tlan khotu na si caah na salnu hi rak ka huhphenh ko”* tiah a ti.
10 Mah tikah Boaz nih hitin a ti: “Ka fanu, Jehovah nih thluachuah in pe ko seh. A no deuhmi misifak sinah siseh, mirum sinah siseh na kal lo. Atu ah a fekmi dawtnak na langhtermi cu a hmasa i na rak langhtermi nakin a ngan deuh.
11 Ka fanu, na thinphang hlah. Na chim ning in kaan tuahpiak lai. Nang cu miṭha na si kha khuami vialte nih an hngalh ko.
12 Tlan khotu ka si ti cu a hmaan ko. Asinain keimah nakin aa naih deuhmi tlan khotu pakhat a um rih.
13 Tuzan cu hika ah hin um ko, zinglei ah amah nih aan tlanh ahcun a ṭha ko! In tlan ko seh. Asinain aan tlanh duh lo ahcun a nungmi Pathian Jehovah min chalh in keimah hrimhrim nih kaan tlanh lai. Zinglei tiang hika ah hin zau ko.”
14 Cucaah zinglei tiang a kehram ah cun a zau i ahohmanh nih an hmuh nakhnga lo khua a dei hlan deuh te ah a tho. Boaz nih “Phuhri ah minu pakhat a ra ti kha ahohmanh nih hngal hna hlah seh” tiah a ti.
15 Cun Ruth cu “Naa aihmi na puan kha rak pu law rak dawn” tiah a ti. Ruth nih a dawnh tikah barli rel ruk* a rawnpiak i a phorhter. Mah hnuah Boaz cu khua chung ah a lut.
16 Ruth zong a ṭin i a vapa nu nih “Ka fanu, zeidah na lawh?” tiah a hal tikah Boaz nih a caah a tuahmi vialte kha a chimh.
17 Cun “‘Na vapa nu sinah kut ro in kir hlah’ tiah a ka ti i hi barli rel ruk hi a ka pek” ti zong in a ti.
18 Mah tikah Naomi nih “Ka fanu, thil sining zeidah a lawh lai ti na hngalh hlan cu hngak ko. Zeicahtiah nihin ah mah kongkau a liim hlan tiang Boaz cu aa din lai lo” tiah a ti.
Footnotes
^ Biafang Fianternak ah zoh.
^ Asiloah “na puan rak ka vorh ko.”
^ Seah paruk asiloah 44 L hrawng a si kho men. Thlaihhlei B14 ah zoh.
