Malakia 3:1-18
3 “Talenu! Mungutuma mukeji wami, iye makangululiekela jila. Susumuku, Mwene wamwenemwene yoze nwakufupa makeza mu tembele Yenyi. Mukeji wa usendo yoze yenu nwakuzanga makeza. Pundu lume, makeza,” chocho anambe Yehova wa tujita.
2 “Iya makahasa kumana nguu ha tangwa lia kwiza chenyi? Iya makahasa kununga ni kumana muze iye makasoloka? Iye makapwa ngwe kahia ka fuli, makapwa nawa ngwe zapa ya akwa-kukosa.
3 Iye makatwama ngwe fuli mukwa-kupemesa prata, makapemesa ana ja Levi. Iye makaapemesa ngwe oru ni prata, pundu lume, kuli Yehova, ayo makapwa atu waze akuhana milambu ni ululi.
4 Yawana ya Yunda ni ya Yerusaleme muyikapemena Yehova ngwe chize chapwile ku matangwa a kunyima ni ku shakulu.
5 “Yami mungukeza kuli yenu hanga ngukanusopese ni kuhana uchela wa kulimika ni nganga, waze akulinga upangala, waze akulishinga ni mahuza, waze akwonga akwa-milimo jo, waze akwonga tuliwa, waze akwonga ana-shiwa, ni waze keshi kuzanga kukwasa yilambala. Ayo keshi kungwivwila woma,” chocho anambe Yehova wa tujita.
6 “Mumu yami nguli Yehova, chishi kwalumuka. Yenu nuli ana ja Yakomba, songo lienu kanda lichiheta.
7 Chize ha matangwa ja tulamba twenu, yenu nwakwehuka shimbi jami, kunushi kujifunga. Hilukenu kuli yami, ni yami munguhiluka kuli yenu,” chocho anambe Yehova wa tujita.
Alioze yenu nwakwamba ngwenu: “Kuchi mutuhiluka kuli yena?”
8 “Shina mutu lume mahasa kwiya chuma cha Zambi? Alioze yenu nunangwiyi.”
Yenu nwakwamba ngwenu: “Kuchi tunakwiyi?”
“Ha yihanda ya kumi ni yawana.
9 Pundu lume, yenu hinunashingiwa, mumu nunangwiyi, ewa, vungu lieswe linangwiyi.
10 Nehenu yihanda ya kumi mu mazuwo a kutulikila yuma hanga mu zuwo liami mupwe kulia. Lisesa, ngwesekenu ha chikuma chino,” chocho anambe Yehova wa tujita, “hanga numone nyi chichi kunwazulwila yikolo ya mwilu ni kunwaha yiwape yinji, nichimwe muchinuhona chakuhi.”
11 “Mungukanjisa mukwa-kuumbula,* iye kechi kakuwisa nawa mihuko yenu, ni mitondo ya uva ya mu minda yenu, muyikema mihuko yinji,” chocho anambe Yehova wa tujita.
12 “Mavungu eswe makamba ngwo yenu nukwete uwahililo, mumu yenu munukapwa chifuchi cha uwahililo,” chocho anambe Yehova wa tujita.
13 “Maliji jenu a kulimika ni yami kali akalu,” chocho anambe Yehova.
Alioze yenu nwakwamba ngwenu: “Kuchi twakuhanjika maliji a kulimika ni yena?”
14 “Yenu nwakwamba ngwenu: ‘Kuwayila Zambi chili chamokomoko. Yika mutuzuka nyi twalinga yuma yeswe yize iye akutwita, ni kunenganyana kumeso ja Yehova wa tujita?
15 Haliapwila twakumona ngwetu akwa-kulizata kakuwahilila. Chikwo nawa, atu waze akulinga yuma yipi, yuma yeswe ku mwono wo yakwenda kanawa. Ayo kakweseka Zambi, alioze niyimwe kuyishi kulingiwa kuli ayo.’”
16 Ha mashimbu jacho, waze te akwivila Yehova woma, kapwile ni kuhanjika mutu ni mutu ni sepa lienyi, Yehova te kakutela matwi ni kwapanjika. Kashika, yasoneka mukanda wa kwiwuluka kumeso jenyi, wa waze evilile Yehova woma ni kunyonga ha jina lienyi.
17 Yehova wa tujita kanambe ngwenyi: “Ayo makapwa a yami,” “ha tangwa lize, mungukaapwisa atu jami alipwila.* Mungukaevila keke ngwe chize tata akwivila keke mwanenyi yoze wakumulingila.
18 Yenu munukamona nawa kalisa hakachi ka mukwa-ululi ni mutu mupi, hakachi ka mutu yoze wakuwayila Zambi ni yoze keshi kumuwayila.”
