Ruth 1:1-22
1 Biaceihtu hna chan ah* ram chung ah mangṭam a tlung. Cucaah mipa pakhat cu a nupi le a fapale pahnih he Judah ram, Bethlehem khua in Moab ram ah an pem i ramdang mi in khua an sa.
2 Cu pa a min cu Elimelek* a si, a nupi min cu Naomi* a si i a fapale pahnih min cu Mahlon* le Khilion* an si. Annih cu Judah ram, Bethlehem tiah auhmi Efrathah khuami an si. Moab ram ah an kal i cuka ah khua an sa.
3 A hnuah Naomi a vapa Elimelek cu a thi i a fapale pahnih he a rohtak hna.
4 A fapale nih Moab minu kha an ṭhit hna i pakhat cu a min ah Orpah a si i a dang pakhat cu Ruth a si. Cuka ah kum hra hrawng khua an sa.
5 A fapale pahnih Mahlon le Khilion zong an thi ve i Naomi cu fa le va ngei loin a taang.
6 Jehovah nih a miphun kha thluachuah a pek ṭhan hna i rawl a pek cang hna ti kha a theih caah a monule pahnih he Moab ram in kir awkah an i thawh.
7 A monule pahnih he khua an saknak hmun kha chuahtak in Judah ram ah an kir. An kal pah in,
8 Naomi nih a monule pahnih cu hitin a ti hna: “Nan nule inn ah va kir ko u. A thi cangmi nan vale cung le keimah cung ah dawtnak nan langhter bantuk in Jehovah nih nan cung ah a fekmi dawtnak langhter ko seh.
9 Jehovah nih nan vale inn ah him tein khuasak khawhnak* in pe ko hna seh.” Cun a hnamh hna i fakpi in an ṭap.
10 Annih nih “Kan kir lai lo. Na miphun sinah nangmah he kan kal ve ko lai” tiah an ti chih.
11 Asinain Naomi nih hitin a ti hna: “Ka fanule, va kir ko u. Zeicah keimah he cun nan kal lai? Nan vat ding fapa ka ngei kho ti lai lo.
12 Ka fanule, va kir ko u, va kal ko u. Va ngeih ṭhan awkah ka tar tuk cang. Tuzan ah va ka ngeih khawh i fapale ka hrin khawh hna hmanh ah,
13 an cutzat tiang maw nan hngah ko hna lai? Anmah hngah ruah ah maw va ngeih ṭhan loin nan um lai? Cutin nan tuah awk a si lo, ka fanule. Jehovah nih dan a ka tat caah hi bantuk thil nan tonmi cu ka ngaih a chia tuk.”
14 Mah tikah fakpi in an ṭap ṭhan. Mah hnuah Orpah nih a vapa nu kha a hnamh i a kir. Asinain Ruth cu a kir duh lo.
15 Cucaah Naomi nih “Zoh hmanh! Na naunu cu a miphun le a pathian hna sinah a kir cang. Nang zong a sinah va kir ve” tiah a ti.
16 Asinain Ruth nih hitin a ti: “Nangmah kaltak awk le na sinin kir ṭhan awkah rak ka fial duh hlah; na kalnak ah ka kal ve lai, na riahnak ah ka riak ve lai. Na miphun cu ka miphun an si ve lai i na Pathian cu ka Pathian a si ve lai.
17 Na thihnak hmun ah ka thi ve lai i cuka ah vui ka si ve lai. Thihnak ruang ah si loin a dang ruang ah kaan kaltak ahcun Jehovah nih fakpi in dan ka tat ko seh.”
18 Ruth cu amah he kal ding in aa tim tuk cang ti kha Naomi nih a hmuh tikah a thlauh ti lo.
19 Cuticun an pahnih in Bethlehem tiang an kal thluahmah. Bethlehem khua an phanh tikah an khua ning in an khuaruah a har tuk i nu pawl nih “Amah hi Naomi a si lo maw?” tiah an ti.
20 Mah tikah hitin a ti hna: “Naomi* tiah ka au ti hlah u, Mara* ti tu in rak ka au u. Zeicahtiah A Ṭhawng Bik Pathian nih ka nunnak ah harnak tampi a ka tonter.*
21 Hika in tling tein ka rak chuak nain Jehovah nih kut ro in a ka kirter, Jehovah nih a ka ralchanh i A Ṭhawng Bik Pathian nih harnak a ka tonter caah Naomi tiah ka au ti hlah u.”
22 Cuticun Naomi le Moab miphun a simi a monu Ruth cu Moab ram in an rak kir. Barli ṭuan caan thawkka ah Bethlehem khua cu an phan.
Footnotes
^ Asiloah “Biaceihtu hna nih dinnak a um nakhnga rian an ṭuan lioah.”
^ A sullam “Ka Pathian Cu Siangpahrang A Si.”
^ A sullam “Aa Nuammi.”
^ “A tha a der; a zaw” ti sullam a ngeimi Hebru biafang in a rami a si kho.
^ A sullam “A Derthawmmi; Donghnak A Phanmi.”
^ A hrampi, “dinhnak hmun.”
^ A sullam “Aa Nuammi.”
^ A sullam “A Khami.”
^ Asiloah “ka nunnak kha a khaatter.”
