Ruth 2:1-23
2 Naomi nih a vapa Elimelek lei in rualchan pakhat a ngei; a min cu Boaz a si i a rum tukmi a si.
2 Moab minu Ruth nih Naomi cu “Mithmai ṭha a ka petu hna sinah famua va suat* ding in lo ah ka kalter ko” tiah a ti. Mah tikah Naomi nih “Va kal ko, ka fanu” tiah a leh.
3 Cucaah a kal i rawlṭuantu hna hnulei in famua cu a va sua. Cuticun Elimelek rualchan a simi Boaz lo ah ruahlopi in a va phan.
4 Mah lioah Boaz cu Bethlehem in a rak phan i rawlṭuantu hna kha “Jehovah nih in umpi ko hna seh” tiah a ti hna. Annih nih “Jehovah nih thluachuah in pe ko seh” tiah an leh.
5 Boaz nih rawlṭuantu hna haotu tlangval pa sinah “Mah minu hi ahote chung dah a si?” tiah a hal.
6 Rawlṭuantu hna haotu tlangval pa nih hitin a leh: “Anih cu Moab ram in Naomi he a rak kirmi Moab minu a si.
7 ‘Zaangfahnak in famua ka suatter u law rawlṭuantu hna nih an nganhtami kha rak ka charter ko u’ tiah a kan nawl. Zingka in atu tiang a ṭuan peng ko. Atu te lawng hi thlam ah chikkhat aa dinh a si.”
8 Boaz nih Ruth cu hitin a ti: “Ka fanu, famua suat awkah midang lo ah cun kal duh hlah. A dang khoika hmanh ah kal ti loin ka salnule pawng te ah hin um ko.
9 An ṭuannak hmun kha ngia law an hnu in zul hna. Tlangval pawl kha hna an in hnawh nakhnga lo ka chimh cang hna. Na ti a hal ahcun tlangval pawl nih an thanciami ti-um chung i ti kha va ding ko.”
10 Mah tikah Ruth cu khukbil in a bawk i hitin a ti: “Zeicah mithmai ṭha na ka pek? Ramdang mi ka si ko nain zei ruang ah dah ka cung ah zaangfahnak na langhter?”
11 Boaz nih hitin a leh: “Na vapa a thih hnuah a nu cung ah na tuahmi thil vialte kha an ka chimh dih. Na nu le na pa le na khuaram kaltak in na hngalh bal lomi miphun sinah na rak ratnak kong zong an ka chimh.
12 Na rak tuahmi caah Jehovah nih laksawng in pe ko seh, a thla tang ah naa dor caah Israel Pathian Jehovah nih laksawng tling, in pe ko seh.”
13 Mah tikah “Ka bawipa, na mithmai ṭha hmu ko ning. Kei cu na rianṭuantu hmanh ka si lo nain na salnu hi na ka hnemh i thazaang na ka pek” tiah a ti.
14 Rawl ei caan a phak tikah Boaz nih Ruth cu “Ra law changreu hi zuthor ah nawk law ei ve” tiah a ti. Cucaah Ruth cu rawlṭuantu hna pawng ah a ṭhu. Cun fangreu zong a pek, khim tein a ei hnuah a hleimi zong a um.
15 Ruth nih rian ṭuan a thawk ṭhan tikah Boaz nih tlangval hna kha “Faphal lak zong ah charter ko u, zeiti hmanh in ti hlah u.
16 Faphal tom chung zong in zuk u law a char awkah chiahpiak u. Thlauh hlah u” tiah bia a cahtak hna.
17 Cuticun zanleipi tiang famua a suat. Famua a suatmi kha a tuk tikah barli ephah pakhat hrawng* a si.
18 Mah kha a phorh i khua chung ah a lut. A rak phorhmi cu a vapa nu nih a hmuh. Ruth nih khim tein a ei i a hleimi rawl zong kha a chuah i a pek.
19 A vapa nu nih “Nihin khoika ah dah famua na suat? Khoika ah dah na ṭuan? Na cung ah zaangfahnak a langhtertu cu thluachuah hmu ko seh” tiah a ti. Mah tikah Ruth nih “Nihin rian ka ṭuannak cu Boaz lo ah a si” tiah a ti i a ṭuannak hmun kha a chimh.
20 Cu tikah Naomi nih a monu cu “A nungmi le a thimi cung ah a fekmi dawtnak a langhtertu Jehovah nih amah cu thluachuah pe ko seh” tiah a ti. Cun “Anih cu kan rualchan a si. A kan tlan khotu a si”* ti zong in a ti.
21 Mah tikah Moab minu Ruth nih “‘Rawl ṭuan caan a dih hlan tiang ka salle sinah hin ṭuan ko’ ti zong in a ka ti” tiah a ti.
22 Naomi nih a monu Ruth cu “Ka fanu, a salnule sinah na ṭuanmi cu a ṭha deuh. Midang lo ahcun an in zawmhtaih sual lai” tiah a ti.
23 Cucaah Ruth cu barli ṭuan caan le changvut ṭuan caan a dih hlan tiang Boaz salnule pawng te ah a um i famua a sua. Cun a vapa nu sinah a um peng.
Footnotes
^ Biafang Fianternak ah zoh.
^ 22 L hrawng. Thlaihhlei B14 ah zoh.
^ Asiloah “Anih cu cawk ṭhannak nawl a ngeimi kan rualchan a si.”
