Ngeni Ekkewe Chón Rom 15:1-33
15 Kich ekkewe mi péchékkúl, sipwe mwárei apwangapwangen chókkewe rese péchékkúl, me sisap apwapwaai pwisinkich.
2 Emén me emén kich sipwe apwapwaai chón órun me féri minne mi múrinné fán iten péchékkúletáár.
3 Pún pwal mwo ewe Kraist ese apwapwaai pwisin i, nge ussun chék met a makketiw: “Met aramas ra apasa ar repwe esiitok, ra pwal áeá le esiitaei.”
4 Pún meinisin ekkewe mettóch mi makketiw me lóóm, ra makketiw pwe sipwe káé seniir, pwe ren ach likiitú me ren ekkewe kapasen ourur seni ekkewe Taropwe mi Pin a tongeni wor ach ápilúkúlúk.
5 Iwe, amwo ewe Kot mi awora likiitú me ourur epwe awora leimi ewe pwal chék ekiek Kraist Jises a eáni,
6 pwe ren eú chék ngiingi* oupwe tipeeúfengen le elingaaló ewe Kot me Semen ach Samol Jises Kraist.
7 Ina minne, oupwe etiwa emén me emén ussun chék ewe Kraist a pwal etiwakemi, pwe Kot epwe ling ren.
8 Pún úa erenikemi pwe Kraist a wiliiti emén chón angangen chókkewe mi sirikomsais fán iten Kot, ewe mi apwénúetá an kapas, pwe epwe anúkúnúkú ekkewe pwon a eáni ngeni semelaper kewe,
9 me aramasen ekkewe ekkóch mwú repwe elingaaló Kot ren an úméúméch. Ussun chék met a makketiw: “Ina ewe popun úpwe pwáárukoló lein aramasen ekkewe ekkóch mwú, me ngang úpwe eáni kélún mwareiti itom we.”
10 Iwe, a pwal apasa: “Ámi aramasen ekkewe ekkóch mwú, oupwe fiti néún kewe aramas le pwapwa.”
11 A pwal apasa: “Ámi meinisin chón ekkewe mwú oupwe mwareiti Jiowa,* me ámi aramas meinisin oupwe mwareiti i.”
12 Aisea a pwal apasa: “Epwe wor efóch waren Jesi, ewe epwe pwáátá pwe epwe nemenem wóón chón ekkewe mwú, chón ekkena mwú repwe onómu ar ápilúkúlúk wóón i.”
13 Amwo ewe Kot mi awora ápilúkúlúk epwe ourakemiiló ren watteen pwapwa me kinamwe ren ámi lúkúlúk wóón i, pwe oupwe uren ápilúkúlúk ren manamanen ngún mi fel.
14 Iwe, ámi pwii kana, ngang úa núkúnúk pwe ámi oua pwal uren múrinné me sile, me oua tongeni fénéfengenikemi.*
15 Iwe nge, ngang úa kon tuwenewen lón ái mak ngenikemi ussun ekkóch ekkeei mettóch, pwe úpwe ngenikemi pwal eú kapasen áchechchem, pokiten ewe kirekiréch mi somwoló Kot a fang ngeniei
16 pwe úpwe emén chón angangen Kraist Jises ngeni chón ekkewe mwú. Úa fiti ewe angang mi pin fán iten ewe kapas allimen Kot pwe chón ekkeei mwú repwe eú asor mi ketiw me ren Kot, mi piniló ren ngún mi fel.
17 Iwe, ngang úa pwapwa pokiten ngang emén néún Kraist Jises chón káé me úa féri án Kot angang.
18 Pún ngang úsapw chúen kapas ussun ekkewe mettóch úa féri. Iwe nge, úpwe chék kapas ussun ewe angang Kraist a fen féraatá rei pwe aramasen ekkewe ekkóch mwú repwe tongeni álleasochisi Kraist. Me i a fen féri ei ren ái kapas me féffér,
19 ren péchékkúlen ekkewe esissil me manaman, ren péchékkúlen án Kot manaman, pwe seni Jerusalem ator ngeni lón unusen Illirikum úa unusen afalafala kapas allimen ewe Kraist.
20 Úa achocho ngeni ái úsapw afalafala ewe kapas allim ikewe ewe iten Kraist a fen chéú ie, pwe ewe angang emén a fen poputááni úsapw pwal sópweeló.*
21 Nge ussun met a makketiw: “Chókkewe rese angei och pwóróus ussun i repwe kúna, nge chókkewe resaamwo rong ussun i repwe wewe.”
22 Iei pwal popun a pinepin ái úpwe feito remi fán chómmóng.
23 Iwe nge, iei úa fen afalafal lón leeni meinisin lón ekkeei kinikin, me seni lóóm* úa mochen feiló remi.
24 Ina popun, úa fókkun mochen chuurikemi atun ái sáiló ngeni Spein, me mwirin ái pwapwaiti ach chiechifengen ren och fansoun, úa mochen pwe oupwe etieiló esopw al ngeni ikena ie.
25 Nge iei úpwele feiló Jerusalem pwe úpwe angang ngeni ekkewe aramas mi pin.
26 Pún chókkewe lón Masetonia me Akaia ra fangoló seni unusen letiper ekkewe mettóch mi wor rer pwe repwe álisi ekkewe mi wéúngaw lein ekkewe mi pin lón Jerusalem.
27 Pwúngún, iir ra pwapwa le féri ena, me ren enletin, iir chón liwinimmang ngeniir. Pún iká ra fang ngeni aramasen ekkewe ekkóch mwú mettóchur lón pekin lúkú, iwe iei chón ekkena ekkóch mwú repwe álisiir le ataweei osupwanger.
28 Iwe, mwirin ái áwesaaló ei me atoura ngeniir ei álillis, úpwele chuurikemi lón ái feiló ngeni Spein.
29 Pwal och, úa silei pwe lupwen úpwe torikemi, úpwe war fán eú úkúúkún watteen feiéch seni Kraist.
30 Ámi pwii kana, pokiten a wor ach lúkú lón ach Samol Jises Kraist, me án Kot we manaman* a efisi ach sipwe tongfengen lefilach, iwe oupwe etiei le achocho iótek ngeni Kot fán ásengesi,
31 pwe úpwe kúna túmún seni ekkewe aramas rese lúkú lón Jutia me ekkewe mi pin repwe etiwa fán pwapwa ewe álillis úa uwei fán iten Jerusalem,
32 pwe ren letipen Kot úpwe torikemi fán pwapwa me sipwe apéchékkúlafengenikich.
33 Amwo ewe Kot mi fang kinamwe epwe nónnóm remi meinisin. Amen.
Footnote
^ Krik, “aw.”
^ Are “asukulafengenikemi.”
^ Krik, “úsapw aúetá och wóón án emén lóngólóng.”
^ Are ese mwáál, “ekkóch ier.”
^ Krik, “ngún mi fel.”
