PWÓRÓUS LÚKÚNPÉÉN | IÉ KEWE CHÓN PWÁRAATÁ JIOWA?
Met Chón Pwáraatá Jiowa Ra Lúkú?
Ám Chón Pwáraatá Jiowa aua lúkú pwe “kapasen lon ekewe Toropwe mi Pin meinisin ra pop seni Ngünün Kot, ra aüchea.” (2 Timoty 3:16) Aua néúnéú ewe Paipel pwe eú minen emmwen mi álilliséch le káé usun ewe Chón Fératá me minen emmwen pwe aupwe manaweni eú manaw mi múrinné.
Ewe Paipel a apasa: “Aramas repwe silei pwe en, ewe mi iteni Jiowa, en chék ewe mi Unusen Tekia seni meinisin wóón fénúfan.” (Kölfel 83:18, NW) * Ina pwata ám aua fel ngeni Jiowa Kot chék me ám néún chón pwáraatá aua éttúres le esilefeili itan we.—Aisea 43:10-12.
Ám Chón Kraist, aua lúkú pwe Jesus “Nöün Kot,” * a feitiw fénúfan me a wiliti Messaia. (Johannes 1:34, 41; 4:25, 26) Mwirin án Jesus máló, a manawetá lón láng. (1 Korint 15:3, 4) Mwirin a wiseni ewe wis Kingen ewe Mwúún Kot. (Pwärätä 11:15) Ena Mwú wesewesen eú mwú epwe eliwinato ewe Paratis wóón fénúfan. (Taniel 2:44) Paipel a apasa: “Ekewe chon tipetekison repwe fanüeni ewe fanü o pwapwaäsini ar feiöch me kinamwe mi somwola.”—Kölfel 37:11, 29.
“Atun ra álleani ewe Paipel, ra lúkú pwe Kot a fóffós ngeniir. Ika a toriir osukosuk, ra álleani ewe Paipel me kútta lón ika ifa usun repwe pwákini ar osukosuk. . . . Me rer, án Kot we Kapas a chúen manaman.”—Benjamin Cherayath néúwisin Katolik, Münsterländische Volkszeitung simpung, Tois
Ám Chón Pwáraatá Jiowa aua lúkú pwe án Paipel kewe kapasen emmwen ra tongeni álisi aramas pwal mwo nge lón ei fansoun. (Aisea 48:17, 18) Ina popun, aua fitipachei ekkena kapasen emmwen. Áwewe chék, pokiten ewe Paipel a éúréúrakich pwe sipwe ttii senikich féffér mi elimengawa ekiekich me inisich, iwe ám ause ún suupwa are áeámwáálli sáfei me ún sáfei mi oumwesimwesaatá aramas. (2 Korint 7:1) Aua pwal ttii senikem ekkewe féffér Paipel a affata pwe ra ngaw, áwewe chék ren únnúpuch, tipisin lisowumwáál me solá.—1 Korint 6:9-11.
^ Ewe kapasen lepoputáán lón ewe Paipel are Testamentin Lom me Testament Söfö, a apasa pwe “lon ewe Testamentin Lom sia nöünöü . . . ‘Samol mi Lapalap’ fän iten Jiowa ika Yahwe.”
^ Ewe Paipel a pwal apasa pwe Jesus “Nöün Kot Aleman” pokiten i ewe áeménún me i chék Jiowa a pwisin fératá.—Johannes 3:18; Kolose 1:13-15.
Neman Kopwe Pwal Sani
ESSENTIAL BIBLE TEACHINGS
Mei Wor Iten Kot?
Kot a eáni chómmóng itelapan áwewe chék, Samol, Chón Fératá me Ewe mi Fókkun Manaman. Nge iten Kot a mak arapakkan fán 7,000 lón Paipel.
