Kükkün Me Säräfö, Met Oupwe Akkomwa Lon Manauemi?

“Iei popun üa sä wenechar ngeni ewe tepkiri, pwal iei popun üa wewe ngeni eman chon köfön esap chök köfön chöü.”​—1 KOR. 9:26.

1, 2. Pwe kopwe sopwöch lon om mämmääritä ngeni äsimaü, met a lamot epwe nom reom?

 IKA kopwe säi lon eü leeni kese sissilei, eli kopwe mochen uwei echö map me eföü kampas. Ewe map epwe äiti ngonuk ikewe ka nom ie me älisuk le akkota ia kopwe feilo ie. Nge ewe kampas epwe älisuk le fiti chök ewe al ka fen aotalo kopwe fetäl woon. Iwe nge, esor lamoten ena map me kampas ika kese silei ia we ka mochen feilo ie. Pwe kosap chök rikirik fetäl mi lamot epwe ffat ngonuk ewe leeni ka mochen tikeri.

² A pwal ina usum atun ka mämmääritä ngeni äsimaü. A wor reom echö map mi alükülük me eföü kampas. Ewe Paipel a usun ewe map mi tongeni älisuk le silei ewe al mi pwüng kopwe fetäl woon. (SalF. 3:5, 6) Ewe kampas a usun mwelien letipom mi käit seni Paipel, epwe fokkun älisuk le fiti chök ewe alen pwüng. (Rom 2:15) Nge, ren an epwe sopwöch manauom, a pwal lamot om kopwe silei ia we ka mochen feilo ie. A lamot epwe wesewesen ffatöch ngonuk ekkewe mettoch kopwe achocho ngeni lon om angang ngeni Jiowa.

3. Me ren makkeien Paul lon 1 Korint 9:26 ikkefa feiöchün än emön isetiw met epwe achocho ngeni?

³ Ewe aposel Paul a affata feiöchün än emön isetiw met epwe achocho ngeni me tinikken pwe epwe tikeri, lupwen a makkeei: “Iei popun üa sä wenechar ngeni ewe tepkiri, pwal iei popun üa wewe ngeni eman chon köfön esap chök köfön chöü.” (1 Kor. 9:26) Ika a ffat met kopwe achocho ngeni, a fen ffatafateöch ngonuk met kopwe föri. Ekiselo kopwe föri kefil mi lamot lon manauom, äwewe chök ren om lamalam, angang, pwüpwülü, famili me met kan. Nge fän ekkoch, eli kopwe meefi rukoruk ren chommongun met kopwe filatä. Nge ika ka fen akkota fetälum me mwan, mi longolong woon ewe enlet me emmwen seni Paipel, iwe kosap tongeni tupulo le fitalo eü al mi mwääl.​—2 Tim. 4:4, 5.

4, 5. (a) Met epwe tongeni fis ika kese pwisin isetiw met kopwe achocho ngeni? (b) Pwata a lamot pwe minne kopwe filatä epwe longolong woon om mochen apwapwaai Kot?

⁴ Ika kese pwisin affatatiw met kopwe ekiekin apwönüetä, neman chienom kewe me nöüm kewe sense repwe etipetipok le föri minne ra ekieki pwe a öchituk. Pwüngün, inaamwo ika a fen ffat ngonuk met kopwe achocho ngeni, ekkoch repwe chüen peseok le föri met ra mochen. Lupwen ka aüseling ngeniir, pwisin eisinuk, ‘Ekkewe mettoch ra pese ngeniei ai upwe achocho ngeni epwe älisiei le chechchemeni ewe Chon Föriei are repwe fen erikieilo seni?’​—Älleani Än Salomon Afalafal 12:1.

⁵ Pwata minne kopwe filatä lon manauom epwe longolong woon om mochen apwapwaai Kot? Popun pun Jiowa a fang ngenikich mettoch meinisin mi mürinnö. (Jem. 1:17) Mei pwüng pun itä meinisin repwe kilisou ngeni Jiowa. (Pwar. 4:11) A ifa me  mürinnöön om pwäratä kilisou ngeni lupwen ka ekieki letipan atun ka isetiw met kopwe achocho ngeni? Sipwe nengeni ekkewe mettoch mi aüchea kopwe achocho ngeni, me ifa usun kopwe tikeri.

Met Ka Tongeni Achocho Ngeni?

