Malakia 1:1-14
1 Maliji a Zambi:
Yehova yahanjika kuli A-Izalele kupalikila muli Malakia* ngwenyi:
2 Yehova kanambe ngwenyi: “Yami nakunuzanga.”
Alioze, yenu nunambe ngwenu: “Kuchi wakusolola zango liacho?”
“Ngwami Esau kapwile yayo ya Yakomba nyi?” chocho anambe Yehova. “Alioze yami yinguzanga Yakomba,
3 chazangile Esau. Yingupwisa milundu yenyi ya hululu ni kuhana chihinga chenyi kuli mikuza a mu puya.”
4 “Chipwe ngwe Endome kanambe ngwe: ‘Katunongesa chipi, alioze mutuhiluka, mututungulula yikulu,’ Yehova wa tujita kanambe ngwenyi: ‘Ayo matungulula, alioze yami mungupuzula, makaavuluka ngwo, “chifuchi cha yuma yipi” ni kwavuluka nawa ngwo, “atu waze hanahisa kuli Yehova ku miaka yeswe.”
5 Yenu ene munukachimona ni meso jenu kamu ni kwamba ngwenu: “Yehova amufumanyise mu chifuchi cheswe cha Izalele.”’”
6 “‘Mwana kakulemesa tato, ngamba kakulemesa mwene wenyi. Mba nyi yami nguli tatenu, ulemu uze natela kulihi uli? Mba nyi yami nguli mwene wenu, woma* uze natela kulihi uli?’ chocho anambe Yehova wa tujita kuli yenu asasendote waze nwakulelesa jina liami.
“‘Alioze, nwakwamba ngwenu: “Kuchi twakulelesa jina lie?”’
7 “‘Ha kuhana kulia cha luchisa ha chilumbilo chami.’
“‘Nwakwamba ngwenu: “Kuchi twakukupwisa wa luchisa?”’
“‘Ha kwamba ngwenu: “Mesa ya Yehova kuyishi ulemu.”
8 Muze nwakuhana chimuna yoze wafwa meso ngwe chitapo, nwakwamba ngwenu: “Kushi mulonga.” Muze nwakuhana chimuna chilema hanji wayiza, nwakwamba ngwenu: “Kushi mulonga.”’”
“Kashika, lisesa, achesekenu kuhana yimuna yino kuli nguvulu wenu. Shina iye mawahilila hali yenu hanji kutambula yimuna jacho ni zango?” chocho anambe Yehova wa tujita.
9 “Haliapwila, lisesa, liumbenu kuli Zambi hanga atwivile kama keke. Shina kulita ni milambu yize nwakuhana, iye manutambula lume ni zango?” chocho anambe Yehova wa tujita.
10 “Iya mukachi kenu unazange kuyika mapito? Mumu yenu kunushi kutayiza chipwe kukwachisa kahia ha chilumbilo nyi kanufwetele. Kashika yami chishi kunuzanga.” Chocho anambe Yehova wa tujita. “Chipwe milambu ya ku moko jenu chishi kuyizanga.”
11 “Mumu jina liami mulikapwa linene hakachi ka mavungu, chize ku chivumbuko ndo ku chitokelo. Ku yihela yeswe makafwinjisa yitapo ni kuhana milambu mu jina liami ngwe yawana yipema, mumu jina liami mulikapwa linene mukachi ka mavungu,” chocho anambe Yehova wa tujita.
12 “Alioze, yenu nwakungutuka ha kwamba ngwenu: ‘Mesa ya Yehova yili ya luchisa, milambu yaho ni kulia chaho yili yamokomoko.’
13 Yenu nwakwamba nawa ngwenu: ‘Yuma ayi yakuhongesa!’ Nwakuyilelesa,” chocho anambe Yehova wa tujita. “Nwakuneha yimuna a kwiya, yilema ni waze ayiza. Ewa, yenu nwakuneha yuma yino ngwe yawana! Shina yami natamba kutayiza yuma yino nwakungwaha?” chocho anambe Yehova.
14 “Kashingiwa mukwa-kwonga yoze ukwete chimuna wa kuji mu chendo chenyi, alioze malakenya Yehova ni kulambula chimuna yoze uli ni kapalia. Mumu yami nguli Mwanangana munene,” chocho anambe Yehova wa tujita. “Chikwo nawa, jina liami mulikakola woma hakachi ka mavungu.”
