Ina ewe wokisin a fókkun iteféúló me chómmóng aramas ra kan alóni lap seni ekkewe pwal ekkóch wokisin lón unusen Paipel. Ekkóch ra meefi pwe ese pwal wor eú wokisin me lúkún ena “a fókkun pwáraatá ewe riri lefilen Kot me aramas, me ewe alen amanaw.” Ina popun lón chómmóng fénú ei wokisin “Johannes 3:16” are fen masouan we, chómmóng aramas ra eáni esissil atun a wor emwicheichen aramas, ra pacheetá wóón war tarakú, makkeei wóón etiip me metakkan.

Ese mwáál, chókkewe ra néúnéú ena wokisin ra fókkun meefi pwe án Kot tong a alúkúlúkú ngeniir pwe epwe wesewesen amanawer tori feilfeiló. Nge en, met meefiom? Met weween ngonuk án Kot tong? Me reom, met Kot a féri pwe epwe pwáraatá an tong ngonuk?

Chómmóng aramas ra tipeeú pwe Kot a fératá unuselapen láng me fénúfan, me pwal pwisin ekkewe aramas. Múrinnéén fférútáán ekkewe ménúmanaw, me tókóráráán kifetin inisiir a ánnetatá pwe mi wor emén mi fókkun tipachem a fériiretá. Iteiten rán chómmóng aramas ra kilisou ngeni Kot fán iten an we liffangen manaw. Ra pwal mirititi pwe ika esap púnún met Kot a awora ngeniir, áwewe chék ren ásepwál, konik, mwéngé me ewe kókkótun rokopwálin masouen lón fénúfan, iwe ese tongeni sópwósópwóló manawer me resap tongeni pwapwaiti met ra kan féri.

Sipwe fókkun kilisou ngeni Kot ren mettóch meinisin, pún i ewe Chón Fératá me Chón Atufichi Sópwósópwólóón Manaw. (Kölfel 104:10-28; 145:15, 16; Föför 4:24) Sia tongeni  weweiti án Kot tong ngenikich lupwen sia ekieki met a féfféri ren an epwe atufichi sópwósópwólóón manaw. Iei met aposel Paulus a makkeei usun: “[Kot] a ngeni aramas manau me ngasangas pwal mettoch meinisin.” Paulus a pwal erá pwe pokiten Kot “sia manau me mwökütüküt me nonom.”​—Föför 17:25, 28.

Iwe nge, Kot ese chék pwáraatá an tong ren an túmúnúkich lón pekin aion. A pwal átekiakichetá ren an fang ngenikich ewe tufichin ririéch ngeni I me a álisikich ach sipwe pwapwaiti. (Mateus 5:3) Iwe, ekkewe aramas mi álleasochis epwe wor ar ápilúkúlúk pwe repwe chón án Kot we famili me wiliti “nöün.”​—Rom 8:19-21.

Johannes 3:16 a pwal erá pwe Kot a pwáraatá an tong ren an tiinaato Néún we Jesus ngeni fénúfan pwe epwe asukulakich usun an we Kot me Seman we, me epwe pwal máló fán ásengesich. Nge, chómmóng repwe apasa pwe rese kon lien weweiti pwata a lamot ngeni Jesus an epwe máló fán iten aramas, me ifa usun an we máló a pwáraatá pwe Kot a tongekich. Sipwe ppii ifa usun ewe Paipel a áweweei ewe popun Jesus a máló me ifa aúchean.

Meinisin aramas ra sessemwen, chichchinnapeló me máló. Nge esap ina met Kot a tipeni me lepoputáán. A ngeni ekkewe popun aramas ewe ápilúkúlúkún manaw esemuch lón paratis wóón fénúfan. Nge a wor och mettóch mi lamot repwe féri: Repwe álleasochisi Kot. Kot a erá pwe ika ra filatá le álleasolap ngeni, iwe repwe máló. (Keneses 2:17) Ewe áeménún mwán a ú ngeni án Kot nemenem, iwe a máló me a atoto máló ngeni mwirimwirin kewe. Aposel Paulus a apasa: “Ren eman mwän tipis a tolong lon fanüfan, nge an tipis a atoto mäla. Iei popun mäla a tori aramas meinisin, pun ir meinisin ra tipis.”​—Rom 5:12.