6. Ifa ewe mettoch a kon lamot kopwe achocho ngeni, iwe pwata?

⁶ Ewe lesen mwen ei, a affata lamoten om kopwe achocho ngeni le pwisin änneta ngonuk pwe mi enlet alon ewe Paipel. (Rom 12:2; 2 Kor. 13:5) Eli chienom kewe ra lükü ewe afalafal pwe aramas ra pop seni mongki are än lamalam sokkopaten afalafal chofona pokiten peseien aramas ngeniir ar repwe lükü. Iwe nge, ese pwal lamot om kopwe lükü och pokiten chök ekkoch ra mochen kopwe eäni ar lükü. Chechchemeni pwe Jiowa a mochen om kopwe angang ngeni lon unusen ekiekum. (Älleani Mattu 22:36, 37.) Semach lon läng a mochen sipwe eäni ewe sokkun lükü sia tongeni änneta pwe mi enlet.​—Ipru 11:1.

7, 8. (a) Ikkefa ekkewe mettoch kopwe achocho ngeni ka tongeni mwittir tikeri pwe repwe apöchökküla om lükü? (b) Met kopwe küna ika ka tikeri ekkena mettoch ka achocho ngeni?

⁷ Ren an epwe pöchökkülelo om lükü, pwata kese isetiw ekkewe mettoch kopwe achocho ngeni ka tongeni mwittir tikeri? Äwewe chök, achocho iotek iteiten rän. Pwe kosap epinipini om iotek me epwe titchik, ka tongeni makketiw are chechchemeni met a fis ngonuk lon eü me eü rän, mwirin ka apachaalong lon om iotek. Chemeni le apasa ekkewe mettoch ka pwapwaiti, nge esap chök ekkewe sossot ka küna. (Fil. 4:6) Ka pwal tongeni achocho le älleani ewe Paipel iteiten rän. En mi silei pwe ika ka älleani fachö pekin taropwe iteiten rän, ka tongeni älleani unusen ewe Paipel lon chök eü ier? * Kölfel 1:1, 2  a erä: “Ra feiöch ekkewe aramas . . . ra pwapwaiti än ewe Samol mi lapalap alluk o ekieki usun lerän me lepwin.”

⁸ Ka pwal tongeni achocho ngeni le ammolnatä met kopwe pölüweni lon mwich. Eli ka tongeni poputä ren om älleani met kopwe pölüweni are älleani wokisin. Mwirin, achocho le pölüweni lon pwisin om fos. Pwüngün, iteiten om pölüweni ka asor ngeni Jiowa. (Ipru 13:15) Lupwen ka tikeri ekkewe mettoch mi mecheres kopwe föri, om lükülük me om aücheani Jiowa epwe lapolo, iwe ka mmolnetä le isetiw ekkewe mettoch epwe lamot watteen fansoun me mwen om kopwe tikeri.

9. Ika kesaamwo emön chon afalafal, met kopwe ekiekin achocho ngeni?

⁹ Ikkefa ekkoch mettoch kopwe tongeni isetiw mwom, nge iir mi lamot watteen fansoun me mwen om kopwe tikeriir? Ika kesaamwo poputä le afalafala ewe kapas allim, eli ka tongeni achocho ngeni le wiliti emön chon afalafal. Lupwen ka tikeri ena, kopwe achocho om kopwe lipwäköch me fiti ei angang iteiten maram. Kopwe käeö le nöünöü ewe Paipel lon om afalafal. Ika ka föri ena, kopwe küna pwe epwe lapolo om pwapwaiti ei angang. Mwirin ka tongeni awatteelo om fansoun afalafal imw me imw are fen achocho le nöüni emön chon käeö Paipel. Ika en emön chon afalafal esaamwo papatais, a ifa me öchün om kopwe achocho pwe kopwe papatais me wiliti emön Chon Pwäratä Jiowa.

10, 11. Ikkefa ekkewe mettoch ekkewe kükkün me säräfö mi fen papatais repwe isetiw mwer?

¹⁰ Ika ka fen papatais, ikeei ekkoch mettoch kopwe achocho ngeni, nge iir mi lamot watteen fansoun me mwen om kopwe tikeriir. Eli fän ekkoch kopwe mochen älisi ekkewe mwichefel mi osupwangen chon afalafal ie. Ka pwal tongeni äeä om pöchökkül le auxiliary are regular pioneer. Fite ngeröü pioneer repwe apworausa ngonuk pwe ewe angangen pioneer, ina ewe angang mi mürinnö le chechchemeni ewe Chon Föruk seni le kükkünum. Ka tongeni föri ekkena mettoch atun ka chüen nonnom ren semom me inom. Om mwichefel epwe pwal küna feiöch seni om achocho.

¹¹ Mei pwal wor ekkoch mettoch kopwe achocho ngeni epwe efeiöchü pwal ekkoch mwichefel. Äwewe chök, ka tongeni akkota le mwöküt ngeni eü leeni are fönü mi osupwangen chon afalafal ie. Kopwe pwal mochen älillis lon kaütään Kingdom Hall me keangen ewe ofesilap lon ekkoch fönü. Eli ka pwal tongeni wiliti chon angangen Bethel are emön misineri. Pwüngün, me mwen om kopwe tikeri ekkena, mi lamot kopwe akkomw achocho ngeni om kopwe papatais. Ika kesaamwo papatais, nengeni met a lamot kopwe föri pwe kopwe tongeni tikeri.

