Chón fiti ám we mwicheich ra feito seni unusen fénúfan nge ám ause riri ngeni ekkewe lamalam. Ikaamwo ám we ofesilap a nóm lón Merika nge lap ngeni Chón Pwáraatá Jiowa ra nónnóm lón ekkewe ekkóch fénú. Ren enletin walu million som ám aua kan asukula aramas ewe Paipel lón lap seni 230 fénú. Pokiten aua álleasochisi alon Jesus keei: “Aramas repwe afalafalafeili ewe Pworausen Manau usun ewe Mwün Kot won unusen fanüfan, pwe epwe eu minen pwärätä ngeni aramas meinisin.”​—Mateus 24:14.

Ám aua fókkun álleasochisi allúkún ewe mwú ese lifilifil ia aua nóm ie. Nge aua achocho pwe ausap pekini eú pekin. Aua féri ena pokiten aua álleasochisi minne Jesus a allúkú ngeni Chón Kraist pwe ‘resap peekini fönüfan.’ Ina popun ause angolong lón mwékútúkútún mwú mi pekini eú pekin áwewe chék ren úttút, campaign me ekkewe mwékútúkút mi álisatá maun. (Johannes 15:19; 17:16, Agapé) Iwe pokiten ena, atun ewe Oruuen Maunen Fénúfan, Chón Pwáraatá Jiowa ra kalapus, kawet pwal mwo nge ninniiló. Emén bishop lóóm lón Tois a makkeei: “A fich ar repwe apasa pwe iir chék ewe mwichen aramas rese fókkun fiti mwékútúkútún ewe nemenemen Tois fán nemenien Hitler.”

Nge ám ause áimukemiló seni aramas. Iei án Jesus iótek ngeni Kot fán iten néún kewe chón áppirú: “Üsap tüngor pwe kopwe angeer seni lon ei fanüfan.” (Johannes 17:15) Ina popun ka tongeni kúnakem atun aua angangen moni, shopping me fiti sukul lón sópwúm kewe.