Me ren Mark 7:1-37
7 Iwe, ekkewe Farisi me ekkóch me lein ekkewe soumak mi feito seni Jerusalem ra mwicheto ren i.
2 Me ra kúna ekkóch me lein néún kewe chón káé ra mwéngé ener mwéngé wóón péúr mi limengaw, weween, ese téttél.*
3 (Pún ekkewe Farisi me meinisin chón Jus resap mwéngé iká rese télúéchú péúr* ren ar fitipachei éérenien ekkewe aramas lóóm lóóm,
4 me atun ra feito seni lón leenien amémé, resap mwéngé iká rese tútú. A chómmóng pwal ekkóch ééreni ra angei me fitipachei, choweán papataisi kap, pechis, me nape piras.)
5 Iwe, ekkeei Farisi me soumak ra eisini: “Pwata noum kewe chón káé rese fiti éérenien ekkewe aramasen lóóm, nge ra mwéngé ener mwéngé wóón péúr mi limengaw?”
6 A ereniir: “A fich met Aisea a osuni ussumi chón likótuputup, ussun a makketiw, ‘Ekkeei aramas ra asamoluei ren túnawer nge letiper a towaw seniei.
7 Ese wor lamoten ar fel ngeniei, pún ra asukula kapasen aramas ussun itá nge ái kapas.’
8 Ámi oua likitaaló án Kot allúk me oua fitipachei éérenien aramas.”
9 Pwal och, a ereniir: “Oua tipáchem le kútta alen ámi ousap álleasochisi án Kot allúk pwe oupwe amwéchú ámi ééreni.
10 Áwewe chék, Moses a apasa, ‘Asamolu semom me inom,’ me, ‘Ié a eáni kapas mi ngaw ngeni seman are inan, epwe ninniiló.’
11 Nge ámi oua apasa, ‘Iká emén a apasa ngeni seman are inan: “Met a nóm rei mi tongeni álisuk, a korpan (weween, a fen káimuuló fán iten eú asor ngeni Kot),” ’
12 ámi ouse chúen mut ngeni ena emén an epwe mwo nge féri eú mettóch fán iten seman are inan.
13 Iei minne, oua féri pwe án Kot kapas a lamotongaw ren ámi kewe ééreni oua pwisin féraatá. Me oua féri chómmóng mettóch ussun ei.”
14 Iwe, a pwal kérato ekkewe aramas, a ereniir: “Ámi meinisin, oupwe aúseling ngeniei, me weweiti weween.
15 Minne a elimengawa emén aramas, esap met a tolong lón awan, nge met a towu seni lón awan.”
16 * ——
17 Iwe, lupwen Jises a ló seni ekkewe aramas, a tolong lón eú imw me néún kewe chón káé ra eisini ussun ewe kapas áwewe.
18 Iwe a ereniir: “Ámi oua pwal chék ussur, ese wor ámi wewe? Ouse silei pwe ese wor och me lúkún mi tolong lón emén a tongeni elimengawa i,
19 pún a tolong, esap lón letipan, nge lón lukan, me a towu lón ewe suwer?” Ren án Jises apasa ei, a pwáraatá pwe mwéngé meinisin mi liméch.
20 A pwal apasa: “Minne a towu seni emén, ina met a elimengawa i.
21 Pún seni lón, seni lón letipen aramas, a feito ekiek mi efeiengaw mi emmwen ngeni tipisin lisowumwáál,* solá, nieló aramas,
22 féfférún lisowu lúkún pwúpwúlú, tipemmóng, féfféringaw, otuputup, angolossá,* lólówó,* kapasen turunufas, lamalamtekia, me miritingaw.*
23 Meinisin ekkeei mettóch mi fókkun ngaw ra feito seni me lón me ra elimengawa emén aramas.”
24 Iwe, a útá me ikena ie me feiló lón kinikinin Tair me Siton. Iwe, a tolong lón eú imw pún ese mochen emén epwe silei pwe i a war, nge a chúen pwá.
25 Mwittir chék emén fefin, ewe néún we nengngin ngún mi limengaw a wááni, a rong ussun i me a feito me chapetiw órun pechen.
26 Ewe fefin i emén fin Krik, seni Finisia lón Siria. Me a kan tittingorei an epwe asúoló ewe timon seni néún we nengngin.
27 Nge a ereni neminna: “Akkomw mut ngeni ekkewe semirit ar repwe métúló, pún ese pwúng án emén epwe angei enen ekkewe semirit pilawa me manei ngeni ekkewe kúkkún kolak.”
28 Nge a pélúweni: “Ewer Samol, nge pwal mwo ekkewe kúkkún kolak fán ewe cheepel ra áni mworomworen enen ekkewe kúkkún semirit.”
29 Ren ena a ereni neminna: “Pokiten ka erá ei, kopwe feiló, ewe timon a towu seni noum we nengngin.”
30 Iwe, neminna a feiló ngeni imwan we me a kúna ewe semirit mi kokkoon wóón ewe peet nge ewe timon ese chúen nóm.
31 Lupwen Jises a liwin seni lón kinikinin Tair, a fetáleló ngeni Siton ngeni ewe Setin Kalili, ngeni ewe kinikin Tekapolis.*
32 Me ikeei ie ra uweato ren emén mwán mi selingepúng me ese tongeni ffat an fós, iwe ra tingormaw ngeni an epwe isettá péún wóón.
33 Iwe, a angei átena me áimuoló seni ewe mwichen aramas. Mwirin a etikaalong aútún péún kewe lón selingen ewe mwán, me mwirin an attuf, a attapa chénawan.
34 Me a sachchetá láng, ngasellap, me apasa ngeni i: “Effata,” weween, “Suukuló.”
35 Ren ei, selingan kewe ra suukuló, me a ffat an fós. Iwe, a poputá le éch an fós.
36 Iwe ren ena, a allúk ngeniir ar resap ereni emén, nge lapólóón an allúkú ngeniir, pwal ina lapólóón ar esilefeili.
37 Ren enletin, a fókkun luluuló ar mwaar, me ra apasa: “A fókkun múrinné mettóch meinisin a féri. A pwal mwo nge féri án ekkewe mi selingepúng repwe rong me chón awemwéch repwe kapas.”
Footnote
^ Ekkewe Farisi me ekkóch chón Jus ra kan télú péúr ren ar fiti ar we ééreni.
^ A wewe ngeni ar télú péúr tori lekupukupun we me lukanapan.
^ Krik, “maas mi lólówó.”
^ Are “tiparoch.”
^ Are “ekkewe engol telinimw.”