Achocho Ngeni om Kopwe Papatais

12. Met popun ekkoch aramas ra papatais me pwata esap chök ikkena ekkewe popun?

¹² Ifa usun kopwe äweweei ewe popun aramas ra kan papatais? Eli ekkoch ra ekieki pwe ina met epwe tümünüür ar resap turulong lon tipis. Ekkoch ra meefi pwe mi lamot repwe papatais pun chiener kewe ra fen papatais. Ekkoch ra mochen apwapwaai semer me iner. Iwe nge, papatais esap tongeni eppetuk le föri ekkewe föfför mi ngaw ka ekiekin föri le monomon are ka chök mochen papatais pokiten ekkoch ra oumwesuk. Itä kopwe papatais atun ka fokkun mirititi wisen emön Chon Pwäratä Jiowa me lükülük pwe ka mmolnetä me tipeeü ngeni om kopwe apwönüetä wisom.​—SalAf. 5:4, 5.

13. Pwata kopwe papatais?

¹³ Popun emön epwe papatais, pun Jises a awisa ngeni nöün kewe chon äppirü pwe repwe feilo föralo chon käeö me ‘repwe papataisiir.’ A pwal isetiw eü leenien äppirü ren an pwisin papatais. (Älleani Mattu 28:19, 20; Mark 1:9.) Pwal och, a lamot papatais fän iten än aramas repwe küna manau. Mwirin än Piter  kapas usun än Noa föri ewe waimw ikewe ie i me an we famili ra küna manau ie atun ewe Noter, a erä pwe ina: ‘eu liosun papatais mi amanauakich iei . . . ren än Jesus Kraist manausefäl.’ (1 Pit. 3:20, 21) Papatais ese wewe ngeni en insurance ka mömmönatiw pwe epwe eü minen tümün me alükülük ngonuk ika a fis och osukosuk. Nge, ka papatais pokiten ka tongei Jiowa me mochen angang ngeni ren unusen lelukom, ekiekum me tufichum.​—Mark 12:29, 30.

14. Pwata ekkoch ra tipemwaramwar le papatais, nge met a alükülükük?

¹⁴ Eli ekkoch ra tipemwaramwar le papatais pokiten ra niuokkus ika repwe katowu mwirin. A pwal ina usun meefiom? Ika ina, esap weween pwe a mwääl om ekiek pun a tongeni pwäratä pwe ka weweiti aüchean wisen emön Chon Pwäratä Jiowa. Nge a pwal wor och popun ka niuokkus? Eli kese wesewesen lükü pwe om anomuk fän än Kot emmwen epwe fokkun asopwöchuk. Ika ina om ekiek, epwe älisuk ika kopwe ekieki sopwongawen manauen chokkewe ra tunalo än Paipel kewe emmwen. Are, neman ka tongei än Jiowa allük nge ka meefi pwe kese tufichin apwönüretä. A öch ena memmeef pwe a pwäratä om tipetekison le mirititi om kewe apwangapwang. Pwal mwo ewe Paipel a apasa pwe letipen aramas meinisin mi otuputup. (Jer. 17:9) Nge ka tongeni sopwöch ika ka ‘aleasochisi an [Kot] kapas’ iteitan. (Älleani Kölfel 119:9.) Ese pwal lifilifil ewe popun ka pireir le papatais nge mi lamot kopwe pwäkini.

15, 16. Ifa usun kopwe silei pwe ka mmolnetä om kopwe papatais?

¹⁵ Iwe nge, ifa usun kopwe tongeni silei pwe ka fen mmolnetä le papatais? Ka tongeni pwisin eisinuk ekkeei kapas eis: ‘Ua tongeni äweweei ekkewe popun afalafal lon Paipel? Ua lo afalafal inaamwo ika semei me inei rese lo? Ua achocho le fiti ekkewe mwich meinisin? A wor ekkewe atun ua fen ü ngeni etipetipengawaen chienei kewe? Upwe chüen angang ngeni Jiowa inaamwo ika semei, inei me chienei kewe ra ükütiw lon ar angang ngeni? Ua fen iotek usun ai riri ngeni Kot? Ua fen fangolo manauei ngeni Jiowa lon iotek?’