Iwe nge, Kot a “efich mine a pwüng.” (Kölfel 37:28) Inaamwo ika mi lamot án Kot epwe apwúngú án ewe áeménún mwán féfférún tipis, nge Kot ese onómu aramas meinisin fán kapwúngún máló me riáfféú feilfeiló pokiten án ena emén aramas álleasolap. Nge ren an epwe fiti ewe allúk usun “manau ngeni manau,” iwe a féri minne mi pwúng me a suukisefál ngeni aramas mi álleasochis ar repwe kúna manaw esemuch. (Ekistos 21:23) Ewe kapas eis: Ifa usun aramas repwe angeisefáli ewe manaw mi unuséch a péút seni Atam? Pélúwan: Mi lamot emén mi unuséch manawan usun chék Atam, epwe asoresini manawan.

Mwirimwirin Atam kewe rese unuséch, ina minne rese tongeni asoresini eú manaw mi unuséch. Jesus chék a tongeni. (Kölfel 49:6-9) Jesus ese álemwiri tipisin Atam we. I mi unuséch usun chék Atam. Ina minne, ren an fangóló manawan, a mééni aramas seni fétekin tipis. Ren an féri ena, a suuk ngeni mwirimwirin ewe áeúin pean pwúpwúlú ar repwe pwapwaiti ewe sókkun manaw mi unuséch Atam me Efa ra fen eáni me lepoputáán. (Rom 3:23, 24; 6:23) Mi wor och mettóch sipwe féri pwe sipwe kúna feiéch seni watteen án Kot féfférún tong ngenikich?

Sipwe liwiniti Johannes 3:16, me nengeni ekkewe kapas “meinisin mi lükü i [Jesus] resap pöütmwälila, pwe repwe eäni manau esemüch.” Weween pwe mi wor och mettóch sipwe féri pwe sipwe kúna manaw esemuch. Ren ach sipwe kúna “manau esemüch,” mi lamot sipwe lúkú Jesus me álleasochisi.

Neman kopwe ekieki: ‘Pwata a pwal lamot álleasochis? Esap pwe Jesus a erá, “meinisin mi lükü i” repwe kúna manaw esemuch?’ Ewer, ewe mettóch lúkú mi lamot. Iwe nge, a lamot ach sipwe chechchemeni pwe me ren ewe Paipel, lúkú ese chék wewe ngeni ach sipwe lúkú pwe mi wor emén itan Jesus. Me ren ewe Vine’s Expository Dictionary of Old and New Testament Words, ewe popun kapas Johannes a néúnéú a wewe ngeni án emén “lúkúlúk wóón, nge esap chék etiwa pwe mi enlet ewe pwóróus.” Ren án emén epwe nóm fán án Kot chen, ese chék naf an epwe mirititi pwe Jesus i ewe Chón Amanaw. Mi lamot ewe chón lúkú epwe pwal enletin apwénúetá áitien Jesus kewe. Ika emén a apasa pwe a wor an lúkú nge ese fiti féffér, iwe mi chék péén. Ewe Paipel a apasa, “lükülük a mäla are ese fiti föför.” (James 2:26) Ren pwal och itiitin, a lamot ewe chón lúkú epwe anganga an lúkúlúk wóón Jesus, weween, mi lamot epwe manaweni ewe sókkun manaw mi tipeeú ngeni minne a lúkú.

Paulus a áweweei ei pwóróus ren an apasa: “Sia nom fän nemenien än Kraist we chen ngenikich, pun sia silei pwe eman aramas [Jesus] a mäla fän iten aramas meinisin . . . A mäla fän iten aramas meinisin, pwe chokewe mi manau resap chüen manau fän püsin iter, nge repwe chök manau fän iten ewe mi mäla o manausefäl fän iter.” (2 Korint 5:14, 15) Ach enletin kilisou fán iten án Jesus we asor, itá epwe amwékútúkich le féri ekkewe siwil lón manawach. Sise chúen eáni ewe sókkun manaw mi chék ekieki pwisin mochenich nge sia fen manaw fán iten Jesus, ewe a máló fán itach. Weween, a lamot sipwe akkomwa lón manawach ach apwénúetá minne Jesus a áiti ngenikich. Ena sókkun siwil epwe weneiti minne sia kan aúcheani, ach kewe kefil, me mettóch meinisin sia féri. Ifa ewe feiéch fán iten chókkewe ra anganga ar lúkú Jesus?

Ewe sáingoon kinikin lón Johannes 3:16 a áiti ngenikich án Kot pwon ngeni chókkewe mi anganga ar lúkú lón ewe méén kepich me manaweni ewe sókkun manaw mi tipeeú ngeni án Kot kewe allúk. Kot a mochen pwe chókkana mi tuppwél “resap pöütmwälila, pwe repwe eäni manau esemüch.” Iwe nge, chókkewe repwe kúna feiéch seni án Kot tong, mi sókkofesen ar ápilúkúlúk.

