Malakia 2:1-17
2 “Haliapwila yenu asasendote, shimbi yino yinatale hali yenu.
2 Nyi kunwapanjikile, chikwo nawa kunwasele mbunge ha kuhalisa jina liami, mungukanushinga ni kwalumuna yiwape yenu yipwe mashingo. Ewa hingunalumuna yiwape yenu hiyinapu mashingo, mumu yenu kunushi kulemesa chikuma chino,” chocho anambe Yehova wa tujita.
3 “Talenu! Mumu lia yitanga yenu, mungukakuwisa mbuto yize hinunatumbu, mungukanukwita tuji ku meso, tuji a ha yiwanyino yenu. Makanutwala ndo ku chihela kuze kuli tuji.*
4 Chocho munukanyingika ngwenu, nanwaha shimbi yino hanga usendo wami ni Levi ununge,” chocho anambe Yehova wa tujita.
5 “Usendo wami ni iye wapwile usendo wa mwono ni sambukila, uze nalingile nenyi hanga angwivile woma.* Iye kangwivilile woma, ewa kalemesene jina liami.
6 Iye kakulongesa shimbi ya umwenemwene, keshi kuhanjika mahuza. Iye kakwenda ni yami ni sambukila ni ululi, kakwashile anji eche kulinga yuma yipi.
7 Mumu sasendote katamba kupwa ni chinyingi, atu katamba kumufupa hanga aalongese shimbi, mumu iye kali mukeji wa Yehova wa tujita.
8 “Alioze yenu, hinwapianguka mu jila. Hinwahukanyisa atu anji hakutwala ku shimbi. Hinwapihisa usendo wa Levi,” chocho anambe Yehova wa tujita.
9 “Kashika, mungulinga yimwe hanga anulelese kumeso ja atu eswe, mumu yenu kunwafungile majila jami, alioze nwasolola katonde ha kukaula shimbi.”
10 “Ngwami yetu eswe tukwete tata umuwika? Ngwami eswe Zambi umuwika watutangile? Mba mumu liaka twakulionga umwe ni mukwo ha kupihisa usendo wa tulamba twetu?
11 Yunda kalinga chuma chipi chinji, mu Izalele ni mu Yerusaleme mwalingiwa chuma cha uzelwokeso. Mumu Yunda kachisa usandu wa Yehova uze Iye akuzanga, yalimbata ni mwana wa kazambi chilambala.
12 Yehova makanongesa mu mbalaka ya Yakomba atu eswe waze akulinga chuma chino, apwe mutu mweswawo, chipwe ngwe mahana mulambu kuli Yehova wa tujita.”
13 “Nwakulinga nawa chuma chikwo chize chakuzalisa chilumbilo cha Yehova ni masoji, kulila ni mikuma. Kashika iye keshi kupala nawa yawana yenu, chipwe kuzanga yuma ya ku moko jenu.
14 Yenu nwakwamba ngwenu: ‘Mumu liaka?’ Mumu Yehova kali chela hakachi ka yena ni pwo lia ukweze we, yoze yena wonga, chipwe ngwe iye kali sepa lie, kanda pwo lie kupalikila mu usendo.*
15 Alioze, kuli umwe yoze kachilingile, mumu te kali ni spiritu ya Zambi. Yika iye te anafupu? Te kanafupu munyachi wa Zambi. Kashika, fungenu mbunge jenu, kanda nwonga mapwo a ukweze wenu.
16 Mumu kulilakula chishi kuchizanga,” chocho anambe Yehova, Zambi wa Izalele. “Chishi kuzanga nawa atu waze akulinga upupilo,” chocho anambe Yehova wa tujita. “Kashika, fungenu mbunge jenu, kanda nwonga mapwo a ukweze wenu.
17 “Yenu nwakuhongesa Yehova ni maliji jenu. Alioze nwakwamba ngwenu: ‘Kuchi twakumuhongesa?’ Ha kwamba ngwenu: ‘Mweswawo wakulinga yuma yipi, kali mupema kumeso ja Yehova, iye kakuwahilila nenyi,’ nwakwamba nawa ngwenu, Zambi ya ululi kulihi ali?’”