¹⁶ Papatais a tongeni siwili manauen emön, ina popun a lamot kopwe akkomw ekiekiöchü. Ka fen äsimaü pwe kopwe tongeni ekiekin papatais? Esap weween pwe emön a äsimaü pokiten chök a mmen angöch le afalafal woon ewe roong are pölüweni kapas eis atun mwich. A lamot epwe wor an tufich le apwüngalo mettoch nge epwe longolong woon an weweiti ekkewe kapasen emmwen lon Paipel. (Älleani Ipru 5:14.) Ika ka tongeni föri ena, iwe a suuk ngonuk eü wis mi aüchea seni meinisin, om kopwe angang ngeni Jiowa ren unusen letipom me manaueni  ewe manau mi pwäratä pwe ka enletin fangolo manauom ngeni.

17. Met epwe älisuk le likiitü fän ekkewe sossot epwe toruk mwirin om papatais?

¹⁷ Mwirin chök om papatais, eli kopwe fokkun mwasangasang le angang ngeni Kot. Nge ekiselo, eli kopwe küna sossotun om lükü me likiitü. (2 Tim. 3:12) Kosap meefi pwe ka chök äkkäläemön le pwäkini om kewe sossot. Kütta älillis seni semom kewe me inom, pwal seni ekkewe mi äsimaü lon ewe mwichefel. Chichchiechi ngeni chokkewe mi tongeni apöchökkülok. Kosap mönüki pwe Jiowa a tongeok me i epwe ngonuk ewe tufich om kopwe pworacho ngeni sossot meinisin.​—1 Pit. 5:6, 7.

Ifa Usun Kopwe Tikeri Minne Ka Ekiekin Apwönüetä?

18, 19. Ifa usun kopwe feiöch seni om chosani met ka kan akkomwa lon manauom?

¹⁸ Inaamwo ika ka fokkun achocho, nge ka meefi pwe usun itä kese tattawe le föri ekkewe mettoch mi lamot ngonuk? Ika ina, a lamot kopwe chosani met ka kan akkomwa lon manauom. Ren chök äwewe: Angei eü pwokit me amasouwalong fiteföü faü lon. Mwirin nilalong ppi. Ewe pwokit a ur ren ekkewe faü me ppi. Kopwe ninawü masouen ewe pwokit. Iwe mwirin, amasouasefäni ren pwal chök ekkena faü me ppi nge kopwe akkomw walong ewe ppi, mwirin walong ekkewe faü. Mi chüen kuchulong ekkewe faü? Aapw. Pun ka akkomw walong ekkewe ppii.

¹⁹ Pwal ina usun ewe sossot ka küna atun om akkota om fansoun. Ika ka akkomwa ekkewe minen apwapwa lon manauom, kopwe küna pwe usun itä kese chüen tattawe le föri wisom kewe mi kon lamot, om kewe angang ngeni Kot. Nge ika ka apwönüetä än ewe Paipel pesepes le akkomw “filätä mine a fokun mürina,” ka tongeni föri wisom ngeni Kot pwal föri ekkoch minen apwapwa.​—Fil. 1:10.

20. Ika ka meefi lolilen me tipemwaramwar le tikeri minne ka achocho ngeni, met kopwe föri?

²⁰ Lon om tinikken le tikeri met ka achocho ngeni, kapachelong om mochen papatais, fän ekkoch kopwe meefi lolilen me tipemwaramwar. Lon ena atun, “kopwe monätä won ewe Samol mi Lapalap om weires, pwe i epwe tümwünük.” (Kölf. 55:22) Iei mwo, a suuk ngonuk om kopwe fiti ei angang mi kon ämmeseik me lamot seni meinisin, ina ewe angangen afalafal woon unusen fönüfan. (Fof. 1:8) Ka tongeni filatä om kopwe chon katol chök are kopwe tinikken le fiti ei angang mi ämmeseik. Kosap pireir le äeä om kewe tufich le älisatä angangen ewe Mwu. Kese tongeni niamam lon om angang ngeni ewe Chon Föruk seni le kükkünum.​—SalAf. 12:1.

[Pwóróus fan]

Ifa Usun Kopwe Pölüweni?

• Pwata kopwe isetiw minne kopwe achocho ngeni lon manauom?

• Ikkefa ekkewe mettoch mi mürinnö kopwe achocho ngeni?

• Met emön epwe föri pwe epwe tikeri an mochen papatais?

• Ifa usun om chosani minne ka akkomwa lon manauom epwe älisuk le tikeri met ka achocho ngeni?

[Kapas Eis fán Iten ewe Lesen]

[Sasing lón pekin taropwe 20]

Ka achocho le äkkällea Paipel iteiten rän?

[Sasing lón pekin taropwe 22]

Met epwe älisuk le tikeri om mochen papatais?

[Sasing lón pekin taropwe 23]

Ifa ewe lesen ka käeö seni ei kapas äwewe?