Ren eú mwich, Jesus a pwon ngeniir manaw esemuch lón láng. A affata ngeni néún kewe chón káé mi tuppwél pwe epwele ammólnatá leenier pwe repwe eti i le nemenem lón lingan. (Johannes 14:2, 3; Filipi 3:20, 21) Chókkewe ra manawsefál ngeni manaw lón láng “repwe nöün Kot me nöün Kraist souasor, repwe pwal eti Jesus le nemenem lon ükükün engeröü ier.”​—Pwärätä 20:6.

Mi chék aúkúk chóchóón néún Kraist kewe chón káé repwe angei ena feiéch. Jesus a fen apasa: “Ousap niuokus, ämi mwich mi kisikis, pun Sememi a pwapwa ren an epwe ngenikemi ewe mwü.” (Lukas 12:32) Epwe ifa úkúkún chóchóón ena “mwich mi kisikis”? Pwärätä 14:1, 4 a erá: “Üa nenengeni o üa küna ewe Lam [Jesus Kraist ewe mi manawsefál] a ütä won ewe Chuk Sion [lón láng], nge üa pwal küna ipükü faik me rüanüngeröü aramas ra nom ren, ir chokewe a mak itan me iten Saman won chamwer. . . . Ra fen küna manau me lein ekewe aramasen fanüfan, pwe ir ekewe mweinöü fän iten Kot me ewe Lam.” Ena chóchóón aramas 144,000, eú chék “mwich mi kisikis” ika sipwe aléllé ngeni ekkewe fite fite billion aramas mi manaw wóón fénúfan seni lóóm tori ikenái. Ewe Paipel a áweweei pwe iir king, iwe, ié kewe repwe nemenem wóón?

Jesus a kapas usun ewe oruuen mwichen aramas mi tuppwél, ekkewe repwe kúna feiéch seni ewe Mwú lón láng. Usun met sia kúna lón Johannes 10:16, Jesus a erá: “A pwal wor ekoch nei sip resap nonom lon ei lenien sip. Ngang üpwe pwal fokun emweniireto. Repwe aüseling ngeni mweliei. Mürin epwe wor eu chök mwichen sip me eman chon mas.” Ekkeei “sip” ra eáni ewe ápilúkúlúkún manaw esemuch wóón fénúfan, ewe chék ápilúkúlúk Atam  me Efa ra fen eáni me lepoputáán. Ifa usun sia silei pwe ar ápilúkúlúk epwe fis wóón fénúfan?

Fán chómmóng, ewe Paipel a fós usun án ei fénúfan epwe usun eú Paratis. Ka tongeni pwisin suuki noum Paipel me álleani ekkeei wokisin: Kölfel 37:9-11; 46:9; 72:7, 8, 16; Aisea 35:5, 6; 65:21-23; Mateus 5:5; Johannes 5:28, 29; Pwärätä 21:4. Ekkena wokisin ra oesini usun wesilóón maun, lengita, samau me máló. Ra fós usun eú fansoun lupwen ekkewe aramas mi múrinné repwe pwapwaiti le aúetá pwisin imwer, atakeni pwisin fénúer me ámááraatá néúr kewe lón eú sókkun leeni mi kinamwe. * Kese pwal pwapwaiti ena sókkun ápilúkúlúk? Mi wor popun sipwe lúkú pwe ekkena pwon repwele pwénútá.

Ika kopwe mwo ekilonei meinisin met Kot a fen féri fán itom me fán iten aramas meinisin, a ffat pwe i a fen féri chómmóng mettóch. Sia eáni manaw, tipachem, péchékkúlen inis me ekkewe mettóch mi lamot fán iten sópwósópwólóón manaw. Nge lap seni ekkena, án Kot liffangen méén kepich me ren Jesus, ewe a máló fán itach, epwe tongeni atoto watteen feiéch usun met sia káé seni Johannes 3:16.

Manaw esemuch fán kinamwe me pwapwa, esap chúen wor samau, maun, lengita, are máló epwe wesewesen emmwen ngeni pwapwa me feiéch tori feilfeiló. Epwe fókkun lóngólóng wóóm ika kopwe kúna ekkena feiéch. Iwe, iei ewe kapas eis mi lamot, Met ka kan féri fán iten Kot?